Efesios 6
6
Ppo̧'ä̧tö̧ ttä'o hueö jȩttö̧ huȩnȩ
1Ppo̧'ä̧tö̧ Diosrö esetätömä, cuä'o hueö eseunu jȩpä̧tu̧cui̧. Cuä'o hueö jȩcu̧'ä̧tu̧cu̧mä̧ adiu. 2-3Dios adihuä juäi iya päa'attö, äcuomenä hueinö pi̧yȩmä̧: “Cuä'orö'inä, cua̧ju̧ru̧'i̧nä̧ ucuotönö ka̧cuä̧tu̧cui̧, eseunu cu̧ja̧cuä̧tu̧cuä̧cua̧'a̧nö̧ pi̧jä̧nä̧. Ja̧'hua̧ta̧nö̧ recuonä cu̧ja̧cuä̧tu̧cuä̧cua̧'a̧nö̧ pi̧jä̧nä̧.”
4Ucutu'inä ttä̧'o̧tö̧, cui̧tti̧mö̧ ttami surächi'önämä jȩcu̧'ä̧tu̧cuä̧'. Adiunätä ji'äu huo̧juȩtä̧tu̧cui̧ cui̧tti̧mö̧rö̧, Tu̧ru̧hua̧rö̧ eseunu ttesetäcua'a̧nö̧.
Ttumöhuäyotö ttu̧ru̧hua̧ hueö jȩttö̧ huȩnȩ
5Korotö huettö aditätömä, Cristo i̧huȩnȩ päö ta'anö jȩcu̧'ä̧tu̧cu̧'a̧nö̧, adiu ucuotönö'inä, ye'ecunu'inä adiu jȩpä̧tu̧cui̧ o'ca juiyönä pi̧jä̧ttö̧ cu̧ru̧hua̧ hueömä.
6Cristo i̧huȩnȩ aditätö, Diosrö pä̧huä̧ rö̧jö̧ ttaditö'a̧nö̧, cuami iso'quitucunä adiu aditätucui. Cu̧ru̧hua̧tu̧cu̧ ucuturu topö esehua pä'ö tomenätämä cuaditätucuä'. 7Adiunä aditätucui Diosrö pä̧huä̧ rö̧jo̧mȩnä̧tä̧, pi̧jä̧ ttö̧ja̧rö̧ pä̧huä̧ rö̧jo̧mȩnä̧mä̧cö̧. 8Täcö huo̧juä̧tö̧jä̧ ucutumä, ttu̧ru̧hua̧cu̧ aditätö'inä, ttu̧ru̧hua̧ to'ätö'inä Tu̧ru̧hua̧ Jesucristo iyä̧cuȩ ttȩmä̧cuo̧tö̧do adiu ttaditinö micuä.
9Ucutu'inä ruhuotö, cumöhuäyotörö adiunätä jȩpö̧ ka̧cuä̧tu̧cui̧, suronä ro̧cu̧huȩpä̧tu̧cuo̧ca̧'a̧nä̧. Amöcuädätucui, ucutu'inä, cumöhuäyotö'inä ya̧tȩrö̧tä̧, mo̧ro̧jä̧nä̧ kö̧rö̧, adihuä Tu̧ru̧hua̧rö̧ ku̧nä̧rä̧tö̧jä̧. Chutä tomenä, o'ca toi'önä yorätehuätöjä.
Diosrö esetätö surojöcu törohuäu huȩnȩ
10Jitämä chö̧jä̧hua̧tö̧, Dios ujurunä cuami 'qui'ächi'ätucui Tu̧ru̧hua̧rö̧ esetö. 11Ähuettä ucuturu suronä jȩo̧mȩnä̧, cuami 'qui'ächi'ö ka̧cuä̧tu̧cui̧, o'ca juiyönä Dios ucuturu iyinö ta'anö. 12Ujutumä ttö̧ja̧cu̧, ttidepä'inä, ttihue'quiyu'inä ku̧nä̧rä̧tö̧cu̧ rohuähuocotöjä. Pi̧jä̧ isoppanä suronä huȩ'ä̧rä̧tö̧cu̧ rohuähuätöjä. Ja̧'hua̧nö̧ pädomenä, pi̧jä̧ yo̧ö̧cu̧ cue'ächätörö ttujurunä huȩ'ä̧rä̧tö̧cu̧ rohuähuätöjä pä'ösä. 13Ja̧'hua̧nö̧ ja̧'a̧ttö̧ o'ca juiyönä Dios hueinö ȩmä̧tu̧cui̧, suronä 'cuäopomenä, suronä jȩcu̧'ä̧tu̧cuo̧ca̧'a̧nä̧, cuami 'quicuhuächi'ätucuäcua'a̧nö̧. 14Adiu 'quiyönä ka̧cuä̧tu̧cui̧. Ttäcä cureya ra̧'a̧ jä̧'i̧nö̧'a̧nö̧, iso päi'önä huȩnȩ ku̧nä̧rä̧tu̧cui̧. Ya̧tȩ su̧ro̧da̧u̧ i̧sa̧ amöcanä 'quiyö juäi ö̧'ca̧tä̧hua̧'a̧ jä̧'i̧nö̧'a̧nö̧, 'ca̧tä̧dä̧cuä̧huä̧tu̧cui̧ adiunä jȩä̧cuä̧huä̧. 15Ya̧tȩ su̧ro̧da̧u̧ i̧sa̧ ö̧jä̧pö̧ isä'ca u̧ju̧nä̧u̧'a̧nö̧ rohuäu i̧'cha̧ pä'ö, ucutu'inä ja̧'huä̧nö̧ jä̧'i̧nö̧'a̧nö̧ jo̧mȩ päi'önä Diosrö eseäcuähuä huȩnȩ jicuhuähuätucua pä'ö adicuätucui. 16'Po̧'a̧ri̧ doächi'a'acu ttu̧mö̧nä̧ 'quiyö juäi 'chu̧ttä̧ra̧'a̧ jä̧'i̧nö̧'a̧nö̧, adiu esetätucui ucutu'inä, o'ca juiyönä ähuettärö jarodi'ö cujuruhuätucuarö pä'ö. 17Ttunä cuähuächa'acu ttunä 'quiyö juäi ttu̧huä̧nähua'a jä̧'i̧nö̧'a̧nö̧, tta̧'ä̧rä̧cuä̧huä̧tu̧cui̧ ucutu'inä, suronä jȩttö̧ jȩpö̧ icu huȩnȩ esetö. Ja̧'hua̧ta̧nö̧ curodä ttȩpa̧'a̧ jä̧'i̧nö̧'a̧nö̧, ȩpä̧tu̧cui̧ ucutu'inä adihuä Dios i̧huȩnȩ Espíritu Santo iyä̧u̧. 18Espíritu Santo u̧huo̧juȩta̧'a̧nä̧, 'cuäopönä Diosrö jä'epö ucuocuätucui, o'ca juiyönä iyätucuacu pä'ö jäcuhue'ätucumä. Cuamöcuädätucu jaroi'äcuähuä juiyönä, adiu a̧mö̧cuä̧rö̧nö̧ ka̧cuä̧tu̧cui̧. Ja̧'hua̧ta̧nö̧ o'ca toi'önä Diosrö esetätörö amöcuädö, ucuocuätucui Diosrö. 19Ttörö'inä amöcuädö ucuocuätucui Diosrö, iyattö pä'ö i̧huȩnȩ chucuocuäcua'a̧nö̧. Ja̧'hua̧ta̧nö̧ yeähuä juiyönä chucuocuäcua'a̧nö̧ korotörö ttieru huȩnȩ, suronä jȩttö̧ jȩpö̧ icu huȩnȩ. 20Diosmä hueinäcusä ja̧u̧ huȩnȩ jidähua pä'ö. Ja̧'hua̧nö̧ ja̧u̧ huȩnȩ jidähua'attö, cärenä pö̧sä̧ jitämä. Ucuocuätucui Diosrö, pi̧yȩ huȩnȩ yeähuä juiyönä, Diosrö pä̧huä̧ rö̧jo̧mȩnä̧ jidähuäcua'a̧nö̧.
Röjinä teähuinö huȩnȩ
21Tö̧jä̧hua̧ Tíquico ujuturu adiu ppä'ädö Tu̧ru̧hua̧ i̧huȩnȩ taditomenä. Ja̧u̧tä̧ ji̧ä̧huä̧cua̧ ucuturu ttörö 'cuäopö'inä, o'ca juiyönä jȩchö̧'i̧nä̧. 22Ja̧'hua̧nö̧ ja̧'a̧ttö̧ ja̧u̧ru̧ hue'ösä ucuturu jiähua pä'ö, ujuturu cuä̧ju̧cuä̧tu̧cua̧ pä'ö. Ja̧'hua̧ta̧nö̧ ucuturu jiähuomenä, cuesehuätucua pä'ö ppädäcuotöjä.
23Tä'o Dioscu, Tu̧ru̧hua̧ Jesucristocu ucutu tö̧jä̧hua̧tö̧rö̧, adiu esetäcuähuä'inä, eseäcuähuä'inä, repeäcuähuä'inä ttiyäcua'a̧nö̧. 24Ja̧'hua̧ta̧nö̧ o'ca toi'önä Tu̧ru̧hua̧ Jesucristorö jarotti'oca'a repe'ätörö, Dios ppädäcua'a̧nö̧. Amén.
Currently Selected:
Efesios 6: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
