Filipenses 1
1
Pablo cärenä pä̧nö̧ huȩyu̧ti̧nö̧do iglesia ruhuärö Filipos ötahuiyänä
1Pablocu, Timoteocu, Jesucristocu aditätömä, pi̧yȩ cuyäru huȩyu̧tu̧ hue'ätöjä Dios i̧tti̧mö̧rö̧, Jesucristorö esetätörö'inä, iglesia tta̧huä̧rä̧cuä̧huä̧ ruhuärö'inä, diáconosrö'inä, Filipos ötahuiyänä ka̧cuä̧tö̧rö̧. 2Tä'o Dios'inä, Tu̧ru̧hua̧ Jesucristo'inä ucuturu adiu ppättädäcua'a̧nö̧. Ja̧'hua̧ta̧nö̧ adiu kä̧cuä̧huä̧'i̧nä̧ ucuturu ttiyäcua'a̧nö̧.
Pablo Diosrö esetätörö ucuocuinö huȩnȩ
3Koronö'inä ucuturu amöcuädö, eseunu ucuocusä Diosrö. 4Diosrö chucuocuomenä, 'cuäopönä eseunu jä'epösä ucuturu. 5Iso päi'önä äcuomenä cuesetinätucu mo̧ro̧ kä̧mä̧dö̧, jitä mo̧ro̧ päi'önä, ji̧nä̧ yo̧mȩtȩ Dios i̧huȩnȩ aditätöjä. 6Huo̧jua̧sä̧ Dios äcuomenä adihuä juäi aditinö cuami iso'quitucunä, ji̧nä̧ isocu aditö ppä̧dä̧cua̧ ucuturu rö̧ä̧chi̧'ö̧nä̧, Jesucristo ichä̧cuȩ mo̧ro̧ päi'önä. 7Ucuturu ja̧'hua̧nö̧ pä'ö chamöcuädöttömä, adihua'ado. Ucuturu chami iso'quinä eseunu amöcuädösä. Ujutumä ji̧nä̧ yo̧mȩtȩ adihuä juäi ȩmi̧nä̧tö̧jä̧, iso päi'önä huȩnȩ, ttö̧ja̧ suronä jȩttö̧ jȩpö̧ icu huȩnȩ, ji'äu cärenä chö̧'a̧'a̧nä̧'i̧nä̧, ja̧u̧ huȩnȩ cheseta'attö ttörö jä'epö ttä̧ju̧cua̧'a̧nä̧'i̧nä̧. 8Dios huo̧jua̧ ucuturu Jesucristo repeö'a̧nö̧, repe'ö pä̧huä̧ rö̧jä̧cu̧sä̧ ucuturu o'ca toi'önärö. 9Diosrö ucuocusä ucuturu juhua'a yabo rö̧ȩnä̧ repecuhuätucuäcua'a̧nö̧ korotörö. Ja̧'hua̧ta̧nö̧ rö̧ȩnä̧ huo̧ju̧nä̧ cu̧huo̧juä̧tu̧cuä̧cua̧'a̧nö̧ o'ca juiyönä. 10Ja̧'hua̧nö̧ huo̧jui̧pö̧ koro adiutä jȩcu̧'ä̧tu̧cuä̧cua̧'a̧nö̧. Ja̧'hua̧nö̧ ja̧'a̧ttö̧ adiu cu̧ja̧cuä̧cuo̧tö̧jä̧, koro juäi pättoca'anä ucuturu, Cristo ichä̧cuȩ mo̧ro̧ päi'omenä. 11Ja̧'hua̧nö̧ cu̧ja̧cuä̧tu̧cuo̧mȩnä̧, Jesucristo ppä̧dä̧cua̧ ucuturu adiutä jȩcu̧'ä̧tu̧cua̧ pä'ö, o'ca toi'önä Diosrö eseunu ttucuotarö pä'ö.
Pablomä Jesucristocu ö̧ja̧ päinö huȩnȩ
12Chö̧jä̧hua̧tö̧, cu̧huo̧juä̧tu̧cua̧ pä'ösä, o'ca juiyönä ttörö 'cuäopäjimä, ttö̧ja̧ suronä jȩttö̧ jȩpö̧ icu huȩnȩ jitähua pä'ö ppädina'a. 13Cristorö esetö cärenä chö̧'a̧'a̧mä̧ huo̧juä̧tö̧ o'ca toi'önä su̧ro̧da̧u̧, ru̧hua̧ ojusode tta̧'ä̧rä̧tö̧'i̧nä̧, pȩnȩ ka̧cuä̧tö̧'i̧nä̧. 14Ttörö, cärenä chö̧'a̧'a̧ topö, recuätö tö̧jä̧hua̧tö̧ Diosrö rö̧ä̧chi̧'ö̧nä̧ esetö, Jesucristorö tta̧'cua̧ huȩnä̧rö̧ yecuäcuähuä juiyönä ji'ähuätö Dios i̧huȩnȩ.
15Iso päi'önä korotö ttörö ra̧huä̧rö̧ a'cuoyäu ji'ähuätö Cristo i̧huȩnȩ. Korotö'inä iso päi'önä adiunätä ji'ähuätö. 16Ttörö ra̧huä̧rö̧ ji'ähuätömä, Cristo i̧huȩnȩ rohuähue'ö suronä amöcuädö ji'ähuätö. Jahuätömä cärenä chö̧'a̧'a̧nä̧, cha̧'cua̧ tta̧dȩcui̧ya̧tö̧ pä'ö ji'ähuätö. 17Korotömä ttörö repe'ö ji'ähuätö. Jahuätö huo̧juä̧tö̧ Dios i̧huȩnȩ rohuäu jidäu o'ca'a, cärenä chö̧'a̧'a̧mä̧. 18¿Tta̧'a̧nö̧ pä'ö? Huäinä ttucuocuä. Adiunä'inä ttucuocuttumä, a'cuoyäunu ttucuocuttumä, Cristo i̧huȩnȩ ucuocuätö. Ja̧'hua̧nö̧ ja̧'a̧ttö̧ ttucuocua'a eseusä.
Koronö'inä chȩsȩhuä̧cua̧sä̧. 19Ucutu ttörö Diosrö jä'epö cucuocuätucuomenä, Espíritu Santo'inä ppädomenä, adiu rä̧do̧pä̧cua̧sä̧ pä'ö, huo̧jua̧sä̧. 20Ttömä yoröiso dä'ä juiyönä chö̧ja̧ pä'ösä. Jitämä suronä 'cuädopa'anä, 'cuäopönä yecuäcuähuä juiyönä jidähua pä'ösä Cristo i̧huȩnȩ, jidähuinö ta'anö. Ja̧'hua̧ta̧nö̧ chö̧jö̧ttö̧'i̧nä̧, 'corupädi'öttö'inä, korotömä ttörö topö, Cristorö ttesehuäcuähua pä'ösä. 21Ttömä ji̧nä̧ chö̧jö̧ttö̧mä̧, Cristorö rö̧ä̧chi̧'ö̧nä̧ chesetäcua'a̧nö̧. Juhuorö'inä 'corupädi'öttömä, ji̧nä̧ isocu adihuäcua'a. 22Ja̧'hua̧nö̧ ja̧'a̧nä̧ ji̧nä̧ chö̧jö̧ttö̧mä̧, Tu̧ru̧hua̧ i̧huȩnȩ chaditö'a̧nö̧ ja̧'a̧. Ja̧'hua̧nö̧ ja̧'a̧nä̧ amöcuädäcuähuä jȩru̧pa̧sä̧. 23Todärenä chamöcuäda'anä, jȩru̧pa̧sä̧. Koromä 'corupädi'a pä'ösä, Cristocu chö̧ja̧ pä'ö. Juhua'acu pi̧jä̧nä̧ chö̧jö̧ttö̧ttö̧'i̧nä̧ abonänö juiyo adihua'a ttörö. 24Ja̧'hua̧nö̧ ja̧'a̧nä̧ ucuturu ppä'ädö ji̧nä̧ chö̧jö̧ttö̧mä̧, adihuajacusä. 25Ja̧'hua̧nö̧ ja̧'a̧ttö̧ iso päi'önä huo̧jua̧sä̧, ji̧nä̧ ucuturu ppä'ädö chö̧jä̧cua̧sä̧, ji̧nä̧ isocu rö̧ȩnä̧ esetö cuesehuätucua pä'ö. 26Ja̧'hua̧ ja̧'a̧ttö̧ cu̧ja̧cuä̧tu̧cuo̧mȩ ppa̧dä̧cho̧mȩnä̧, Cristo Jesúsnä cuesehuätucuaja ttörö.
27Ucutumä adiu ka̧cuä̧tu̧cui̧ 'cuäopönä, Cristo i̧huȩnȩ päö ta'anö. Ja̧'hua̧nö̧ cu̧ja̧cuä̧tu̧cuo̧mȩnä̧, ucuturu pä'äji ta'anö tochöttö'inä, tochö juiyöttö'inä, jittähua'a chä̧ju̧cua̧ pä'ösä ucuturu, adiu ji̧nä̧ yo̧mȩtȩ ttami 'qui'ächi'ö Dios i̧huȩnȩ esetö, adiu surojöcu rohuäu, ji'ähuätö pä'ö. 28Ja̧'hua̧ta̧nö̧ cuaboiyotörö yecuhuecuätucuoca'a cu̧jä̧tu̧cua̧'a̧ chä̧ju̧cua̧ pä'ösä. Ja̧'hua̧nö̧ yecuäcuähuä juiyönä cu̧ja̧cuä̧tu̧cuo̧mȩnä̧, cuaboiyotömä ttu̧huo̧juä̧cuä̧huä̧cuo̧tö̧, iso päi'önä ujutu betipächäcuotöjä pä'ö. Ja̧'hua̧ta̧nö̧ ttu̧huo̧juä̧cuo̧tö̧, iso päi'önä Dios ppä'ädö tta̧'ä̧rö̧ ucuturu. 29Ucutumä Cristorö cuesetätucuomenä, churu pä̧huä̧ rö̧jo̧mȩnä̧ esetötä esetocotöjä. Ubara'inä ttu'ätöjä ja̧u̧ru̧ esetö. 30Ucutucu, ttöcu ji̧nä̧ yo̧mȩtȩ surojöcu rohuähuätöjä. Pä'äjimä topinätöjä ttö chörohuähuinö. Jitä'inä ä̧ju̧cuä̧tö̧jä̧ ttö chörohuähua'a.
Currently Selected:
Filipenses 1: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
