Colosenses 3
3
1Iso päi'önä ucutumä Cristocu tto'ächinätöjä. Ja̧'hua̧nö̧ ja̧'a̧ttö̧ tö̧ä̧nä̧hua̧'a̧ jähuä, mo̧ro̧jä̧ jähuä, usätucui. Juhua'attö, mo̧ro̧jä̧ttö̧, Cristomä Dios u̧huo̧jua̧'a̧nä̧ pö̧. 2'Cuäopönä tö̧ä̧nä̧hua̧'a̧ jähuä, mo̧ro̧jä̧ jähuä, amöcuädätucui. Pi̧jä̧ jähuä cuamöcuädätucuä'. 3Ucutumä pi̧jä̧ jähuättömä Cristocu 'corupä'i'inätöjä. Ja̧'hua̧ta̧nö̧ Diosrö cuesetätucua'attö, Cristocu cua̧'cua̧rä̧tu̧cu̧ dajö icuinö. 4Iso päi'önä Cristotä ta̧'cua̧rö̧mä̧. Ja̧'hua̧nö̧ ja̧'a̧ttö̧ ja̧u̧ ichö uhuäpomenä, ucutu'inä ja̧u̧tä̧cu̧ cuhuäpäcuotöjä. Ja̧'hua̧ta̧nö̧ ja̧u̧cu̧ eseunu cu̧ja̧cuä̧cuo̧tö̧jä̧.
Pä'äji jȩti̧nö̧mä̧ jȩtö̧ juiyö'a̧nö̧ ja̧'a̧
5Pä'äji jähuä, pi̧jä̧ jähuä, jȩcu̧'i̧nä̧tu̧cu̧mä̧, jitämä amöcuädö jȩcu̧'ä̧tu̧cuä̧'. Ka̧ra̧ irecuarö suronä jȩcu̧'ä̧tu̧cuä̧'. Suronämä amöcuädö jȩcu̧'ä̧tu̧cuä̧'. Ucutuätä pä̧huä̧ rö̧jö̧tä̧ jȩcu̧'ä̧tu̧cuä̧'. Korotöttö'inä abonänö cu̧ju̧nä̧ra̧ pä'ö cuamöcuädätucuä'. Ttu̧mö̧nä̧ adicuä juäi pä̧huä̧ rö̧jö̧nä̧ tocu'ätucuä'. 6Ja̧u̧ juäi jȩpä̧tö̧rö̧, Diosrö jarode'ätörö, Dios rö̧ȩnä̧ ö̧tä̧bo̧tä̧cua̧. 7Ja̧'hua̧ta̧nö̧ ucutu'inä o'ca juiyönä ja̧u̧ juäi jȩpi̧nä̧tö̧jä̧ pä'äji, Cristorö cuesetätucu juiyäi. 8Ja̧'hua̧nö̧ ja̧'a̧nä̧ jitämä pi̧yȩ o'ca juiyönä jaropi'ätucui, ra̧huä̧rä̧cuä̧huä̧'i̧nä̧, suronä amöcuädäcuähuä'inä, surojö jȩä̧cuä̧huä̧'i̧nä̧ jaropi'ätucui. Cuänä suronä suräjuä huȩnȩ yoröiso cucuocuätucuä'. 9Yapareu cucuocuätucuä' korotö korotönö. Ucutumä täcö jaropi'inätöjä pä'äji jȩcu̧'i̧nä̧tu̧cu̧, Cristorö cuesetätucu juiyäi jȩcu̧'i̧nä̧tu̧cu̧mä̧. 10Jitämä ucutu jareönä amöcuädätöjä. Ja̧'hua̧nö̧ amöcuädö, Dios, ucuturu aditinömä juhua'a yabo rö̧ȩnä̧ u̧huo̧juȩtä̧cuo̧tö̧jä̧ chutä jö̧ ta'anö cu'ätucua pä'ö, ja̧u̧ru̧tä̧ adiunä cu̧huo̧juä̧tu̧cua̧rö̧ pä'ö. 11Jitämä o'ca toi'önä yorätehuätöjä Dios ä'ca jo̧mȩttö̧. Yoröiso toa'a judíos ttö̧ja̧ i̧sa̧'i̧nä̧, judíos huocö'inä, circuncidado hua̧'i̧nä̧, circuncidado huocö'inä. Ja̧'hua̧ta̧nö̧ ru̧hua̧cu̧ aditö'inä, aditocö'inä, kara'a ka̧cuä̧tö̧'i̧nä̧, o'ca toi'önä yorätehuätöjä. Iso päi'önä o'ca juiyönä ka̧'a̧ Cristonä. Ja̧'hua̧ta̧nö̧ Cristo o'ca toi'önärö kö̧.
12Dios ucuturu repe'ö huoinä̧u̧jä̧ i̧tti̧mö̧ cu'ätucua pä'ö. Ja̧'hua̧nö̧ ja̧'a̧ttö̧ korotörö re rö̧jö̧nä̧ topätucui. Adiu ucuotätucui o'ca toi'önärö. “Ka̧ra̧ttö̧'i̧nä̧ abonänö adihuä i̧sa̧sä̧” cuamöcuädätucuä'. Repe'önö jȩpö̧ ka̧cuä̧tu̧cui̧. Cuami 'qui'ächi'ö ka̧cuä̧tu̧cui̧. 13Korotörö cuami 'qui'ächi'önö ppä'ädätucui. Korotömä suronä jȩtto̧mȩnä̧ ucuturu, unichi'ätucui cu̧ra̧huä̧rä̧tu̧cuo̧ca̧'a̧. Cristo ucuturu suronä jȩcu̧'ä̧tu̧cu̧ unichi'inö ta'anö, unichi'ätucui korotörö. 14Ja̧'hua̧ta̧nö̧ koro juäittö'inä abonänö repe'ätucui korotörö, ji̧nä̧ yo̧mȩtȩ amöcuädö cu̧ja̧cuä̧tu̧cuä̧cua̧'a̧nö̧. 15Dios iyinö cuami iso'quitucunä eseäcuähuä. Ja̧u̧ eseäcuähuä hueäcua'a̧nö̧ cuami iso'quitucunä, ji̧nä̧ ji̧yȩtȩ huotö päcuhui'ätucua pä'ö Diosrö esetö, chutä hueinö ta'anö. Ja̧'hua̧nö̧ ja̧'a̧ttö̧ esehuätucui ja̧u̧ru̧.
16Ja̧'hua̧ta̧nö̧ Cristo i̧huȩnȩ cuami iso'quitucunä suhuädi'önä ka̧cuä̧tu̧cui̧. Ja̧u̧ huo̧jui̧cuä̧nä̧ huo̧juȩtö̧ ppä'ädätucui korotörö. Diosrö chutä adihuä i̧huȩnȩ ra̧huä̧huä̧, cuami iso'quitucunä eseunu ra̧'ä̧tu̧cui̧. 17O'ca juiyönä jȩcu̧'ä̧tu̧cu̧'i̧nä̧, cucuocuätucu'inä Tu̧ru̧hua̧ Jesucristo i̧mi̧nä̧ jȩpä̧tu̧cui̧. 'Cuäopönä ja̧u̧tä̧ i̧mi̧nä̧ esehuätucui Tä'o Diosrö.
Pa̧'a̧nö̧ jȩpä̧tu̧cui̧ Diosrö esetö kä̧nö̧
18Nä̧tö̧, adiu ä̧ju̧cuä̧tu̧cui̧ cuirecuo hueö, Cristo hueinö ta'anö churutä esetätörö. 19U̧mä̧tö̧, cuirecuarö repe'ätucui. Ra̧huä̧rö̧mä̧ tocu'ätucuä' cuirecuarö. 20Ppo̧'ä̧tö̧, cuä'o'inä, cua̧ju̧'i̧nä̧ o'ca juiyönä huettö jȩpä̧tu̧cui̧, Tu̧ru̧hua̧ Jesucristo esehuäcua'a̧nö̧ ucuturu. 21Cui̧tti̧mö̧ ku̧nä̧rä̧tö̧mä̧, cui̧tti̧mö̧ ttö̧ra̧huä̧rö̧nä̧mä̧ jȩcu̧'ä̧tu̧cuä̧', suronä ttamöcuäda'acu. 22Korotöcu aditätömä, pi̧jä̧nä̧ cu̧ru̧hua̧ hueömä, o'ca juiyönä jȩpä̧tu̧cui̧. Chutä tomenätä jȩcu̧'ä̧tu̧cuä̧', adiu amöcuädäcua'a̧nö̧ ucuturu. 'Cuäopönä cuami iso'quitucunä eseunu Diosrö ye'ecu jȩpä̧tu̧cui̧. 23O'ca juiyönä jȩcu̧'ä̧tu̧cumä̧, eseunu jȩpä̧tu̧cui̧, Tu̧ru̧hua̧ Cristorö amöcuädö, pi̧jä̧ ttö̧ja̧rö̧ cuamöcuädätucuoca'a. 24Iso päi'önä ucutu huo̧juä̧tö̧jä̧, Tu̧ru̧hua̧ i̧yä̧cua̧ ucuturu adihuä juäi u̧ju̧nä̧rö̧mä̧. Ucutumä Tu̧ru̧hua̧ Cristorö amöcuädö aditätöjä. Ja̧u̧mä̧ iso päi'önä Tu̧ru̧hua̧ päi'önä kö̧. 25Ja̧'hua̧nö̧ ja̧'a̧nä̧ suronä jȩpö̧mä̧, surojö jȩi̧nö̧ micuä päi'önä ȩmä̧cua̧ Tu̧ru̧hua̧ttö̧. Yoröiso Dios äca jo̧mȩttö̧ yorätehuätöjä o'ca toi'önä.
Currently Selected:
Colosenses 3: PIDNT86
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento en Piaroa © Sociedades Biblicas Unidas, 1986.
