Kaaroma 14
14
ONTOPORUA 14.
Eemkaro daakriste
1Korekeni omunenguni guomehiteero, inamu patacana omadiradiro giiri no giiri.
2Gumue a ruka ota vuru okurja atshitshe. Ngu a sa onge oha ri omboga ike.#14:2 Mpano Paulus ota popi aakriste mba ja ri nare aajuda. Ojo kua ja ruka je nokuguanica uo iipango jiiri no jiiri jaajuda.
3Keshe ngu ha ri, ina dine ngoka ka rja. Na keshe ngoka ka rja, ka pangure neji ngu ha ri, oshoka Karunga e mu tuumba.#14:3 Aakriste aajuda naakriste mba ja zi muupagani ja karacane naua nombiri, kaa patacane moru’eemkaro diiri no diiri di kadi notshironga motshipara tshehiteero.
4Ongueje re nduno, sho ua ara okupangura omupija ngu ke shi guohe? Okucikama nokugua kue oku ri pu muene gue. Nde ta kara ta cikama, oshoka Karunga oku neenkondo doku mu kareka omucika.#14:4 Paulus ota popi aakriste aajuda. Jo kaa neenkondo dokupangura neji aakriste jarue, mba itaa guanica iipango jaajuda jonare.
5Gumue ta joorora omasiku, meendunge da mukuauo omasiku ageshe oga facana. Keshe na kare a kora momeere ge.#14:5 Nge tsha tsa piinima iitshona mbi kaji notshironga meklesia.
6Ngu ta joorora omasiku, ote ga joororere Muene. Ngu ta ri ota rire Muene, oshoka ta amberere Karunga. Na ngu ka rja, ita ri morua Muene, nde ota amberere Karunga.
7Oshoka kaku na ngoka mokati keni t’ikarere nomuenjo, he muene, ko kaku na ngoka t’isire he muene.
8Oshoka nge atu kara nomuenjo, ss’atu karere Muene omuenjo. Nde nge atu si, otatu sire Muene. Okukara nomuenjo nokusa kuetu oku ri mu Muene.
9Opo Kristus a zi okusa nokujumuka, opo a pangere aasi naanamuenjo.
10Ngueje oto pangura omumuanjoko otshike? Ngueje oto dini omumuanjoko morua tshee? Ss’atushe atu ka cikama potshipangerapundi tsha Karunga.
11Ngashi tsha tja: “Otshiri, ngashi ngaje ndi nomuenjo, Muene ta ti, ajeshe je nokutsirandje eengoro, rjo eraka keshe ri nokuamberera Karunga.”#14:11 (Is 45:24)
12Otsho keshe tuu mokati ketu ota ka purua ku Karunga iinima je muene.
13Ano, inatu panguracana neji ue, aaue, kotokeni kamu ningire omumuanjoko otshinima tshokupundukica.
14Ondi tshi tshi tshiri tshiri mu Muene, Jesus nokutja kaku notshinima tsha njata kuurunde mutsho tshene, aaue, otatshi njateke ouara nuurunde ngoka ike e tshi tara ng’otshinima tshuurunde.#14:14 Paulus ota popi itsheue iinima iitshona jomiipango jaajuda. Jamue jaakriste aajuda je ji tara meemuenjo dauo ng’iinima j’indikua. Ndere aakriste mba ja zi muupagani inaa dimburura uuhineji miinima mbi.
15Nge to nikic’omumuanjoko uupongo niikurja johe, ito ende ue mondjira hohore. Niikurja johe ino fara mekano ngoka Kristus e mu sire.#14:15 Paulus ta kumagida aakriste mba ja zi muupagani, jo kaa ninge tsha miipaci jaakriste aajuda, sho tsha fa uuhineji meendunge dauo.
16Inamu gandja uuhanaua uetu komatsheko.#14:16 Ehiteero rjotshikriste.
17Oshoka otshirongo tsha Karunga katshi shi okurja nokunua, aaue, uujuki nombiri nenjanju m’Ombepo Ondjapuki.
18Keshe ngu ta karere Kristus miinima mbika, ohe oku’oparera Karunga, naantu oje mu panda.
19Diginineni ano shoka tsh’oparera ombiri, nde mokukaracana kuetu sse otua ara tu korekacane.
20Ino shanagura otshironga tsha Karunga moru’iikurja. Atshishe otsha jera tshiri. Ndere oku nondjo ngu ta ri nde ta pundukica.
21Otshaanaua tshiri nge ito ri onjama, ngueje ito nu omavinju, nge ito ningi tsha, shoka tatshi vuru okugejica nokupundukica omumuanjoko noku mu rimbiririca.#14:21 Aajuda kaja ri haa ri onjama jo kaja ri haa nu omavinju ga randua pondando haapagani, oshoka iinima mbi okua haji zi orundji meendjugo diikarunga jaapagani.
22Kara nehuvo ehanaua motshipara tsha Karunga. Omunerago keshe ngu ke na tsha tshokuipa eembedi miinima mbi a tara ja f’iihanaua.
23Ndere keshe ngu a rimbirirua pokurja, oku’ipa ondjo nokuri, oshoka ke nehuvo ehanaua rjomutima. Ondjo tshiri atshishe shi inatshi za mehuvo ehanaua rjomutima.
Omission Heklesia Ekatolika, 1951. Namibian Catholic Bishops Conference.