Kaaroma 13
13
ONTOPORUA 13.
Eemkaro daakriste
1Keshe gumue na vurike keenkondo daapangeri, oshoka kapu nepangero, ndi inari za mu Karunga. Aapangeri oja turua po ku Karunga.
2Otsho ano, keshe ngu ta tindi okuvurika keenkondo daapangeri, oha dini ehuco rja Karunga. Ndere ajeshe mba haa ri dini, ohaa himonica ekano.
3Aapangeri kaa tirica mboka haa rongo uuhanaua, aaue, ombo haa rongo uuhineji. Nge ino ara okutira eenkondo daapangeri, ronga nduno uuhanaua, ngueje to ka pandua ku jo.
4Ojo aakareri ja Karunga koruporo ruohe. Ndere nge to rongo uuhineji, ngueje u nokutira. Kaa zara ouara egongamuere,#13:4 Oje ri zara ng’edidiriko rjeenkondo dauo dokutokora no dokugeera. oshoka ojo aakareri ja Karunga, aageeri jokugeera, mba ja jona.
5Ano omu notshipango tshokuvurika, ha moru’egeero ike, aaue, no moru’ehuvo rjomutima.#13:5 Moru’eharo rja Karunga.
6Otsho ano ne hamu fendere uo, oshoka ojo omarenga ga Karunga mejakuro ndi.
7Peni ajeshe shoka je nokupeua, efendero rjotshirongo, ngu e noku ri peua, efendero rjongamba#13:7 Efendero ndi ari fendericua orundji koveta pokutokora ongamba hotshirongo. ngoka e noku ri peua, etiro ngu e nokutirua, esimano ngu e nokusimanekua.
8Inamu kara mu nonkuma homuntu, eenkuma dokuoracana odo ike, oshoka keshe ngoka e hore mukuauo, ohe a guanica ompango.
9Oshoka iipango mbika: Ino ondera, ino dipaga, ino jaka, ino rundira, ino aruka, notshipango otshikuauo keshe, oja kuaterua motshipango shika: Hora mukueni, ngashi u’ihore muene.
10Ohore kahi ningire mukuauo uuhineji nando oua tsha. Otsho uo ohore oho eguanico rjompango.
11Ano rongeni nokudimburura naua enongero rjecimbo, nokutja ostunde ha cikana mu penduke meemposi, oshoka ehupico rjetu ori ri popepi nasse ngashingika ri vure rjonare, ngija tua shimbika okuiteera.#13:11 Nena sse otu nokuirongekidira oshenda ha Karunga niironga jetu iihanaua, oshoka nena sho tua ningi aakriste, oshenda ndji ohi ri popepi nasse. Oha ri kokure nasse nare, ngija tua ri muupagani. Keendunge daafatururi jamue, mpano Paulus ota popi uo ejo rja Jesus omupanguri.
12Uusiku ua kuka, nomutenja ogu ri popepi. Tu ishureni ano iironga jeemrema, tu omateni onjo hiikuti juujerere.
13Tu kareni ano neemkaro eemhanaua, ng’omutenja, ha muufukedi uiituci, no muukorue, ha momahondero no muuhineji uoshoni, ha meendjuma no mokasheshe.
14Zareni Muene Jesus Kristus, nonjama heni inamu hi ukica kokaaru.
Omission Heklesia Ekatolika, 1951. Namibian Catholic Bishops Conference.