Kaaroma 12
12
ONTOPORUA 12.
Omakumgido.
1Otsho ano jamuameme, andi mu kumagidire esiroshenda rja Karunga, ne mu gandje omarutu geni ng’oshura ondjapuki, hi nomuenjo, ho h’oparera Karunga, erongerokarunga rjeni ri ningue neendunge.#12:1 Aajuda kua haa dipaga ouara eengombe neenzi, ja ara kuamberera Karunga neeshura di, manka eemuenjo dauo da ri orundji kokure na Karunga. Merongerokarunga ndika kamu neendunge. Sse aakriste natu pe Karunga omarutu getu ng’oshura hetu, nokutja natu japure omarutu getu niironga iihanaua nokukerera ku go uurunde nuuhineji.
2Inamu fa uujuni uongashingi, aaue, tshitukeni ne jene, ne mu kare nomadiradiro omape, opo mu konakone eharo rja Karunga nokutja orini, na shoka otshaanaua tsh’oparerera, sho tsha pua.
3Oshoka ngaje andi mu rombuere amushe meenkondo doshenda ndji nda peua, kamu idiradire kombanda ha sho tshe mu ereka, mu kembadare okuidiradira mehitshonopeko, oshempa tuu ngoka pamucika guehiteero#12:3 Mpano Paulus ota popi omagano giiri no giiri gehiteero, nga aakriste jotango ja peua orundji pokutuumba esakramente rjekoreko. Keshe na ronge shoka a hicanenua megano rje. ndjoka a peua ku Karunga.
4Ngashika tu na morutu rumue iikuarutu ojindji, jo iikuarutu kaji notshironga tshimue.
5Otsho uo nasse atushe orutu rumue mu Kristus, nde mokukaracana kuetu osse iikuarutu.#12:5 Aakriste ajeshe kumue oja f’orutu rumue meklesia. Jesus Kristus omutse guarjo. Ano aakriste ajeshe gumue koogumue ojo iikuarutu.
6Moru’oshenda ndji tua peua, ss’otu na omagano giiri no giiri. Ngu e na ndioka, rjuuprofeti, na ronge uo pehiteero.
7Nge e nejakuro,#12:7 Ejakuro rjomeklesia. na kare mejakuro rje. Nenge ngoka ta rongo, na kare omudiginini mokuronga.
8Omukumagidi na diginine mokukumagida. Nge ha kuaca eehepere, ne tshi ninge nomutima omuhanaua. Ngu a ning’omukuruntu, ka kare nuuheci. Ngu ha jeerere, a kare nombepo henjanju.
9Ohore kahi kare nekojuko. Tondeni uuhineji, dameni muuhanaua.
10Horacaneni nohore huumuahina.#12:10 Osse aana ja Karunga. Ndere ong’aana ja Karunga, sse tua f’aamuahina. Tsakaneneni mokupacana osima.
11Inamu vurua merama rjeni. Kareni nomuenjo gua sama. Karereni Muene.
12Njanjukueni metegerero, ididimikeni muudigu, diginineni omagarikano.
13Kuacereni aajapuki#12:13 Aakuauo jomehiteero. meendjepo dauo. Edirireni aahenda.
14Jambekeni aatidi jeni, jambekeni inamu tuka.
15Njanjukueni puamue na mboka je ri menjanju, rireni naariri.
16Karacaneni mua tsompangera himue. Inamu kondjera iinima iinene, aaue, kareni mua guana na mbjoka iishupi. Inamu itara mua f’aanandunge.
17Inamu garurira nande omuntu uuhineji ue. Diginineni uuhanaua, ha motshipara tsha Karunga ike, no miipaci jaantu uo.
18Nge tatshi vurika kareni nombiri naantu ajeshe.
19Jahorike, ne jene inamu garurira nande omuntu uuhineji ue, ndere peni ondjashi ha Karunga ompito, ngashi tsha tshangua: “Okugeera okuo otshironga tshandje. Ongaje tandi futica. Muene ta ti.”#12:19 (5 Moses 32:35)
20Ndere omutondi guohe, nge a sondjara, mu turira po, nenge nge a senota, mu pa a nue, oshoka nge to ningi ngii, oto mu gongere komutse gue omakara ga sama.#12:20 Oto mu monica ehamo rjoshoni, ngueje to rundurura shira omadiradiro ge.
21Ino sindua kuuhineji, aaue, ongueje sinda uuhineji kuuhanaua.#12:21 Ongashi tsha tshangua metumburiro 20.
Omission Heklesia Ekatolika, 1951. Namibian Catholic Bishops Conference.