Iironga 5
5
ONTOPORUA 5.
Ananias na Safira. Aapostoli otaa geerua
1Omurumentu guontumba haku tiua Ananias puamue nomukiintu gue Safira okua randa po epja.
2Ndere iimariva jimue jepja te j’oreke. Omukiintu na he okua e tshi tshi. Okua fara otshitoporua tshimue tsha mbi, te ke tshi tura keempadi daapostoli.#5:2 Ananias okua jona sho a horeka iimariva jimue moru’omukona, nanto a hara a f’omuntu ngu a gandja atshishetshishe, ngashi jakuauo ja ninga.
3Ndere Petrus ta ti: “Ananias, otshike nduno omusatana a makera omutima guohe u tshendjereke Ombepo Ondjapuki nokuoreka iimariva jimue jepja?.
4Ka rja ri rjohe ngija inari randua po. Na shi rja randua po, eriko ha ngueje kua to ri uca? Otshike ano ua tura momuenjo guohe u ronge ngaano? Aantu ino tshendjereke, aaue, oua tshendjereka Karunga.”
5Ananias, sho a huva eehapu dika, oku’ishata pevi, ta si. Ndere ajeshe mba je tsh’uva, oja kuatua ketiro enene.
6Ndere aarumentu aanjasha oja cikama, ja kuca omudimba gue, taje gu fara pondje, je ke gu fumbike.
7Ndere okuza perara rjeestunde ndatu, omukiintu gue e ja mo, he ina tshiua, shi tsha ningua po.
8Petrus e mu pura a ti: “Rombuerandje mukiintu, epja rjeni omue ri randa po tuu iimariva mbi?” He ta ti: “Eno, ojo mbjo.”
9Ndere Petrus te mu rombuere: “Otshike mu’uvacanene mu shinde Ombepo ha Muene? Tara eempadi da mboka ja ka fumbikire omurumentu guohe, odi ri potsheero, na jo uo otaa ke ku fara pondje.”
10Naanzija oku’ishata pevi keempadi de, nde ta si. Aarumentu aanjasha, sho je ja mo, oje mu ada a sa nare. Oje mu fara pondje, taa ke mu fumbika posha homurumentu gue.
11Ndere etiro enene orja kuata eklesia arishe, najeshe mba je tshi uva.
12Komake gaapostoli kua ningua omadidiriko niironga iinjengandunge ojindji mokati kaantu. Jo ajeshe#5:12 Okutja huno aapostoli ajeshe. oja ri nediradiro rimue, kua haa gongarere momukara gua Salomon.
13Jakuauo ajeshe#5:13 Aahiteeri aakuauo oja tira aakuruntu jaajuda. oja tira okugama huno ku jo. Ongashi aantu ajeshe oja kara je ja tunda.
14Ongundu haarumentu no haakiintu, mba j’iteera Muene oha tana kesh’uuna, ha ningi oneenene.
15Oja tura aavu muuhanda, taje ja rangeke keentara no komarutara, opo pokupitirira kua Petrus omuzizimbe gue gu njenge gumue, he a herudue kuuvu ue.
16Naantu jomiirando jomuutshiinda ua Jerusalem oje ja uo j’eta aavu na mboka j’epekua keembepo da njata. Ajeshe oj’erudua.
17Nena omupristeri omukuruntu okua cikama najeshe mba ja gama ku he, okutja otshimpaga tshaasadukaji, oj’udirira uukodi.
18Oja kuatica aapostoli, nde jo taje j’edirire mondrongo hotshirando.
19Tapu ja nduno omujengeli gua Muene, t’egurura uusiku iijeero jondrongo, nde te ja piica mo nokua ti:
20“Indeni, mu ka he motempeli noku okororera aantu eehapu adishe domuenjo nguka.”#5:20 Eehapu domuenjo guotshiri odo eehapu devangelium.
21Sho je di uvu, oja hi motempeli ongura onene, nde taa rongo aantu. Ndere omupristeri omukuruntu nongundu he oje ja, ja shija otshigongi otshinene tshaajuda naakuruntu ajeshe jaana j’Israel. Taa tumu kondrongo, ja ka tarue ko.
22Ndere aajakuri jetokoro, sho je ja, j’egurura ondrongo, inaje ja mona, oja garuka no je ke tshi okorora.
23Oja ti: “Ondrongo otue hi ada, h’edirua naanaa tshiri, aarangeri ja cikama piijeero. Nde sho tue hi egurura, inatu mono mo nand’omuntu gumue.”
24Omukuruntu guaarangeri jotempeli naapristeri aakuruntu, sho je di uvu, oja rimbirirua, kaa tshi shoka tatshi ningua.
25Tapu ja gumue e ja mo, te ja rombuere: “Tareni, aarumentu mboka kua mua tura mondrongo, oja cikama motempeli, taa rong’aantu.”
26Opo nduno omukuruntu guaarangeri a hi puamue naajakuri jetokoro, e ke ja tara. Ndere inaje ja ciminika neji, oshoka j’ijageka nokutja taa dipagua kaantu nomamanja.
27Oje ja eta nduno, taje ja tura motshigongi tshaakuruntu. He omupristeri omukuruntu ote ja pura.
28A ti: “Inatu mu indika nani okuronga komesho aantu edina ndika! Tareni ano nduno, Jerusalem atshishe mue tsh’uda eehapu deni, no mua ara mu tsike ombinzi homurumentu ngu kombanda hetu.”#5:28 Okutja: Omua ara oku tu pa ondjo mokudipagua kua Jesus.
29Ndere Petrus naapostoli jakuauo oja jamukura ja ti: “Okuvurika ku Karunga oku vure okuvurika kaantu.
30Karunga kootate okua jumuda Jesus, nguka mua tsirika komuti, no mue mu dipaga.
31Ngu Karunga a renga korurjo rue, a ninga omureri h’omukuriri, opo a pe Israel ehidirururo nediminopo rjeendjo.
32Osse eentari diironga mbi ajishe, n’Ombepo Ondjapuke uo, ndji Karunga a pa ajeshe, mba haa vurika ku he.”
33Sho j’uvu doka, oja ruruma meemuenjo dauo, ja ara oku ja dipaga.
34Nena motshigongi tshaakuruntu tamu cikama omufarisaji, edina rje Gamaliel, omurongimpango, nakusimanekua paantu ajeshe, a popja nokutja aarumentu mboka naa farue manka pondje.
35Ongashi a ti: “Jarumentu ne aaisraeli, idiradireni naua sho mua ara okuningira aarumentu mbaka.
36Monare Teodas okua cikamene a tire: ohe omutshiketshike. Ndere ongundu haarumentu omacere gane ahi mu randura. Okua dipagua. Ndere ajeshe mba je mu iteera, oja sharakanicua nde taa manua po.
37Okuza mpoka Judas t’oroka omugalilea momasiku gokujarura aantu.#5:37 Ejaruro ndika orja ri eemvo 6 kokuza kokuvarua kua Jesus. T’ogorora aantu ojendji je mu randure. Na nguka a jonua po, jo ajeshejeshe mba kua j’igameka ku he, ja sharakanicua.
38Ngashingika ngaje andi mu rombuere, inamu ihepica naantu mboka, j’eceni ouara, oshoka ehuvacano nenge otshironga shika nge otsha za kaantu, otatshi ka tompoka.
39Ndere nani, nge otsha za ku Karunga, itamu tshi tompora. Kotokeni, kamu fe aantu, mba taa ru na Karunga muene.” Eehapu dono oje di panda.
40Taj’icana mo aapostoli, nde taa ja dengica neengora, oje j’indike okuza mpoka okupopja medina rja Jesus, nde taa ja rareke.
41Jo ja zi mo motshigongi tshaakuruntu, oja njanjukua oshoka ja ri j’opara okutshekerua edina rja Jesus.
42Inaa heca okuronga keshe esiku motempeli no meendjugo nokuuvica Jesus Kristus.
Omission Heklesia Ekatolika, 1951. Namibian Catholic Bishops Conference.