Iironga 4
4
ONTOPORUA 4.
Aapostoli taa purua kaapristeri aakuruntu
1Manka taa huvicire ngaano aantu, aapristeri nomukuruntu guaarangeri jotempeli naasadukaji#4:1 Aasadukeji ojo otshimpaga tshaajuda, mbaa inaa hiteera ejumuko rjaasi. oje ja ku jo.
2Ja geja shoka ja rong’aantu, j’uvica ejumuko rjaasi ndi rjomu Jesus.
3Oje ja kuata, je j’edirire mondrongo sigo okesiku rja nofu, oshoka oha ri onguroshi nokuri.
4Ojendji jomumboka j’uvu eehapu, oja ning’aahiteeri. Guo omujaru guaarumentu agu ada komajovi gatano.
5Ongura ha nofu, omarenga naakuruntu naanongoramata oja gongara mu Jerusalem.
6Otsho tuu omupristeri omukuruntu Annas puamue na Kaifas na Johannes na Aleksander, najeshe mba jomezimo rjaapristeri aakuruntu.
7Oje ja cikameke mokati kauo, nde taa ja pura: “Shika omue tshi ronga meenkondo dini no medina rjare?”#4:7 Petrus na Johannes, kua ja kucua mondrongo, ja cikama nena motshigongi.
8Nena Petrus a hud’Ombepo Ondjapuki, nde te ja rombuere: “Marenga ne, na ne jakuruntu jotshirongo!
9Nge tatu purua nena otshironga shika otshaanaua, shi tsha ningirua omurumentu ngu otshirema, shi tshe mu eruda.
10Ne amushe notshinguana atshishe tsha Israel, kareni, mu tshi tshi: Medina rja Jesus Kristus omunatsaret, ngo mua arera komutshigakano, nde Karunga e mu jumuda kuusi, ano omoru’edina rja Jesus omurumentu ngo a cikama miipaci jeni, a heruka.
11Ohe emanja ndjoka, ne aatungi mu’ekerashi, ndere orja ningi emanja rjopotshikororo.
12Omu he ike omu nehupico, oshoka kaku nedina rirue koshi heguru, rj’ororerua aantu, tu upicirue murjo.”
13Ndere, sho ja mon’uufure ua Petrus no ua Johannes, jo je tshi nokutja kaje shi aantu mba ja rongua, jo kaje shi aanongo, oja rurirua, no je ja dimburura nokutja oja ri pu Jesus.
14Taa tara uo komuntu, ngu a herudua, a cikama pu jo. Inaa vura oku tshi patana.
15Oje ja rombuere, ja ze mo manka motshigongi, manka jo taa kundacana.
16Ongashi ja ti: “Aantu mboka otatu ja ningi ngiini? Otshironga otshinjengandunge, shi tsha ningua ku jo, otshi ri porueera, sse itatu vuru oku tshi patana.
17Ndere katshi taandericue ue apeshepeshe mokati kaantu ajeshe, tu ja gandeni neenkondo, kaa popje ue nande okomuntu gumue medina ndi.”
18Oje ja icana mo, je ja rombuere, kaa popje nenge kaa ronge ue medina rja Jesus nande okatshona.
19Ndere Petrus na Johannes oje ja jamukura ja ti: “Nge otsh’uka tuu motshipara tsha Karunga okuvurika ku ne ku vure okuvurika ku Karunga, shino tshi tokoreni ne jene.
20Sse itatu vuru okukara tua muena ouara, katu okorore shi tua mona na shi tua uva, atshi tu njenge.”
21Oje ja ganda nomagandambadi, je ja rareka, oshoka inaa mon’ondjira hoku ja geera moru’aantu. Ajeshejeshe oj’okorora nomaamberero otshironga shika tsha ningua.
22Oshoka omurumentu ngu a ningirua otshironga shika otshinjengandunge tsheherudo okua ri nokuri neemvo di vure eemrongo ine muukoke.
23Ano sho ja rarekua, oje ja kaandjauo, nde taj’okorora eehapu adishe, di ja rombuerua kaapristeri aakuruntu no kaakuruntu jotshirongo.
24Nde mboka, sho je di uvu, oja jeruca ng’omuntu gumue eui rjauo ku Karunga ja ti: “Muene ngueje Okarunga ngu ua tshita eguru nevi nefuta natshishe shoka tshi ri mo.
25Ngu ua popi m’Ombepo Ondjapuki mokana ka tate David omupija guohe ua ti: ‘Aapagani oja ndumbakanene tshike, jo iiguana otaj’idiradira tshee ngaano?
26Naakuaniirua jevi ohaa cikama nomarenga taa gongara kumue, nde taa ts’ondumbo na Muene n’Omuguajekua gue!
27Oja gongarere tshiri motshirando shika, jo taa ts’ondumbo n’Omumohe omujapuki Jesus, ngu ua guajeka, Herodes na Pontius Pilatus puamue naapagani niiguana ja Israel,
28ja ninge, shoka eke rjohe neharo rjohe rj’uca nare tshi ningue.
29Tara Muene eehapu dauo domagandambadi, ngueje u pe aamati johe okupopja nehinekero eehapu dohe.
30Ngueje u jeruce eke rjohe okueruda aavu, u ninge omadidiriko niironga iinjengandunge medina rj’Omumohe omujapuki Jesus.”
31Manka ja garikana, eshara ndjoka ja gongarere, orja kekama, ndere ajeshe taj’udua Ombepo Ondjapuki, taa popi nuufure ohapu ha Karunga.
32Mongundu haahiteeri ajeshe omua ri omutima gumue nomuenjo gumue. Nde mo kamua ri nand’ogumue, a tara iinima je ng’eriko rje muene, aaue, oshoka iinima jauo ajishe oja ri mumue.#4:32 Okutja opu nomukuriri nomuhupici gumuike. Jesus Kristus.
33Aapostoli oj’okorora ejumuko rja Jesus Kristus Muene guetu neenkondo odindji. Oshenda ohindji oha ri pu jo ajeshe.
34Nde mokati kauo kamua ri omukuanaruepo. Ajeshe mba ja ri nomapja nenge neendjugo oje di randa po, rjo eriko rjotshirandua taa ri fara.
35Je ri tura keempadi daapostoli. Nde keshe gumue ta peua tshi cike peempumbue de.
36Na Johannes uo, ngu a rukua kaapostoli Barnabas, okutja omuna guehekererico, omuleviti,#4:36 Okutja, omuntu guomezimo rja Levi. Okua ri omukareri guomotempeli. a varerua mu Kipro,
37okua randa po uo epja rje, ndi e ri na, jo iimariva te ji fara e ke ji tura keempadi daapostoli.
Omission Heklesia Ekatolika, 1951. Namibian Catholic Bishops Conference.