Iironga 16
16
ONTOPORUA 16.
Paulus ta hi kehuvico rjeehapu da Karunga orutijari puamue na Silas
1Okue ja uo ku Derbe no ku Listra. Moka omua ri omurongua, edina rje Timoteus, omuna guomukiintu omuhiteeri omujuda, ndere she okua ri omupagani.
2Aaronga jakuauo, mba ja ri mu Listra no mu Ikonium, oje mu popi naua.
3Paulus okue mu ara a hende puamue na he. E mu kuca nde te mu fukareke moru’aajuda,#16:3 Keharo rja Paulus, Timoteus na ninge uo omurongi gueehapu da Karunga mokati kaapagani no kaajuda. Ndere aajuda okua ja dina jakuauo mba inaa fukarekua. Otsho Timoteus a fukarekua uo keharo rjomuapostoli Paulus, opo a mone uo omakutsi gaajuda pokuuvica eehapu dekuriro. mba ja ri miirando mbika, oshoka ajeshe okua je tshi tshi nokutja she omupagani.
4Sho j’endagura iirando, oje ja rombuere, ja diginine iipango mbi ja arika kaapostoli no kaakuruntu jomu Jerusalem.
5Omagongaro oga korekua mehiteero, omujaru guauo ogua koko keshe esiku.
6Oja tokora Frigia, ja piti mu Galatia, oshoka ja kererua k’Ombepo Ondjapuki okuuvica ohapu ha Karunga mu Asia.#16:6 Asia shi tatshi popiua mpano katshi shi etendero enene ndika rjevi rjetu, aaue, okarongo okatshona ko popepi na Frigia.
7Sho j’ende ruo ku Misia, oja kembadara uo okuha ku Bitinia. Ndere Ombepo ha Jesus inahi ja pitikira.
8Ndere sho ja pitirire Misia, oje ja ku Troas.#16:8 Troas otshirando shi tshi ri popepi nefuta.
9Huno Paulus a mono emoniko uusiku: Omurumentu omumakedonia a cikama he te mu indire ta ti: “Tokora, ngueje u je ku Makedonia, u je u tu kuace.”#16:9 Makedonia otshirongo tshi ri handiajaka hefuta.
10Sho a mono emoniko ndika, sse otua kongo ompito hokuha nzija ku Makedonia, oshoka kapua ri ue omarimbiriro nokutja Karunga okue tu icanene ko sse tu ke ja uvicire evangelium.
11Otua rondo etembameja, tua zi mu Troas, tua ukirira ruo ku Samotrake, nde tue ja ku Neapolis esiku rja nofu.
12Okuza mpoka otue ja ku Filippi, otshirando otshinene tsho tshotango motshitoporua shika tsha Makedonia, sho otshitembukirua tshaaroma. Motshirando shika sse tua ningi mo omasiku gamue, tua kundacana naantu.
13Mesiku rjesabati otua piti potsheero tshotshirando, nde tua hi komuronga. Eshara rjokugarikana orja fa rja ri po. Otua kaatumba, sse tua popja naakiintu, mba ja gongarere.
14Omukiintu gumue, edina rje Lidia, omutshingici gueenguuo eentirigane a zi ku Tiatira, h’onakutirakarunga, okua puakene. Karunga oku’egurura omuenjo gue, he a diginine doka da rombuerua ku Paulus.
15Sho a tshatshua, he muene puamue najeshe jomondjugo he oku’indire ta ti: “Nge tamu tengenekendje ng’omudiginini gua Muene, ireni nduno mondjugo handje, ne mu kare mo.” Okue tu ciminike.
16Nde pua ningi, sho tua hi keshara rjomagarikano, omupija omukadona okue tu tshakaneke, ngu a ri nombepo hokushunganeka.#16:16 Ombepo ndji oha ri ombepo ombuineji. Paulus okue hi tida mo. H’okua rongere oojene je eriko enene nokushunganeka kue.
17He okua ramba Paulus nasse uo, t’igida ta ti: “Aantu mboka ojo aapija ja Karunga guomombandabanda, nde otaje mu uvicire ondjira hehupico.”
18Shino okue tshi ningi omasiku ogendji. Ndere Paulus okue tshi kenjanana, ta punguruka nde ta rombuere ombepo: “Otii ku rombuere medina rja Jesus Kristus, u ze mo mu he.” Ho ha zi mo mostunde tuu ndjika.
19Ndere oojene, sho ja mono nokutja etegerero rjeriko rjauo rja za mo, oja kuata Paulus na Silas, je ja fara kotshirandero, komarenga.
20Taje ja tura miipaci jaapanguri ja ti: “Aantu mboka otaa pijaganica otshirando tshetu, jo aajuda.
21Otaa huvica eemkaro di kadi vura okutuumbua kusse noku di orera, oshoka sse aaroma.”
22Nena aantu oje ja sire ondjashi. Aapangeri oja tuurica eenguuo dauo, jo taa dengua niitago.
23Sho je ja denge omadengo ogendji, oje j’umbire mondrongo, nde taa rombuere omurangeri guondrongo, e ja rangere naua.
24Ngoka, sho a rombuerua ngaano, okue j’edirira mo mondrongo homenimeni, nde he te ja tura meti.
25Ndere pokati kuusiku Paulus na Silas oja garikana, j’amberera Karunga. Aakuatua ajeshe oje j’uvu.
26Naanzija ekekamo edigu rjevi orja tukuruka, rja kekamica eemkanka dondrongo. Opo mpoka iijeero ajishe j’eguruka, nd’omapando gajeshe ga dituruka.
27Omurangeri guondrongo, sho a papuduka, nde ta mono iijeero jondrongo j’eguruka, okua pueja mo egongamuere nokua ara okuidipaga, oshoka a ri e tshi nokutja aakuatua oj’ijaka mo.
28Nena Paulus oku’igida muure a ti: “Ino iningira uuhineji! Sse atushe omo tu ri.”
29He oku’indire omuriro nokua hi mo. He ta kekama unene, t’ishata po keempadi da Paulus no da Silas.
30Ote ja fara pondje he ta ti: “Oojene, ondi nokuninga tshee ndi upicue?”
31Jo ja ti: “Iteera Muene Jesus, oto ka upicua, ngueje muene, nondjugo hohe ahishe.”
32Oje mu rombuera ohapu ha Muene no ku ajeshe mba ja ri mondjugo he.
33Te ja kuca mostunde ndjika huusiku, nde te ja kosho omadidimika guauo. Ongashi nduno a tshatshua puamue najeshe jomondjugo he.
34Nde sho e ja farere mondjugo he, okue j’etere iikurja nde ta njanjukirua he muene najeshe jomondjugo he, sho ja ningi aahiteeri ja Karunga.
35Sho kua tshi, aapangeri jotshirando oja tumu aajakuri jetokoro neehapu di: “Aantu mbejaka j’eca.”
36Omurangeri guondrongo okua rombuere Paulus eehapu di: “Aapangeri jotshirando oja tumu eraka mu eciue. Zeni mo ano ne mu k’ende nombiri.”
37Ndere Paulus okue ja rombuere a ti: “Porueera mpa tua dengua niitago, tu’edirirua mondrongo, sse jene inatu purua tsha, nanto osse aaroma.#16:37 Paulus okua varua motshirando Tarsus. Ajeshe mba ja varua motshirando shika oja ri nepitiko rjokuitara aaroma. Opua ri pua indikua okudenga aaroma niitago. Ndere nena oja ara oku tu rareka ofuci. Aaue, oojene naa je.”
38Ojo naje tu piice mo. “Aajakuri jetokoro oj’okororere aapangeri jotshirando eehapu dika. Ongashi ja tira unene, sho j’uvu nokutja mboka aaroma.
39Opo je ja, taa popi eehapu dombiri. Oje ja piica mo noku ja indira ja ze mo motshirando.
40Ongashi ja zi mo mondrongo taa hi ku Lidia. Ja tarera po aamuahina aarongua, jo je ja ekererica, nde taa hi.
Omission Heklesia Ekatolika, 1951. Namibian Catholic Bishops Conference.