Iironga 15
15
ONTOPORUA 15.
Otshigongi tshaapostoli mu Jerusalem.
1Jamue ja zi mu Judea, je ja huka, ja ronga jakuauo: “Ne nge itamu ka fukarekua komukaro gua Moses, itamu k’upicua.”
2Paulus na Barnabas oja patacana na jo uneenene. Ongashi j’uvacana nokutja Paulus na Barnabas na jamue jomaakuauo uo mokati kauo naa he kaapostoli no kaakuruntu jomu Jerusalem moru’eembata do.
3Ngija ja cindikirua kegongaro otshikako tshimue tshondjira, oja pitire mu Foinikia na Samaria, j’okorora ehidirururo rjaapagani jo ja njanjuda jakuauo enjanju enene.
4Sho ja ciki ku Jerusalem, oja tuumbua kegongaro no kaakuruntu. Taa hokorora iironga mbjoka iinene, Karunga e ja rongica.
5Nena jamue jomotshimpaga tshaafarisai, mba kua ja ninga aahiteeri, oja cikama ja ti: “Mboka oje nokufukarekua. Oje na uo okurombuerua ja guanice ompango ha Moses.”
6Opo nduno aapostoli naakuruntu ja gongara, ja konakone ohapu ndjika.
7Ndere sho pua popiua eehapu odindji diiri no diiri, Petrus okua cikama nokua ti: “Jarumentu jamuameme, omu tshi nokutja monare Karunga oku’ogorora mokati ketu okana kandje ndi uvicire aapagani evangelium, opo jo uo ja ninge aahiteeri.
8Karunga ngu a tshiua eemtima okue ja popira, sho e ja pa Ombepo Ondjapuki uo nga sse.
9He ina joorora mokati ketu na jo. Okua jereka eemuenjo dauo nehiteero.
10Ano nduno otshike amu shindi Karunga#15:10 Enongero rjeehapu da Petrus orjo ndika: Karunga muene okua orora naua eharo rje okutja iipango neemkaro dijaka da Moses kadi notshironga ue maakriste. Otshike nduno inamu ara kuiteera Karunga? sho mua ara okutsika kekoci rjaarongua ondjoko ndji ha njengere uo ootate nasse?
11Aaue, sse otu’iteera nokutja tatu ka upicua kesiroshenda rja Muene guetu Jesus Kristus ngashi uo jo.”#15:11 Iipango neemkaro da Moses kadi notshironga ue, aaue, ekuriro rja Jesus Kristus orjoike.
12Nena otshigongi atshishe otsha muena#15:12 Petrus omupapa guotango okua tokora otshinima shika. Nena kapu nokupatacana ue. Ja puakena Barnabas na Paulus mba j’okorora omadidiriko omanene niironga iinjengandunge mbi Karunga e ja rongica mokati kaapagani.
13Sho ja muena, Jakobus#15:13 Okutja omuapostoli Jakobus ngu omunjasha, omuepiskopi guomu Jerusalem. okua cikama nokua ti: “Jarumentu jamuameme, uveni eehapu dandje!
14Simon oku’okorora ngashi Karunga a tarera po aapagani noshenda he ruotango, jo ja ninge otshiguana tshedina rje.
15Eehapu daaprofeti oda tsa pu tsho, oshoka opua tshangua:
16“Okuza ku mbjoka ngaje otandi ka garuka ndi tungurure odjugo ha David, ndji ha kumuka po. Atshishe tsha teka mu ho, otii tshi tungurura, ngaje tandi ke hi dikurura.
17Opo aantu jakuauo ajeshe ja konge Muene, niiguana ajishe ja rukirue edina rjandje. Otsho Muene ta popi, ngu te tshi ningi.
18Muene oku tshi otshironga tshe okuza keshimbiko.’#15:18 Odo eehapu daaprofeti jetestamente ekuru: Isaias, Mikeas Amos. Tadi ti: Okuza peshanaguro rjotshirongo Israel, Karunga okua ara okutungurura otshirongo tshe, nokutja eklesia aantu ajeshe ja mone murjo ehupico.
19Ano nduno ngaje ndi tshi inatsh’opara kumonic’aapagani mba j’idirurura ku Karunga, uudigu.
20Aaue, jo ja tshangerue nokutja naj’ikerere konigi hiimenka, komahondero, konjama ha sotshipuininika no kombinzi.#15:20 Iipango mbika jaaisraeli jonare inaji dimua mo manka meklesia rjotango moru’ aajuda, mba ja ara okuninga aakriste.
21Okuza komacimbo gonare, Moses okua kara e naahuvici je miirando ajishe, mu tamu uvicirua eehapu de meesinagoga, nge tadi leshua mesabati keshe.”#15:21 Iipango mbijaka ja Moses otaj’uvicua nanena apeshepeshe. Otsho aakriste mba ja zi muupagani naa ji guanice uo kaa kuajurice aajuda.
22Nena aapostoli naakuruntu notshigongi atshishe oj’uvacanene, ja ogorore mokati kauo aarumentu, jo je ja tume ku Antiokia puamue na Paulus na Barnabas. Ojo mboka: Judas guedina rjoponto Barsabas na Silas. Mboka ojo aarumentu je nosima mokati kaarongua.
23Oja peua eentumuafo di da tshangua ngii: “Osse aapostoli ss’aakuruntu aamuanjoko, ss’oojakueni, otatu kundu ajeshe jomu Antiokia, jomu Siria jomu Kilikia, naakuetu ajeshe jomaapagani!
24Otue tsh’uva nokutja jamue mokati ketu, mba inaa rombuerua tsha kusse, oje mu rimbirika neehapu, ja vundakanica eemuenjo deni.
25Ndere sse sho tua ri tua gongara, otua uvacana okuogorora aarumentu, tu ja tume kune puamue naahorike jetu Barnabas na Paulus.
26Jo aarumentu mba ja gandjera edina rja Muene guetu Jesus Kristus eemuenjo dauo.
27Otsho otua tuma Judas na Silas, mba taje mu tshiuicire nomakana iinima mbjoka.
28Oshoka otsh’oparere Ombepo Ondjapuki nasse uo, ne kamu umbate uudigu uiiri. Mbika oj’ike kaji diniua.
29Ne mu itshirike iinima ja saagererua iimenka, ombinzi nonjama ha sotshipuininika noruhondero. Nge tamu ikerere iinima mbika, omua guana. Kareni naua!”
30Mboka nduno oja rarekua. Ja hi ku Antiokia. Ndere egongaro arishe, sho rja gongara, jo oja gandja ontumuafo.
31Sho je hi ja leshere, oja njanjukirua ehekererico ndika.#15:31 Okutja aakriste mba ja zi muupagani kaa notshipango tshokuifukarekica tango.
32Ndere Judas na Silas, jo jene oja ri aaprofeti, oj’ekererica aarongua jakuauo neehapu odindji, jo je ja koreka momuenjo.
33Sho ja ningi omasiku gamue, oja rarekua kaarongua jakuauo nomakundo gombiri, ja tshune ku mboka je ja tuma.
34Silas okua arere okukara po. Judas ohiike a tshuna ku Jerusalem.
35Paulus na Barnabas oja menekere mu Antiokia. Oja ronga jo ja okorora puamue na jarue ojendji ekundano ehanaua rjohapu ha Muene.
36Omasiku gamue sho ga piti, Paulus okua rombuere Barnabas: “Tu heni tu he kiirando ajishe mu tua uvicire ohapu ha Muene, tu tare aakuetu nokuuharera kuauo.”
37Nena Barnabas okua ara uo okukuca Johannes guedina rjoponto Markus, ja he na he.
38Ndere Paulus okue mu indire nokudiradira nokutja inatsh’oparere okuha puamue na ngu a topokere na jo mu Pamfilia, a tinda okukara puamue na jo motshironga.#15:38 Lesha ontoporua 13:13.
39Sho inaj’iteeracana, oja topokacana. Barnabas okua kuca Markus, a ronda etembameja, nde ta hi ku Kipro.
40Paulus oku’ogorora Silas nde ta toor’erira. Aamuahina oje mu tura mesiroshenda rja Muene.
41Taa pitire mu Siria no mu Kilikia nokukoreka omagongaro. E ja rombuera ja diginine iipango jaapostoli no jaakuruntu.
Omission Heklesia Ekatolika, 1951. Namibian Catholic Bishops Conference.