Iironga 10
10
ONTOPORUA 10.
Kornelius
1Motshirando Kesarea omua ri omurumentu, edina rje Kornelius, erenga rjongundu haakuiita ndji ha rukua “Italika.”#10:1 Ongundu ndjika haakuiita oha rukua “Italika” oshoka aakuiita jaho ajeshe oja varerue mu Italia.
2H’okua ri omurumentu omujuki, a tira Karunga, he muene nondjugo he ahishe, a kuaca orundji aacigona, he a garikana Karunga nuudiginini.#10:2 Kornelius okua ri omupagani. Ndere sho a ri arushe mokati kaajuda, okua dimburura Karunga kotshiri.
3Ohe nguno a mona memoniko, mostunde ontimugoji omutenja, omujengeli gua Karunga, ngu e ja ku he a ti: “Kornelius.”
4Okua rigamene ku he, ta kuatua ketiro ta ti: “Muene otshitshee?” Ndere omujengeli okua ti ku he: “Omagarikano gohe niikuaca johe oja farua kotshipara tsha Karunga ng’omagano.
5Nena tuma aarumentu ku Joppe, ja ka ete Simon edina rje rjoponto Petrus.
6Ohe omuhenda gua Simon nguijaka omuperi guiipa. Ondjugo he ohi ri pomukunkuro guefuta. Ohe te ku rombuere shoka u nokuninga.”
7Omujengeli ngu a popi na he, nena ina monikua ue. He#10:7 He okutja Kornelius. oku’icana jaari jomaapija je nomukuiita gumue, ngu a tira Muene#10:7 Omukuiita ngu oku’amberera uo Karunga kotshiri., gumue gua mbaka ja ri mepangero rje.
8Mboka okue j’okororera atshishe, he te ja tumu ku Joppe.
9Esiku rja nofu, mboka sho ja ri mondjira, oj’ishirire otshirando, nde Petrus okua rondo kombanda hondjugo okugarikana postunde ontikanekamue.#10:9 Okutja opetango rjambandomutse.
10Nena okua s’ondjara, a hara okurja. Ndere, sho je mu terekere, okua s’onkunkumucika.
11A tar’eguru rj’eguruka, mo mua zi otshinima shi tsha f’elapi enene etokere, rja kuatua keenkotse darjo ine, rja zi keguru, rj’uka pevi.
12Murjo omua ri iinamuenjo ajishe jevi, ji nomaguru gane, na mbjoka haji ipuedea, needira dokeguru.
13Eui rja ti ku he: “Petrus, cikama, tsera, ngueje u rje.”
14Ndere Petrus a jamukura: “Muene tshivarerue, sigo onena ngaje inandi rja tsha, shi tsh’indikua, shi tsha njata.”#10:14 Aaisraeli oja ri niipango ojindji, je ji peua ku Moses. Jo je j’indike uo okurja iinima jiiri no jiiri mbi ja tarua uo ng’iinima ja njata. Otsho uo aaisraeli ja ri j’indikua okukaracana naapagani, mba ja tarua ng’aantu ja njata, jo je nokuikererua Peshimbiko aapostoli naakriste jotango, mba ja ri nare aajuda, oja guanicire uo iipango mbika.
15Neui orje mu popica rutijari rja ti: “Shoka tsha jerekua ku Karunga, ngueje ino tshi ruka tsha njata.”#10:15 Moru’okusa kua Jesus onjata ajishe ndji ha za muurunde otahi kucua po ku Jesus. Ano iipango mbi ja Moses kaji notshironga ue metestamente epe.
16Shoka otsha ningua rutatu. Okuza mpoka otshinima tsha tja ngaaka otsha tshunicua meguru.
17Manka Petrus a rimbirirua nanena kenongero rjemoniko ndika, a mona aarumentu mbo ja tumua ku Kornelius, oja pura ondjugo ha Simon, jo ja cikama potsheero.
18Oj’igida, jo ja pura Simon gu’edina rjoponto Petrus nge omo e ri.
19Petrus, sho a diradira nanena emoniko ndika, Ombepo#10:19 Okutja Ombepo ha Karunga. ohe mu rombuera: “Tara aarumentu jatatu otaa ku kongo.
20Ano nduno, cikama, rondoroka, u he puamue na jo, ino rimbirirua, oshoka ongaje nde ja tuma.”
21Nena Petrus okua rondoroka, ta hi kaarumentu mboka ta ti: “Tara ongaje ngu, ngu tamu kongo. Ne ano omua ira tshee?”
22Oja ti: “Erenga Kornelius, omurumentu omujuki, nakutira Karunga, ngu t’okororua ngaano kotshiguana atshishe tshaajuda, ohe ngu a rombuerua komujengeli omujapuki, e ku icanene kondjugo he, nokuuva eehapu dohe.”
23H’okue ja farere mondjugo, nde te ja jakura. Ongura ta cikama, nde ta hi puamue na jo. Aamuahina#10:23 Aamuahina okutja aahiteeri jakuauo. jamue jomu Joppe oje mu cindikira.
24Esiku rja nofu okua ciki ku Kesarea. Kornelius e ja tegerera. A shijire aakuazimo nookuumekerera.
25Nopua ningi, Petrus sho e ja mo, Kornelius okue mu tsakaneke, ta tseengoro peempadi de, he te mu amberere.
26Petrus okue mu jambukica a ti: “Cikama, nangaje uo omuntu.”
27Ndere manka taa kundacana, he okue ja mo, taa hada ojendji, j’igongarera mo.
28Te ja rombuere: “Omu tshi tshi naanaa nokutja omuntu omujuda oku’indikua okukara nokutarera po omuntu, ngu ke shi omujuda. Ndere Karunga oku’urukirandje nokutja inatshi pitikua ue okutara omuntu a fa ngu e noku ikererua nga ngu a njata.#10:28 Okutja ngu a njata keendunge diipango jaajuda. Ndere moru ’okusa kua Jesus Kristus aantu ajeshe, aajuda naapagani uo oja kurirua, ja jerekua nombinzi ha Jesus Kristus. Jo ajeshe j’ucua kuninga aana ja Karunga. Iipango mbija jaajuda kaji neenkondo ue.
29Otsho ngaje nde ja, sho nd’icanua, inandi tengatenga. Ano otii mu pura ngashingi: Omu’icanenandje tshee.”
30Kornelius ta jamukura: “Ngashingika omasiku gane ga pita, sh’onda ri andi garikana mondjugo handje postunde ontimugoji. Ndere omurumentu ta cikama po, a zara onguuo ontokere to.
31Ta ti: ‘Kornelius, egarikano rjohe orj’uvika, niikuaca johe oja dimburukiua motshipara tsha Karunga.
32Tuma ano ku Joppe, u icane Simon, ngu e nedina rjoponto Petrus, omuhenda mondjugo ha Simon, omuperi guiipa, ndji hi ri popepi nefuta.’
33Ongashi ngaje inandi arura okutuma kungueje. Ndere ngueje muene oua ninga nauerera, sho ue ja po. Nena nduno ss’atushe otu ri po mpa tu puakene ku doka ua rombuerua ku Muene.”
34Ongashi Petrus a hekama okana ke a ti: “Nena nduno onde tshi dimburura motshiri nokutja Karunga ka tara omuntu kombanda.#10:34 Nokutja Karunga ita joorora aajuda nenge aapagani, aacigona nenge aajamba, aatirigane nenge aarude.
35Aaue, oha panda motshiguana keshe ngoka e mu tira, he ha rongo iironga juujuki.
36Karunga okua tumina aana j’Israel eehapu de, h’a hokororica Jesus Kristus ombiri, ohe ngu Muene guajeshejeshe.
37Omu tshi tshi shoka tsha ningua motshirongo atshishe tsha Judea. Otsha shimbika mu Galilea, okuza ketshatsho ndi Johannes e mu uvicire.
38Ndi tshi Jesus omunatsaret, Karunga okue mu gueeka n’Ombepo Ondjapuki no neenkondo odindji, ngu a hendagura ta rongo iironga iihanaua, a heruda ajeshe, mba ja ri j’epekua komusatana, oshoka Karunga okua ri na he.
39Osse eentari da mbika ajishe a ronga motshirongo tshaajuda no mu Jerusalem. Oje mu dipaga noku mu endjerereka komuti.
40Ndere Karunga okue mu jumuda esiku etitatu, he e mu orokice.
41Ha miipaci jaantu ajeshe, aaue, omiipaci jeentari doka d’ucua nare ku Karunga, sse jene, sho tua rire na sho tua nuine puamue na he, ejumuko rje sho rja piti.
42He e tu rombuera, tu uvicire, sse tu okororere aantu nokutja ohe tuu ngoka a turua po ku Karunga ng’omupanguri guaanamuenjo no guaasi.
43Aaprofeti ajeshe oje mu okorora nokutja keshe tuu ngoka e mu iteera, ota peua edimepo rjeendjo medina rje.”
44Manka Petrus a popi eehapu doka, ajeshe mba j’uvu ehuvico ndika, ja kurukirua k’Ombepo Ondjapuki.
45Ndere aahiteeri mbejaka, ja fukarekua nare, mboka je ja na Petrus, oja rurirua, oshoka aapagani uo oja tirirua omagano g’Ombepo Ondjapuki.
46Oshoka oj’uvu taa popi omaraka, jo taa hamberere Karunga.
47Nena Petrus a ti: “Ore ta vuru okutindira omeja getshatsho mboka ja tuumba Ombepo Ondjapuki nga sse uo.”
48Opo e ja tshatshica medina rja Jesus Kristus. Ongashi je mu indire a kare pu jo omasiku gamue.
Omission Heklesia Ekatolika, 1951. Namibian Catholic Bishops Conference.