१ थेसलोनिकि 5
5
प्रभु फेरि आउन्या दिन
1दाजुभाइहरु औ, यि कुडा कैबेला हुन्याहुन् भुन्न्या बार्यामै तुमिहरुकन केइ लेखिरनु पड्दैन। 2क्यानकि तुमिहरुकन राम्मरि थाँ छ, प्रभु आउन्या दिन त रातमै चोर आयाजुन अपरझट आउन्याछ। 3जैबेला मान्ठहरु सान्ति छ र केइ भेइ नाइ भुन्नाछुन् तेइबेला गुर्बेनि स्हैनिकन कैठ लाग्याजुन अपरझट तिनुहरुमै बिनास आइपड्डोछ, र तिनुहरु केइगरि उम्किन्यानाइ। 4तर दाजुभाइहरु औ, तुमिहरु पापमै भयाहरु जैथै उद्यारोमै नाइ, तेइबिअ तेइ दिनले तुमिहरुकन चोर आया जैथै अचुम्ममै पड्न्या नाइ। 5क्यानकि तुमिहरु स्हबै उज्यालाका स्हुन्तान र दिउसका स्हुन्तान हौ। हामि उद्यारो र रातका स्हुन्तान हैनौं। 6यइबिअ अरुकाजुन हामि नढुलौं, तर जागै बसौं, र चुनाखो हौं। 7क्यानकि ढुल्याहरु राति ढुल्लाछुन्, र जाँड खाइ रातमै मात्तिन्छुन्। 8तर हामि दिउसका स्हुन्तान भयाहुनाले चुनाखो रौं, र बिसास र मायाकन रछ्या गन्न्या छातिका पाताजैथै लाउँ र मुक्तिको आसकन फलामको टोपिजैथै लाउँ।#यसैया ५९:१७ 9क्यानकि परमेसोरले हामिकन दुन्ड दिन हैन, तर हाम्मा प्रभु इसु ख्रिस्टबाट मुक्ति पाउन पैलै छान्या हुन्। 10प्रभु इसु ख्रिस्ट हाम्मा लेखि मर्या तेइबिअ हामि जागै बसौं या ढुल्या हौं, हामि स्हबै उनुस्हातै ज्युँन स्हकौं। 11यइबिअ एकाले अक्काकन हौसला देउ, र एकाले अक्काकन जोरिलो पाड्न्या काम गर, जैथो तुमिहरु पैलै गद्दै आयाछौ।
उन्तिम सिच्छ्या
12तर दाजुभाइहरु औ, तुमिहरुका म्हाँजौदो दुख गन्न्याहरु, अनि प्रभुमै तुमिहरुकन सिच्छ्या र चेताउनि दिन्या अगुवाहरुकन मान गर भुनि हामि तुमिहरुकन हात्या बिन्ति गद्दाछौं। 13र तिनुहरुका काम हेरि तिनुहरुकन मायास्हात मथ्थै मान गर। तुमिहरु आपु आपु मिलिजुलि बस।
14दाजुभाइहरु औ, हामि तुमिहरुकन बिन्ति गद्दाछौं कि अल्छो मान्याहरुकन चेताउनि देउ। ह्यास् खान्याहरुकन हौसला देउ। कुमजोरिहरुकन सयोग गर। ति स्हबैस्हात स्हयर बैनु। 15याद राख, कैकनै नराम्मा कामको स्हट्टा नराम्मो नगरोस्, तर एकाले अक्काकन र स्हबैस्हात उकुरि भलो गन्न्या निदो गर।
16उकुरै खुसि रया। 17जैलेपुनि प्रार्थना गरि रउ। 18स्हबै इस्तिथिमै धन्यबाद देउ, क्यानभुन्या ख्रिस्ट इसुमै तुमिहरुले यि कुडाहरु गर भुन्न्या परमेसोरको मुन यइ हो।
19पबित्त आत्माकन काम गन्न देउ। 20परमेसोरको रैबारकन हेला नगर। 21स्हबै कुडाको जाँच गर। ज्या कुडा राम्मो छ तेइकन स्हुमाति रउ। 22स्हबै किसिमका दुस्ट कुडाबाट टाडै रउ।
23सान्तिका परमेसोर आपैले स्हबै तरिकाले तुमिहरुकन पबित्त पारुन्, र तुमिहरुका आत्मा, परान र हड हाम्मा प्रभु इसु ख्रिस्ट फेरि आउन्या दिनमै कोइ पुनि खोट नभया होस्। 24तुमिहरुकन घोइराउन्या परमेसोर बिसास गन्न्या लायकका छुन्, उनुले यि स्हबै कुडा पक्का गन्न्या छुन्।
25दाजुभाइहरु औ, हाम्मा लेखि प्रार्थना गर।
26स्हबै दाजुभाइहरुकन मायाले जदेउ गर।
27यइ चिठिक पढि स्हबै दाजुभाइहरुकन स्हुनाइदेउ भुनि मु तुमिहरुकन प्रभुको नाउँमै हात्या बिन्ति गद्दाछु।
28हाम्मा प्रभु इसु ख्रिस्टको अनुग्र तुमिहरुमै रओस्।
Currently Selected:
१ थेसलोनिकि 5: JUML
Highlight
Copy
Compare
Share
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
