ROMANOS 15

1Yo köo xíka uvi ini ta xíniñuꞌu yo kiꞌin yo kuenta xiꞌin na taꞌan yo, na vita ni ini xiꞌin tuꞌun Ndioxi, na täꞌan kundaa vaꞌa ini xiꞌin tuꞌun ra. Ta ná ïkan yo ndisaa ya kúni mií yo. 2Saa xíniñuꞌu iin iin yo ikan yo xiꞌin na taꞌan yo, ná ndikani ini yo unkua vaꞌa ikan yo xiꞌin na ya koo vaꞌa ini na. Tá íkan yo saa xiꞌin na, ta chíndee taꞌan yo xiꞌin na xáꞌnu ka na xiꞌin tuꞌun Ndioxi, ta ndúndee ka ya ini na, ndáa ni ini na xíni na Jesucristo. 3Saa chi ni mií Jesucristo, ta köo ndi̱xika ini ra ndisaa xaꞌa mií ra. Tá káꞌan tuꞌun Ndioxi xaꞌa ra, káchi ya saa: “Naꞌa na kánaꞌa xaꞌa un, ta nda xaꞌa yeꞌe kánaꞌa na”, káchi tuꞌun Ndioxi xaꞌa Jesucristo. 4Ndiꞌi tuꞌun Ndioxi ya ta̱a na xinaꞌa xaꞌa ya sinaꞌa ya yoo kua ta̱a na ya. Chi tuꞌun Ndioxi ta chíndee ya yóo, xáꞌa ya ndee xiꞌin yo tá ndóꞌni yo nuu tindoꞌo, saa chíndee ya yóo táxi ya ndee ndaꞌa yo ya kuekuee kundatun yo ya sixinu Ndioxi ya ndi̱kaꞌan ra taxi ra ndaꞌa yo. 5Yakan ndúku ni i ya mani nuu Ndioxi ná taxi ra ndee ndaꞌa ndo, ta ná xaꞌa ni ra ndee xiꞌin ndo, ná chindee ni ra ndóꞌo̱ ya kutaꞌan vaꞌa ni ndo xiꞌin taꞌan ndo tá kuꞌva kúni mií Jesucristo. 6Ta saa iin yuꞌu ná koo ndiꞌi ndo xiꞌin taꞌan ndo, ná ndikitaꞌan ndiꞌi ndo xaa kaꞌnu ndo Iva yo Ndioxi, ra kúu Iva Jesucristo.

Ndiꞌi naꞌa xíniñuꞌu kundaa ini tuꞌun vaꞌa xaꞌa Jesucristo

7Ndikuiso mani taꞌan ndo, tá kuꞌva ndi̱kuiso mani Jesucristo ndóꞌo̱. Tá íkan ndo saa xiꞌin taꞌan ndo, ta xáa kaꞌnu ni ndo Ndioxi. 8Na taꞌan yo, ndítuꞌun i xiꞌin ndo xaꞌa Jesucristo, ya ki̱xi ra ñuu ivi yóꞌó xa̱a chiñu ra nuu na judío, saa xi̱ni na ya si̱xinu Ndioxi ya ki̱ndoo ra xiꞌin xii sikua na xinaꞌa, saa chi Ndioxi ta ya ndaa kua xáa súvi ra ya káꞌan ra. 9Saa ki̱xi tu ra ya i̱kan ra ya vaꞌa xiꞌin naꞌa, na köo kúu judío, ya ná xaa kaꞌnu na Ndioxi, xaꞌa ya kúndaꞌvi ini ra xíni ra na, tá káchi tuꞌun ra ya káchi saa:

Tata Ndioxi, nda tañu naꞌa, na köo xíni yóꞌo̱, xaa kaꞌnu i yóꞌo̱.

Ta kata i yaa i̱í nuu un.

káchi ya.

10Saa káꞌan ka tuꞌun Ndioxi, káchi ya:

Iin káchi ná kusini ndiꞌi ni kúu ndóꞌo̱,

ndóo ñuu ivi xiꞌin naꞌa, na ñuu Ndioxi,

káchi ya. 11Saa káꞌan ka tuꞌun Ndioxi, káchi ya saa:

Ndiꞌi ndóꞌo̱ köo kúu judío ta xaa kaꞌnu ndo Tata yo.

Ndiꞌi ni kúu ndo ndóo ñuu ivi ta xaa kaꞌnu ndo Tata yo.

12Saa ndi̱kaꞌan tu ra Isaías va xaꞌa ya yóꞌó, káchi ra saa:

Tixin iin na veꞌe ra kúu seꞌe ñani sikua ra Isaí kua keta

iin taa ra kaꞌnda chiñu nuu ndiꞌi ni kúu na ñuu ivi.

Ta ndiꞌi ni kúu na ñuu ivi kundaa ni ini na kuni na ra ikán.

13Ta vitin káꞌan i xiꞌin mií Ndioxi ra chíkaa ndee ini ndo ya kundatun ndo ya vaꞌa ikan ra xiꞌin ndo. Ná taxi ni ra ya kúsini ni ndo, saa ná koo vaꞌa ni ini ndo. Ta saa ná ndundee ni ka ya kándixa ndo ya ndátun ndo niꞌi ndo tixin ndee Tachi I̱í ra.

14Ñani yo xiꞌin kuꞌva yo, xíni i ya ndee ni vaꞌa ini ndo, ta xa xíni ni ndo ya ndaa, yakan vaꞌa ni táxi ndo nuu taꞌan ndo. 15Ya ndaa kua, kuaꞌa ni ya ndi̱kaꞌan i ta̱a i xaa nuu ndo, nuu ndítuꞌun téꞌe i xiꞌin ndo, saa chi kúni i ná ndïndoso ini ndo xaꞌa ya káꞌan i saa xiꞌin ndo. Chi Ndioxi ta vaꞌa ni ini ra xiꞌin i xaꞌa ya ta̱xi ra ichí ndaꞌa i xáa chiñu i nuu ra. 16Chiñu kúu mií i kua xáa chiñu i nuu Jesucristo. Tá káa iin sutu káa i káꞌan ndoso i tuꞌun vaꞌa xaꞌa ra xiꞌin naꞌa, na köo kúu judío, ya kuchiñu na kuyati na nuu ra. Ta saa nduu na tá íin ñaꞌa ya sóko i nuu Ndioxi, ta vaꞌa ni ndikuiso ra na, saa chi xa ndi̱kaxin mií Tachi I̱í Ndioxi na, ta xaꞌa mií ra kua ndi̱kaxin ya na.

17Vaꞌa ni kúni i, kúsini ni i xáa chiñu i nuu Ndioxi, xaꞌa ya íyo i xiꞌin Cristo Jesús. 18Süvi xaꞌa ya íkan mií i kua ndítuꞌun i xaꞌa xiꞌin ndo, chi xaꞌa ya íkan Jesucristo chíndee ra yeꞌe ndítuꞌun i xaꞌa ra xiꞌin naꞌa, na köo kúu judío, ya ná kuni soꞌo na tuꞌun ra, ta xaa súvi na ya kúni Ndioxi. Ta xa xáa súvi na ya káꞌan i xiꞌin na, ta süvi ndisaa ya káꞌan i xiꞌin na kua íkan na saa, chi xíto tu na ya íkan i xiꞌin va na, yakan vaꞌa xáa súvi na ya káꞌan Ndioxi. 19Ndixaꞌvi ni mií Ndioxi xaꞌa Tachi I̱í ra, saa chi chíndee ya yeꞌe íkan i yatuꞌun nuu na xiꞌin ya vaꞌa ni, ta soꞌva kua síxinu i tuꞌun vaꞌa xaꞌa Jesucristo. Nda ñuu Jerusalén kua xa̱á i káꞌan ndoso i tuꞌun vaꞌa xaꞌa ra, iin saa ndi̱xaa i nda ñuu Ilírico, ndi̱xika ndiꞌi i ndi̱kaꞌan i xiꞌin na xaꞌa tuꞌun vaꞌa ya síkaku mií na. 20Ndiꞌi saa kivi ku̱ni ni i kaꞌan ndoso i tuꞌun vaꞌa xaꞌa Jesucristo nuu täꞌan kuꞌun nda iin naꞌa kaꞌan ndoso na xaꞌa ra. Íkan i saa ya ná käꞌan ndoso i nuu xa ndi̱xaꞌan inka naꞌa ndi̱kaꞌan ndoso na xaꞌa ra. 21Tá kuꞌva káꞌan tuꞌun Ndioxi káchi ya saa:

Naꞌa, na täꞌan kuni soꞌo tuꞌun xaꞌa ra, ta kuni soꞌo na.

Ni naꞌa, na täꞌan kundaa ini xaꞌa ra, ta kundaa ini na xaꞌa ra,

káchi tuꞌun Ndioxi.

Ndíkani ini ra Pablo kuꞌun ra koto ra na ndíkun Jesús ndóo ñuu Roma

22Ñani yo tin kuꞌva yo ndóo ñuu Roma, xa kuaꞌa ni ichí chi̱kaa ini i xaa i koto i ndóꞌo̱, ta köo ndíkuvi xaꞌa i nuu ndo. 23Ta vitin xa si̱ndiꞌi i chiñu i̱kan i ndiꞌi ñuu ndóꞌni yóꞌó, ta kúni i xaa i koto i ndóꞌo̱, chi xa kuaꞌa ni kuiya ku ya kúni i xaa i nuu ndo. 24Tá ná kuꞌun i chí ñuu España ta xiꞌna ñuu Roma yaꞌa i koto i ndóꞌo̱. Ta saa kusini ni yo xiꞌin taꞌan yo. Ta ndúku ni i ya mani nuu ndo ya chindee taꞌan loꞌo ndo xiꞌin i, saa kuchiñu yaꞌa i kuꞌun i chí ñuu España. 25Sundi xiꞌna ñuu Jerusalén kua kuꞌun i vitin, ya chindee taꞌan i xiꞌin na ñuu Ndioxi ndóo ikán. 26Saa chi na taꞌan yo, na veꞌe ñuꞌu na ndóo chí ñuu Macedonia xiꞌin na ndóo chí ñuu Acaya, ndi̱kani ini na ndi̱kaya na loꞌo xuꞌun ya tiꞌvi na kuꞌun ndaꞌa na taꞌan yo, na ndaꞌvi, ndóo ñuu Jerusalén. 27Ta ini mií na ka̱na ya ikan na saa, ta vaꞌa ni íkan na, saa xíniñuꞌu na ikan na xaꞌa ya köo kúu na judío. Saa chi xaꞌa na taꞌan yo na judío, ta nda na köo kúu judío ndi̱niꞌi ni ya vaꞌa. Yakan vitin vaꞌa ná chindee taꞌan loꞌo na köo kúu judío xiꞌin na judío. 28Tá ná sindiꞌi nditaꞌvi i xuꞌun xiꞌin na taꞌan yo, na ndóo ñuu Jerusalén, saa yaꞌa i ñuu Roma koto i ndóꞌo̱. Sindiꞌi ikán saa kee i kuꞌun i chí ñuu España. 29Ta ya ndaa kua, tá ná xaa i nuu ndo ñuu Roma, saa ndi̱tuꞌun ni i xiꞌin ndo xaꞌa ya vaꞌa, ya ndi̱niꞌi yo nuu Jesucristo.

30Ñani yo xiꞌin kuꞌva yo, xáku ndaꞌvi ni i nuu ndo, tixin ndee Jesucristo xiꞌin tixin ya kúꞌvi ni ini Tachi I̱í Ndioxi xíni ya yoo, xíkan ni i ya mani nuu ndo, kaꞌan ni ndo xiꞌin Ndioxi xaꞌa i, 31ya ná sikaku ra yeꞌe nuu naꞌa, na ndóo Judea, na köo xíin kuni soꞌo tuꞌun vaꞌa xaꞌa Jesucristo. Ta saa ná ndikiꞌin vaꞌa na taꞌan yo, na ndóo ñuu Jerusalén xuꞌun ya ndíso i ku̱aꞌan ndaꞌa na. 32Tá tu Ndioxi ná kachi, ta xaa i koto i ndóꞌo̱, kúsini ni i xaa i nuu ndo. Saa iin káchi ndikitaꞌan yo ndikundee ini yo, xaꞌa ni yo ndee xiꞌin taꞌan yo. 33Ta Iva yo Ndioxi ra táxi ya koo vaꞌa ni ini yo, ná koo ra xiꞌin ndo ndiꞌi saa kivi. Saa ná koo.

Currently Selected:

ROMANOS 15: xta

Highlight

Copy