ROMANOS 16

Káꞌan ndioxi ra Pablo xiꞌin na ndíkun Jesucristo ndóo ñuu Roma

1Ñani yo xiꞌin kuꞌva yo, káꞌan i xiꞌin ndo xaꞌa yá kuꞌva yo yá Febe yóꞌó. Ndúku i ya mani nuu ndo ya ndikiꞌin vaꞌa ndo yá, chi yá kúu mií chiñu ku yá veꞌe ñuꞌu ta chíndee taꞌan ni yá xiꞌin na veꞌe ñuꞌu ñuu Cencrea. 2Ndikiꞌin vaꞌa ni ndo yá, ikan ndo ya xaꞌa Tata yo. Tá kuꞌva vívií ndíkiꞌin ndo ndiꞌi naꞌa, na xáa chiñu nuu Tata yo, saa ndikiꞌin vií ndo yá. Chindee taꞌan ni ndo xiꞌin yá, saa chi kuaꞌa ni naꞌa chíndee taꞌan yá xiꞌin, nda ni mií i ta chi̱ndee taꞌan ni yá xiꞌin i.

3Saa tuku káꞌan i xiꞌin ndo, kaꞌan ndioxi ndo xiꞌin yá Priscila tin ra Aquila, ií yá, saa chi na ñaa ta iin kachi xáa chiñu na xiꞌin i nuu Tata yo Jesucristo. 4Siloꞌo kuvi na xaꞌa ya si̱kaku na yeꞌe, yakan táxi ni i tixaꞌvi ndaꞌa na, ta saa tu naꞌa, na köo kúu judío, táxi ni na tixaꞌvi ndaꞌa na ñaa. 5Saa kaꞌan ndioxi tu ndo xiꞌin nda ñani yo tin ná kuꞌva yo na ndíkitaꞌan veꞌe yá Priscila xiꞌin ra Aquila. Saa kaꞌan ndioxi ni tu ndo xiꞌin ra ñani yo ra Epeneto. Vaꞌa ni xi̱taꞌan nde xiꞌin taꞌan nde. Ra ikán ku ra núnuu ndi̱kundikun Jesucristo chí ñuu Acaya. 6Kaꞌan ndioxi tu ndo xiꞌin yá María, chi yá ikán ta ndee ni ndee xáa chiñu yá xaꞌa ndo. 7Saa kaꞌan ndioxi ni tu ndo xiꞌin ra ñani yo ra Andrónico xiꞌin yá Junias, na taꞌan i ku na ñaa, na judío ku na, ta iin káchi xi̱ñuꞌu na xiꞌin i veꞌe kàà. Ta nda apóstol nda ti̱ꞌvi Ndioxi xaa chiñu nuu ra ku nda. Ta xa yachi ka vi ka̱ndixa na ñaa Jesucristo nuu yeꞌe. 8Kaꞌan ndioxi tu ndo xiꞌin ra Amplias, vaꞌa ni xi̱taꞌan nde xiꞌin taꞌan nde, ya ndíkun nde Cristo. 9Kaꞌan ndioxi tu ndo xiꞌin ra Urbano, ra xáa chiñu xiꞌin yo nuu Jesucristo ku ra, saa kaꞌan ndioxi tu ndo xiꞌin ra migo i ra Estaquis, ra kúꞌvi ni ini i xíni i. 10Kaꞌan ndioxi ni tu ndo xiꞌin ra Apeles, chi ra ñaa ta ndee ni ndee xi̱ndikaa ra nuu tindoꞌo xi̱to ndoso ya ra xaꞌa Jesucristo. Saa kaꞌan ndioxi ni tu ndo xiꞌin na veꞌe ra Aristóbulo va. 11Kaꞌan ndioxi tu ndo xiꞌin ra Herodión, ra taꞌan i. Saa kaꞌan ndioxi ni tu ndo xiꞌin na veꞌe ra Narciso, na kándixa Tata yo ku na. 12Saa kaꞌan ndioxi tu ndo xiꞌin yá kuꞌva yo yá Trifena xiꞌin yá Trifosa, ndee ni ndee xa̱a chiñu ná ñaa nuu Tata yo Jesús. Saa kaꞌan ndioxi ni tu ndo xiꞌin yá kuꞌva yo yá Pérsida, yá kúꞌvi ni ini i xíni i, saa chi ndee ni ndee xa̱a chiñu tu yá ñaa va xiꞌin nde nuu Tata yo Jesús. 13Saa kaꞌan ndioxi tu ndo xiꞌin ra Rufo, chi vaꞌa ni taa ku ra, ra ndi̱kaxin Ndioxi ku ra. Ta kaꞌan ndioxi tu ndo xiꞌin siꞌí va ra, tá káa siꞌí mií i saa káa yá. 14Kaꞌan ndioxi tu ndo xiꞌin ra ñani yo ra Asíncrito va, xiꞌin ra Flegonte, xiꞌin ra Hermas, tin ra Patrobas, xiꞌin ra Hermes, tin ndiꞌi ka naꞌa, na ndíkun Jesucristo ítaꞌan xiꞌin na. 15Saa kaꞌan ndioxi tu ndo xiꞌin ra Filólogo, xiꞌin yá kuꞌva yo yá Julia, xiꞌin ra Nereo, xiꞌin yá kuꞌva ra, saa tu ra Olimpas, saa tu ndiꞌi ka na ñani yo tin kuꞌva yo na ítaꞌan xiꞌin na.

16Saa ndóꞌo̱, ñani yo xiꞌin kuꞌva yo, kaꞌan ndioxi ndo xiꞌin taꞌan ndo, vaꞌa chutu ndo nuu taꞌan ndo xiꞌin ya toꞌo, xiꞌin ya vaꞌa, ya kúꞌvi ni ini ndo xíni taꞌan ndo. Saa kaꞌan ndioxi ni tu ndo xiꞌin ndiꞌi ni kúu na veꞌe ñuꞌu, na ndíkun Jesucristo xiꞌin va ndo.

17Ñani yo xiꞌin kuꞌva yo, xíkan ni i ya mani nuu ndo, kundaa ni ndo mií ndo nuu naꞌa, na táꞌvi naꞌa veꞌe ñuꞌu. Kuenta ni koo ndo xiꞌin na, saa chi köo íyo yuꞌu na xiꞌin ya si̱naꞌa nde ndóꞌo̱, ta kúni na ndi̱kasi na nuu ndo ya ná kändixa ndo tuꞌun vaꞌa xaꞌa Jesucristo. Kuxika ndo nuu na ñaa, kütaꞌan ndo xiꞌin na. 18Naꞌa na íkan saa, ta köo ndíkun na Jesucristo, ndisaa ya kúni mií na íkan na. Vaꞌa ni káꞌan na, luvi ni káꞌan na ya síndaꞌvi na naꞌa, na kándixa ndiꞌi ndá ka mií ñaꞌa ya xíni soꞌo na. 19Yakan kúsini ni i xiꞌin ndo, saa chi ndiꞌi naꞌa xíni ya vaꞌa ni xáa súvi ndo ya kúni Ndioxi. Ta saa káꞌan i xiꞌin ndo ya ndíchi ni ná koo ndo ya ikan ndo ya vaꞌa, ta nda loꞌo xäa ndíchi ndo mií ndo ya ikan ndo ya väꞌa. 20Ta Iva yo Ndioxi, ra táxi íyo ya vaꞌa ini yo, kama ni sindiꞌi xaꞌa ra kiti nǎꞌa náni Satanás, kuaxin xaꞌa ra ri, saa chi̱nduꞌu ra ri tixin xaꞌa ndo. Ta ná chikaa ni Tata yo Jesucristo ya vaꞌa ndóꞌo̱.

21Ta saa káꞌan ndioxi ni tu ra ñani yo ra Timoteo, ra ítaꞌan xiꞌin i xáa chiñu nde nuu Tata yo Jesús va. Xiꞌin nda taꞌan i, ra ñani yo ra Lucio, tin ra Jasón, xiꞌin ra Sosípater, káꞌan ndioxi ni tu nda ikán va xiꞌin ndo.

22Yeꞌe, ñani ndo ra Tercio ku i táa tutu yóꞌó. Táa i ya káꞌan ra ñani yo Pablo xiꞌin i. Saa tu yeꞌe va káꞌan ndioxi ni i xiꞌin ndiꞌi ndóꞌo̱ ndíkun Tata yo Jesús.

23Saa tíꞌvi tu ra ñani yo, ra Gayo, tuꞌun mani xaa nuu ndo. Veꞌe ra Gayo yóꞌó ku nuu íyo yeꞌe Pablo vitin. Ta táxi ra veꞌe ra nuu ndíkitaꞌan ndiꞌi nde veꞌe ñuꞌu. Saa tíꞌvi tu ra Erasto, ñani yo, tuꞌun mani xaa nuu ndo. Ra ikán ku tesorero, ra ndíso chiñu xiꞌin xuꞌun ñuu. Ta tíꞌvi tu ra ñani yo ra Cuarto va, tuꞌun mani xaa nuu ndo, ya káꞌan ndioxi ra xiꞌin ndo. 24Ná ikan ni Tata yo Jesucristo ya vaꞌa xiꞌin ndo. Saa ná koo.

Xáa kaꞌnu ni ra Pablo Ndioxi

25Ta ná xaa toꞌo yo Ndioxi chi mií ra ku ra chíndee yoo, táxi ra ndee ndaꞌa ndo ya tuun ni ndíkun ndo tuꞌun vaꞌa xaꞌa Jesucristo, ya ndítuꞌun i xiꞌin ndo. Tuꞌun vaꞌa yóꞌó kua ndi̱xiyo sěꞌe xinaꞌa, ta vitin si̱naꞌa tuvi Ndioxi ya nuu yo. 26Vitin táxi Ndioxi ya kundaa ini naꞌa xiꞌin tuꞌun ya ta̱a nda profeta, nda ndi̱kaꞌan ndoso tuꞌun yuꞌu Ndioxi xinaꞌa. Saa chi Ndioxi, ra táku ndiꞌi saa kivi, ta kúni ra ná kundaa ini ndiꞌi ni kúu naꞌa, na köo kúu judío xaꞌa tuꞌun ra. Saa kuchiñu na kandixa ni na ra, ta xaa súvi na ya káꞌan ra. 27Iindaa mituꞌun ku Ndioxi, ta iin mií ra ku ra ndíchi ni. Saa ná kunuu vaꞌa ni ya toꞌo ra ndiꞌi saa kivi ya vaxi, xaꞌa ya i̱kan Jesucristo. Saa ná koo.

Currently Selected:

ROMANOS 16: xta

Highlight

Copy