Los Hechos 25

Ndi̱xaa ra Pablo nuu ra Festo

1Saa ndi̱kunduꞌu ra Festo kaꞌnda chiñu ra kúu ra gobernador. Tá ndi̱xinu uni kivi ndi̱kunduꞌu ra, saa ke̱e ra ñuu Cesarea kuaꞌan ra ñuu Jerusalén. 2Tá ndi̱xaa ra ta ndi̱kitaꞌan nda sutu naꞌnu xiꞌin nda judío, nda kúnaꞌnu ñuu nda saa táxi nda kuachi xaꞌa ra Pablo. 3Ndi̱xikan nda ya mani nuu ra gobernador ya ná kundaka nda lapa ra Pablo kuꞌun ra ñuu Jerusalén kunani kuachi ra. Saa chi xa chi̱taꞌan tuꞌun nda kaꞌni nda ra ichí. 4Saa ndi̱kuiin ra Festo yuꞌu nda káꞌan ra xiꞌin nda:

―Ñuu Cesarea vi ndíkaa ra veꞌe kàà ta ya ndíkani ini i kua kama ni va ndiko koo i kuꞌun i ―káchi ra xiꞌin nda.

5Saa ndi̱kaꞌan tu ra xiꞌin nda káchi ra saa:

―Vaꞌa kuꞌun sava nda ndíso chiñu nuu ndo xiꞌin i, tá tu ndá ya väꞌa i̱kan ra ta vaꞌa taxi ndo kuachi xaꞌa ra ndaꞌa i ―káchi ra xiꞌin nda.

6Saa kua̱chi ra iin kuꞌva una án uxi kivi, saa ndi̱ko koo ra ñuu Cesarea. Tá ndi̱tuvi inka kivi ta ndi̱kunduꞌu ra nuu tai toꞌo, saa xa̱ꞌnda ra chiñu ya kuꞌun na tava na ra Pablo kixi ra nuu ra. 7Saa ndi̱xaa ra Pablo nuu ra. Tá kuakiꞌvi ra nuu índuꞌu mií ra gobernador ikán, ñaa ndi̱katin ndiꞌi nda judío nda ke̱e ñuu Jerusalén táxi nda kuachi xaꞌa ra, ta kuaꞌa ni kuachi ndee chíkaa ñaꞌa nda, sundi köo ya ndíkuiin xaꞌa ya káꞌan nda xaꞌa ra. 8Saa ndi̱kuiin ra Pablo káchi ra saa:

―Nda iin ya köo ndi̱kan i, ni xaꞌa ley Ndioxi ya ta̱a ra Moisés köo ndi̱kanaꞌa i, ni xaꞌa veꞌe ñuꞌu kaꞌnu köo ndi̱kaꞌan i, ni xaꞌa ra rey César kaꞌnu ñuu Roma köo ya ndi̱kaꞌan i ―káchi ra xiꞌin nda.

9Ta xaꞌa ya kúni ra Festo kindoo vaꞌa ra xiꞌin na judío, saa ndi̱ndakan tuꞌun ra ra Pablo, káchi ra saa:

―¿Án kúni un kuꞌun un ñuu Jerusalén ya xaa nani i kuachi un xiꞌin un ñuu ikán? ―káchi ra xiꞌin ra.

10Ñaa ndi̱kuiin ra káꞌan ra:

―Küvi kuꞌun i ikán chi xa nuu mií un kua íyo i vitin ta xa ku tu mií va un ichí ra rey César ya xaa nani un kuachi i xiꞌin yóꞌó. Ta xa xíni un köo kuachi i íyo xiꞌin na judío. 11Tá tu ndá ya ndee i̱kan i káꞌan ya kuvi i, ta vaꞌa kuvi va i, köo íꞌvi i kuvi i. Sundi tá köo kuachi i íyo ta nda iin naꞌa köo ichí taxi na yeꞌe ndaꞌa na judío yóꞌó. Sundi vitin xíkan i ya mani nuu un, vaꞌa tiꞌvi un yeꞌe kuꞌun i ndaꞌa ra rey kaꞌnu ñuu Roma ya ná xaa nani ra ikán kuachi i xiꞌin i ―káchi ra Pablo xiꞌin ra gobernador Festo.

12Saa ndu̱ku ra Festo xiní nuu na chiñu ndóo xiꞌin ra mi veꞌe chiñu, ñaa ndi̱kaꞌan ra xiꞌin ra Pablo, káchi ra saa:

―Vaꞌa chi mií un ndi̱kaꞌan xiꞌin i kuꞌun un nuu ra rey kaꞌnu ñuu Roma xaa nani ra kuachi un, ta vaꞌa tiꞌvi nde yóꞌo̱ kuꞌun un nuu ra ―káchi ra Festo xiꞌin ra Pablo.

Káꞌan ra Pablo xiꞌin ra rey Agripa

13Ndi̱yaꞌa uvi ndáa kivi ta ndi̱xaꞌan ra rey Agripa xiꞌin yá Berenice ñuu Cesarea, ndi̱xaꞌan na xíto na ra Festo. 14Saa ndi̱xiyo naꞌá na xiꞌin ra, ñaa ndi̱tuꞌun ra Festo xiꞌin ra rey Agripa xaꞌa ra Pablo, káchi ra saa:

―Íyo iin ra taa si̱ndikoo ra Félix veꞌe kàà. 15Tá ndi̱xaꞌan i ñuu Jerusalén ta ta̱xi nda sutu naꞌnu xiꞌin na xikuaꞌa nuu na judío kuachi xaꞌa ra ndaꞌa i ta káꞌan na xaꞌa ra kuvi ra, káchi na xiꞌin i. 16Saa ndi̱kuiin i káꞌan i xiꞌin na: “Ndeꞌe Roma ta köo íkan nde saa chi köo táxi nde kuvi iin taa tá tu täꞌan kaꞌan nuu taꞌan na, nuu ndikuiin ra kaꞌan ra xaꞌa ra xiꞌin na táxi kuachi xaꞌa ra”, káchi i xiꞌin na. 17Xaꞌa ya ikán kua ni köo ndi̱xindatun i. Tá ndi̱xaa na nuu i inka kivi ta ka̱na i ra Pablo ndi̱xaa ra nuu i ya xaa nani i kuachi ra xiꞌin ra. 18Ñaa xa̱á na táxi na kuachi xaꞌa ra ndaꞌa i. Án ndee ni káa ya kaꞌan na xiꞌin i xaꞌa ra, káꞌán i. Ta süvi ya ndee vi kua káꞌan na xaꞌa ra. 19Kuachi xaꞌa ñaꞌa íkan mií na judío va kua, káni taꞌan na xaꞌa ya síin káa ya kándixa na, ta síin kua sínaꞌa ra Pablo. Chi káꞌan ra xaꞌa iin ra náni Jesús ndi̱xiꞌi ra ta ndi̱taku ra, káchi ra Pablo. 20Tá xi̱ni soꞌo i ya ndi̱kaꞌan na ta ni köo xíni i unkua ikan i xiꞌin kuachi taꞌan ya yóꞌó. Xaꞌa ya ñaa kua vaꞌa ka ndi̱kaꞌan i xiꞌin ra Pablo án kúni ra kuꞌun ra ñuu Jerusalén xaa nani i kuachi xiꞌin ra, káchi i. 21Ta köo ndi̱xiin ra kuꞌun ra ñuu Jerusalén, vaꞌa ka nuu mií ra rey Augusto ñuu Roma va kuꞌun ra, káchi ra xiꞌin i. Xaꞌa ya ikán kua xa̱ꞌnda i chiñu ndikaa ka ra veꞌe kàà. Ta nda ná xaa nduvi ndiꞌi i ndá kuꞌva koo kuꞌun ra ñuu Roma, nda saa vi tiꞌvi i ra kuꞌun ra ―káchi ra Festo xiꞌin ra rey Agripa.

22Saa ndi̱kuiin ra rey Agripa, káchi ra saa:

―Kúni tu yeꞌe va kuni soꞌo i ndá kuꞌva ndítuꞌun ra ―káchi ra.

Saa ndi̱kuiin ra Festo káꞌan ra:

―Vaꞌa, taan kuni soꞌo un kaꞌan ra ―káchi ra.

23Ñaa ndi̱tuvi xitaan ta ndi̱xaa ra rey Agripa xiꞌin yá Berenice veꞌe chiñu. Ndee ni kuaꞌa mií na chiñu ítaꞌan xiꞌin na ndi̱xaa xiꞌin na ya xáa toꞌo ñaꞌa na. Ñaa xa̱ꞌnda ra Festo chiñu nuu na ya ta̱va na ra Pablo xaa ra nuu na. 24Tá ndi̱xaa ra Pablo nuu na, saa xa̱á ra Festo káꞌan ra:

―Tata, rey Agripa, xiꞌin ndiꞌi na taꞌan yo na ndóo yóꞌó, vitin xíto xiꞌin nuu ndo ra yóꞌó. Ra yóꞌó ku ra táxi na judío kuachi xaꞌa ndaꞌa i tá ndi̱xaꞌan i ñuu Jerusalén. Saa tu tá ki̱xi na ñuu Cesarea yóꞌó va, ta káꞌan ni na xaꞌa ra köo xíniñuꞌu ka ra kutaku ra, káchi na. 25Ta köo kuachi ra níꞌi i ya káꞌan xaꞌa ra kuvi ra. Ta kúni ra kuꞌun ra nuu ra rey Augusto ñuu Roma ya xaa nani ra ikán kuachi xiꞌin ra, káchi ra. Ta ndátun i tiꞌvi i ra kuꞌun ra ikán. 26Ta köo kúndaa ini i ndá kuachi kua taa i xaꞌa ra nuu tutu ya tiꞌvi i ra kuꞌun ra ndaꞌa ra rey ikán. Xaꞌa ya ñaa kua ka̱na i ndóꞌo̱ ndi̱kitaꞌan ndiꞌi ndo ndóo ndo yóꞌó vitin ya kuni soꞌo ndo káꞌan ra, ta yóꞌo̱ Tata rey Agripa, vaꞌa sinaꞌma un ra saa kundaa ini i unkua taa i xaꞌa ra. 27Chi ndíkani ini i ta väꞌa náꞌa ya tiꞌvi i iin preso kuꞌun ra, tá köo iin tutu nuu káꞌan ya xaꞌa ra, ndá kuachi kua táxi na xaꞌa ra ―káchi ra Festo xiꞌin na.

Currently Selected:

Los Hechos 25: xta

Highlight

Copy