Los Hechos 26

Káꞌan ra Pablo xiꞌin ra rey Agripa

1Ta saa ndi̱kaꞌan ra rey Agripa xiꞌin ra Pablo, káchi ra saa:

―Vaꞌa, kaꞌan un ndikuiin un xaꞌa un vitin ―káchi ra xiꞌin ra.

Saa nda̱niꞌi ndaꞌa ra Pablo nuu na, ñaa xa̱á ra káꞌan ra xiꞌin na, káchi ra saa:

2―Tata, Rey Agripa, kúsini ni i íkan un ya vaꞌa xiꞌin i, chi táxi un kaꞌan i xiꞌin un xaꞌa i, ndá xaꞌa kua táxi na judío kuachi xaꞌa i. 3Yóꞌo̱ ku ra xíni vaꞌa xaꞌa ñaꞌa ya íkan ndeꞌe judío ta kúndaa vaꞌa ini un xaꞌa ñaꞌa ya köo íyo yuꞌu nde xiꞌin. Ta xaa kaꞌnu ini un, kuaꞌa loꞌo un ndee ya kuni soꞌo un ná kaꞌan i xiꞌin un ―káchi ra Pablo.

Káꞌan ra Pablo ndá kuꞌva i̱kan ra tá täꞌan ndi̱kundikun ra Jesús

4’Ndiꞌi na judío xíni ndá kuꞌva ndi̱xiyo i xiꞌin na taꞌan i, saa tu tá ndi̱xiyo i ñuu Jerusalén va. 5Xíni vaꞌa na yeꞌe, tá tu kúni na ndikuiin na xaꞌa ya káꞌan i ta vaꞌa kaꞌan na xaꞌa i, chi yeꞌe ta nda tá xaꞌa vi xa̱á i kándixa ni i ichí na fariseo, saa chi na ikán ku na ndee ni tuun xáa súvi ley ndeꞌe judío. 6Ta vitin táxi na kuachi xaꞌa i, xaꞌa ya kándixa i ya ki̱ndoo Ndioxi xaa súvi ra xiꞌin xii sikua yo, 7nda xinaꞌa iin saa nda kivi vitin ndátun na ñuu yo ya ki̱ndoo Ndioxi xaa súvi ra xiꞌin uxi uvi saa nda kúu seꞌe sikua ra Israel. Ta xaꞌa ya ikán kua káñuꞌu ni na Ndioxi nduvi niuun. Ta suvi xaꞌa ya ikán kua táxi na kuachi xaꞌa i vitin, Tata Rey Agripa. 8Ta ndiꞌi ndóꞌo̱ ndi̱kitaꞌan ndóo yóꞌó ta ¿ndachu ndíkani ini ndo ndíchi ni saa sitaku Ndioxi na ndíi xa ndi̱xiꞌi, káꞌán ndo? ―káchi ra Pablo.

Ndítuꞌun ra Pablo ndá xaꞌa kua xa̱a nduvaꞌa ra xiꞌin na ndíkun Jesús

9Saa káꞌan ka ra Pablo xiꞌin na, káchi ra saa:

―Soꞌva ndi̱kani ini yeꞌe tá yachi xaꞌa kivi Jesús, ra ñuu Nazaret. Ndi̱kani ini i ya xíniñuꞌu i sindiꞌi xaꞌa i ichí ikán. 10Saa i̱kan i xiꞌin na ndíkun Jesús ndóo ñuu Jerusalén, si̱tixuꞌvi ni i na. Ndu̱ku i tutu nuu nda sutu naꞌnu veꞌe ñuꞌu kaꞌnu ya taxi nda ichí ndaꞌa i tiin i na taan i veꞌe kàà. Ta saa i̱kan i xiꞌin na, kuaꞌa ni na i̱í ta̱an i veꞌe kàà. Saa tu tá xa̱ꞌni na sava nda ikán, ndi̱xiyo yuꞌu i xiꞌin nda xa̱ꞌni ñaꞌa. 11Kuaꞌa ni ichí ndi̱xika i iin iin veꞌe ñuꞌu sinagoga xa̱a nduvaꞌa ni i xiꞌin na ndíkun Jesús ya kúni i ná ndiko koo ini na xaꞌa ya kándixa na ra. Ndi̱saa ni ini i xi̱ni i na, nda inka ñuu ya ñúꞌu xika ni xi̱ndikun i ndi̱xika i sata na ya kúni i sindiꞌi xaꞌa i na.

Ndíkani ra Pablo ndá kuꞌva xi̱ni taꞌan ra xiꞌin Jesús

(Hch. 9:1-19; 22:6-16)

12’Saa ku̱u iin ichí ke̱e i kuaꞌan i ñuu Damasco. Ta níꞌi i iin tutu ta̱xi nda sutu naꞌnu ndaꞌa i nuu táxi nda ichí ndaꞌa i ya tiin i na ndíkun Jesús. 13Tá xíka i kuaꞌan i ñuu ikán ta saa ka̱ꞌñu va, Tata Rey. Ñaa xi̱ni i iin ñu̱ꞌu̱ ke̱ta ya nuu ndivi, ndakua yéꞌe̱ taxan ya, ndee ka yéꞌe̱ ya ikán nuu ñu̱ꞌù. Ta iin ndi̱kava nduu ndiꞌi ya sata i xiꞌin nda kuaꞌan xiꞌin i. 14Ñaa ndi̱koyo ndiꞌi nde kuaꞌan nde nuu ñuꞌú, saa xi̱ni soꞌo i tachi iin taa káꞌan ra xiꞌin i tuꞌun hebreo, káchi ra saa: “Saulo, Saulo, ¿ndachu kua ndíkun un xíka un sata i sítixuꞌvi un yeꞌe? Tá íkan sindiki ri kéta xaꞌa itun káni na ri, saa íkan un, chi sítixuꞌvi un mií va un”, káchi ra xiꞌin i. 15Saa ndi̱kuiin i káꞌan i xiꞌin ra: “¿Unku yóꞌo̱, Tata?”, káchi i xiꞌin ra. Saa ndi̱kuiin ra káꞌan ra xiꞌin i: “Yeꞌe ku Jesús ra ndíkun un xíka un sítixuꞌvi un. 16Ta kuandikoo kundichi un, chi yeꞌe ta ndi̱tuvi i nuu un kaꞌan i xiꞌin un ya ndi̱kaxin i yóꞌo̱ xaa chiñu un nuu i. Ta saa ndikuiin un xaꞌa i kaꞌan un xiꞌin naꞌa xaꞌa ya ndi̱tuvi i nuu un kivi vitin, saa tu ya sinaꞌa ka i nuu un vaxi tiempo. 17Ta ku ïꞌvi un chi yeꞌe ta sikaku i yóꞌo̱ ndaꞌa na judío ñuu un xiꞌin na köo kúu judío nuu tíꞌvi i yóꞌo̱ kuꞌun un, 18ya kuna un nuu na, sindiko koo un na kixi na nuu i, nuu yéꞌe̱, saa saña na ndaꞌa ndee kiti nǎꞌa ta ndikundikun na ichí Ndioxi, kandixa na yeꞌe saa xaa kaꞌnu ini Ndioxi xaꞌa kuachi na, saa kuchiñu na koo na xiꞌin na i̱í na ndíkun ichí i”, káchi Jesús xiꞌin i ―ka̱chi ra Pablo xiꞌin ra rey Agripa.

Xáa súvi ra Pablo ya ndi̱kaꞌan Jesús xiꞌin ra nuu si̱tuvi ya nuu ra

19Saa káꞌan ka ra xiꞌin ra rey Agripa, káchi ra saa:

―Ta yeꞌe, Tata Rey, köo ndi̱xaa soꞌo i xaꞌa ya ndi̱kaꞌan Jesús xiꞌin i tá ndi̱tuvi ra nuu i. 20Ndikun xa̱á i káꞌan i xiꞌin na, xiꞌna na ndóo ñuu Damasco xa̱á i káꞌan i xiꞌin, tá ndi̱ꞌi ikán ta xa̱á i káꞌan i xiꞌin na ndóo ñuu Jerusalén, saa ndi̱xaꞌan i ndiꞌi ka inka ñuu ya ñúꞌu estado Judea. Saa ke̱e tu i ndi̱xaꞌan i nda inka ñuu nuu ndóo na köo kúu judío. Ndi̱xaꞌan i ndi̱kaꞌan ndoso i xiꞌin na ya ná ndiko koo ini na nuu Ndioxi, saa ikan na ya vaꞌa xaꞌa ya ndi̱ko koo ini na nuu ra. 21Xaꞌa ya yóꞌó kua ti̱in na judío yeꞌe tá ndíkaa i yeꞌe veꞌe ñuꞌu kaꞌnu ñuu Jerusalén, ta kúni kaꞌni na yeꞌe. 22Ta Ndioxi chíndee yeꞌe ndiꞌi saa kivi, yakan vaꞌa táku i nda kivi vitin, ndíchi i nuu ndo. Ta káꞌan ndoso i tuꞌun Ndioxi xiꞌin na vali tin na naꞌnu. Ta köo ndi̱nama i ya káꞌan i xiꞌin na, tá kuꞌva ndi̱kaꞌan ra Moisés tin nda ndi̱kaꞌan ndoso tuꞌun yuꞌu Ndioxi xaꞌa ñaꞌa ya kuu kivi vaxi, saa íyo ya káꞌan i xiꞌin na. 23Chi nda ikán ta ndi̱kaꞌan nda xaꞌa Cristo ra ndi̱kaxin Ndioxi sikaku yoo. Ndoꞌo ni ra kuvi ra sundi ra ikán ku ra núnu̱ú nditaku nuu ndiꞌi na ndíi. Ta kaꞌan ra xiꞌin na ndá kuꞌva kaku na. Tá íkan ñu̱ꞌu̱ ndíyeꞌe saa koo ra, chi kuna ra nuu ndiꞌi yo kúu judío xiꞌin na köo kúu judío ya kundaa ini yo xaꞌa tuꞌun Ndioxi ―káchi ra Pablo xiꞌin ra rey Agripa.

Síxinu ra Pablo ini ra rey Agripa ya ná ndikundikun ra Jesús

24Tá ndi̱kaꞌan ra Pablo tuꞌun ikán nuu ndíkuiin ra xaꞌa ra, ta saa ndi̱kuiin ra Festo ndee ka vi káꞌan ra, káchi ra saa:

―¡Pablo, yóꞌo̱ sána va ku un, xaꞌa ya ka̱ꞌvi ni un yakan kuaꞌan ndúkiꞌvi un! ―káchi ra xiꞌin ra.

25Saa ndi̱kuiin ra Pablo káꞌan ra:

―Yóꞌo̱ Tata chiñu ra Festo, köo sána ini i, íyo vaꞌa va ini i. Ñúꞌu teꞌe ndiꞌi va ini i xaꞌa ya káꞌan i xiꞌin ndo, ya ndaa kua káꞌan i xaꞌa xiꞌin ndo. 26Yóꞌó íin ra rey Agripa ta kúndaa vaꞌa ini ra xaꞌa ya káꞌan i. Chi köo íyo sêꞌe ya káꞌan i xaꞌa xiꞌin ndo, yakan vaꞌa ndinuꞌu ni ini i káꞌan i xiꞌin ndo ―káchi ra Pablo xiꞌin ra Festo.

27Saa ndi̱kaꞌan ra Pablo xiꞌin ra rey Agripa, káchi ra saa:

―Tata, ¿án kándixa yóꞌo̱ ya ta̱a nda ndi̱kaꞌan ndoso tuꞌun yuꞌu Ndioxi xinaꞌa? Xíni i ya kúndaa ini un ya ndaa kua ta̱a nda ―káchi ra Pablo xiꞌin ra.

28Saa ndi̱kuiin ra rey Agripa káꞌan ra xiꞌin ra Pablo:

―¿Án loꞌo ya ndi̱kaꞌan un saa kua sixinu un ini i kiꞌvi i ichí Jesús xiꞌin un, káꞌán un? ―káchi ra.

29―¡Án siloꞌo án kuaꞌa sixinu i ini un, Ndioxi ná kachi ta ndikundikun un ichí ra saa tu ndiꞌi na ndóo xíni soꞌo ya káꞌan i, ta ná nduu na tá kuꞌva íyo yeꞌe, sundi süvi tá kuꞌva núꞌni i xiꞌin cadena yóꞌó! ―káchi ra Pablo xiꞌin na.

30Saa tá si̱ndiꞌi ra Pablo ndi̱kaꞌan ra tuꞌun ikán, ta ndi̱kundichi ra rey Agripa xiꞌin ra gobernador Festo tin yá Berenice xiꞌin ndiꞌi na ndóo xiꞌin na, ndi̱kundita na 31ka̱na koo na veꞌe chiñu kuaꞌan na ta káꞌan xiꞌin taꞌan mií na káchi na saa:

―Nda iin ya ndee köo ndi̱kan ra ya kuvi ra, ni veꞌe kàà köo xíniñuꞌu ra ndikaa ra ―káchi na xiꞌin taꞌan na.

32Saa ndi̱kaꞌan ra rey Agripa xiꞌin ra gobernador Festo, káchi ra saa:

―Vaꞌa va sa̱ñá ra kuꞌun ra tá tu köo ndi̱kaꞌan ra xiꞌin un tiꞌvi un ra kuꞌun ra ndaꞌa ra rey César kaꞌnu ñuu Roma ya xaa nani ra ikán kuachi ra, ndíkuu ―káchi ra rey Agripa xiꞌin ra Festo.

Currently Selected:

Los Hechos 26: xta

Highlight

Copy