Los Hechos 24

Ndíkuiin ra Pablo káꞌan ra xaꞌa ra nuu ra gobernador Félix

1Tá ndi̱yaꞌa uꞌun kivi saa ndi̱xaa ra Ananías, ra ínuu nuu ndiꞌi nda sutu xiꞌin sava na xikuaꞌa tin iin ra licenciado ndíchi xiꞌin na, ra nani Tértulo. Ndi̱xaa nda nuu ra gobernador Felix ya taxi nda kuachi xaꞌa ra Pablo. 2Saa tá ndi̱xaa ra Pablo nuu ndi̱kitaꞌan na, ta xa̱á mií ra licenciado ikán táxi ra kuachi xaꞌa ra ndaꞌa ra gobernador, káchi ra saa:

―Ndixaꞌvi ni un Tata, Félix chi xaꞌa ya vaꞌa ni xáa chiñu un ta nda ndeꞌe vaꞌa ni ndóo nde, köo kuachi xiꞌin nde, saa chi ndíchi ni un ta vaꞌa ni xáꞌnda chiñu un. 3Iyo vaꞌa ni ini nde xiꞌin un Tata, chi ndiꞌi ni kúu ñaꞌñu ta vaꞌa ni ndóo ivi. Yakan vaꞌa ni kúni nde xiꞌin un. 4Kuaꞌa ni va ya kaꞌan i xiꞌin un Tata, ta naꞌá ni kua, ndá xaa kaꞌnu ini un ná kaꞌan loꞌo nde xiꞌin un va un. 5Ra Pablo yóꞌó ta süvi ra vaꞌa ku ra, ndi̱taꞌan nde ra xíka ra táꞌvi ra na ñuu nde, ndiꞌi ni kúu ñuu xíka ra táꞌvi ra na. Mií ra ku xiní xiꞌin na vata, na káꞌan na xaꞌa nani nazareno. 6Iin kivi ndi̱taꞌan nde ra ndíkaa ra ini veꞌe ñuꞌu kaꞌnu, ta kúni ra xaa kini ra ini ya, saa chi ta̱an ra na inka ñuu ini ya. Xaꞌa ya ikán kua ti̱in nde ra ta ku̱ni nde xaa nani mií nde kuachi xiꞌin ra tá kuꞌva káꞌan ley mií nde. 7Sundi ra Claudio Lisias, ra ndíso chiñu xiꞌin nda lapa ta ya mani uꞌvi ndi̱kiꞌvi ra maꞌñu nde ki̱ndaa ñaꞌa ra ndaꞌa nde. 8Ta ti̱ꞌvi ñaꞌa ra va̱xi ra ndaꞌa un, saa ndi̱kaꞌan ra xiꞌin ndeꞌe táxi kuachi xaꞌa ra ya xínuñuꞌu nde kixi nde nuu un yóꞌó ya xaa nani un kuachi xiꞌin nde. Vaꞌa kaꞌan tu mií va un xiꞌin ra saa kundaa vaꞌa ini un ya ndixa kua káꞌan nde xaꞌa ra xiꞌin un ―káchi ra.

9Tá ndi̱kaꞌan mií ra licenciado ikán, saa ndi̱kaꞌan tu mií nda judío ikán va. 10Ñaa i̱kan ra gobernador ikán seña nuu ra Pablo ya kaꞌan ra. Saa ndi̱kuiin ra Pablo káchi ra saa:

―Tata gobernador, xa kuaꞌa ni kuiya xáa chiñu un xiꞌin na ñuu nde ta xáa nani un kuachi xiꞌin nde. Ta vitin kúsini ni i ndituꞌun i xiꞌin un nuu ndikuiin i kaꞌan loꞌo i xiꞌin un xaꞌa i. 11Köo uꞌvi kundaa ini vi un, kivi vitin kua xínu uxi uvi kivi ya ndi̱xaꞌan i veꞌe ñuꞌu kaꞌnu ñuu Jerusalén, káꞌan i xiꞌin Ndioxi. 12Ta köo ndi̱taꞌan na yeꞌe kánitaꞌan i xiꞌin naꞌa ini veꞌe ñuꞌu kaꞌnu, ni naꞌa köo ndi̱taa sii i ini veꞌe ñuꞌu sinagoga ni ñuu Jerusalén köo ñaꞌa ndi̱kan. 13Süvi ya ndaa kua káꞌan nda xaꞌa i xiꞌin un, nda iin ñaꞌa ndíkuiin xaꞌa ya káꞌan nda xaꞌa i köo ya ndaꞌa nda. 14Sundi ya ndíkuiin i xaꞌa ku ya yóꞌó: ya ndaa kua ndíkun i ichí Jesús, ta nda yóꞌó táxi nda kuachi xaꞌa i xaꞌa ya ñaa, chi ya vata ku ya, káchi nda. Ta yeꞌe káñuꞌu i Ndioxi tá kuꞌva ka̱ñuꞌu xii sikua i. Saa chi kándixa ndiꞌi i ya káꞌan ley xiꞌin ya ta̱a nda ndi̱kaꞌan ndoso tuꞌun yuꞌu Ndioxi xinaꞌa. 15Chi yeꞌe ta kándixa i ya sitaku Ndioxi na ndíi, nditaku na vaꞌa tin na väꞌa ikan ra. Ta saa tu mií va na, kándixa na taꞌan ya yóꞌó. 16Xaꞌa ya kándixa i ya ñaa yakan kua kíꞌin ni i kuenta xaꞌa ñaꞌa íkan i nuu Ndioxi xiꞌin nuu na ñuu ivi yóꞌó.

17’Ta xa kuaꞌa ni kuiya ke̱e i xíka i inka ñuu, ta nda vitin ndi̱ko koo tuku i ñuu i yakan ndi̱xaꞌan i táxi i loꞌo xuꞌun ndaꞌa na ndaꞌvi saa sóko loꞌo i ñaꞌa nuu Ndioxi va. 18Tá si̱ndiꞌi i xa̱a súvi i ya káꞌan ley nde ya kindoo vaꞌa i nuu Ndioxi saa ndi̱xaa sava nda judío nda ke̱e chí estado Asia ndi̱taꞌan nda yeꞌe yéꞌe veꞌe ñuꞌu kaꞌnu. Sundi nda iin ya köo íkan i tá ndi̱taꞌan nda yeꞌe, ni naꞌa köo na táa sii i ndíkaa i. 19Ta vaꞌa ná kixi nda ikán, taxi nda kuachi xaꞌa i ndaꞌa un, ta ná kaꞌan nda ndá kuachi kua íyo nda xiꞌin i. 20Tá tu köo, ta vaꞌa ná kaꞌan tu mií nda ndóo yóꞌó va ndá kuachi kua ndi̱taꞌan nda yeꞌe tá ndi̱xaꞌan i ndi̱kaꞌan i nuu na chiñu naꞌnu. 21Iin ya yóꞌó kua ndiyaꞌa loꞌo i chi nda̱niꞌi i tuꞌun i ndi̱kaꞌan i xiꞌin na chiñu ya kándixa i ndítaku na ndíi ta án xaꞌa ya yóꞌó kua táxi nda kuachi xaꞌa i ―káchi ra Pablo.

22Saa tá xi̱ni soꞌo ra gobernador Félix ya ndi̱kaꞌan ra Pablo ta köo ndi̱saña ñaꞌa ra, vani xa xíni vaꞌa ra xaꞌa ichí ya kándixa ra Pablo, ta kataꞌnu ra kivi xiꞌin nda ikán, káchi ra saa:

―Kundatun ndo nda ná kixi ra Claudio Lisias, ra kaꞌnu ndíso chiñu xiꞌin nda lapa. Saa kundaa vaꞌa ka ini i nuu ra xaꞌa ya káꞌan ndo, ta saa xaa nani i kuachi xiꞌin ndo, káchi ra xiꞌin nda.

23Saa xa̱ꞌnda mií ra gobernador ikán chiñu nuu iin ra ndíso chiñu xiꞌin nda lapa, ya ná kundaa nda ra Pablo, sundi ná taxi nda kaka ndíka ra, ta saa ná kiꞌvi na taꞌan ra koto ñaꞌa na ―káchi mií ra gobernador ikán.

24Ndi̱yaꞌa uvi ndaa kivi, saa ndi̱xaa suvi mií ra gobernador Félix ikán xiꞌin yá síꞌi ra, yá Drusila, ta yá judío ku yá. Saa xa̱ꞌnda ra chiñu ya ná kana na ra Pablo ndi̱tuꞌun ra xiꞌin na ndá kuꞌva xáa na kandixa na ichí Jesucristo. 25Saa ndi̱xaꞌan ra Pablo ndi̱tuꞌun ra xiꞌin na, ndi̱kaꞌan ra ya xíniñuꞌu naꞌa ikan na ya ndaa, ta saa xíniñuꞌu na ndixita na mií na nuu ya väꞌa, chi vaxi kivi ta taxi Ndioxi kuachi xaꞌa ndiꞌi na íkan ya väꞌa, káchi ra. Saa ndi̱ndiꞌvi ni ra Felix ikán saa ndi̱kaꞌan ra xiꞌin ra Pablo káchi ra saa: Vaꞌa kuaꞌan, tá ná kunaꞌa i saa kana i yóꞌo̱ kixi un ndituꞌun ka un xiꞌin i ―káchi ra xiꞌin ra Pablo.

26Saa ndíkani ini ra gobernador ikán án sana taxi loꞌo ra Pablo xuꞌun ndaꞌa ra ya tava ñaꞌa ra, káꞌán ra. Yakan tutuku kána ñaꞌa ra káꞌan ra xiꞌin ra. 27Uvi kuiya i̱kan ra saa xiꞌin ra ñaa ndi̱xinu kuiya ku̱u mií ra chiñu ta ke̱ta ra. Saa ndi̱kiꞌin inka ra náni Porcio Festo chiñu nuu ra. Xaꞌa ya kúni ra Félix kindoo vaꞌa ra nuu na judío yakan köo ndi̱tava ra ra Pablo veꞌe kàà.

Currently Selected:

Los Hechos 24: xta

Highlight

Copy