YAKOBO 2

Muténdaa mwáata kalondo

1Banyaketu, kukulikana no'kwa mutúla mwemérere Enawetu Yesu Kirisito we'bulangare, muténdaa mwáira kalondo mwa bandu. 2Mulólaa: akaba mundu murebe àngengirira mwa lubuanano lwenyu, ěmbese chitanga cha horo na njimba sa sálangala. Chasinda, kwanêngirira na mukene, ola wěmbese biramba. 3Rero oyu wěmbese enjimba sálangala, mwánamweresa etunda mwa kumubura mbu: «Ékalaa anola mwa chisiki chìkomire!» Si emukene yeke, mwánamubura mbu: «Woyo, èmangaa, nesi ékalaa ala'shi mwa maulu manyi.» 4Mwa kuira bacha, mùtasene kwa kalondo ku mwáira mwa kachi-kachi kenyu? Kanji mwa kuira bacha, mùtasene kwa mwákoresibwa na mianyisa ibi?

5Banyaketu basiirwa mǔmvaa: Ongo álondwere ebakene muno butala, chasiya bábe baare mwa bwemeresi, babóne ne'mwandu we'bwami bwa álaanyaa ebandu ba batúla bàmusimire. 6Si emukene, mwabo mwénjire mwámukena! Abu baare, atá bu bénjire bábaenza mwa bine na kunde bábasitaka kwa tiribinali? 7Kanji atá bu bénjire bákamba esina libuya lya mwêresibwe?

8Mwénjire mwáira kubuya akaba mùngaira kwa ono Mwaso* we'bwami atúla àtechire mwa Maanjiko Mabuya-buya mbu: «Usímaa mulikenyu ngo'kwa utúla uchísimire weine.»#2:8 Somaa Balawi 19:18. 9Si akaba mùngende mwáira ekalondo eri mwaírire chibi. Aola, muményaa kwa mwàchinjibusibwe ne'Mwaso* bushi mùtatunjire'o. 10Bushi akaba emundu énjire áira kwa miomba* yoshi ye'Mwaso* ìtechire, chasinda ánaisha mu muuma oshâo, eri àishire mwa Mwaso* woshi. 11Bushi ola wátetaa mbu: «Uténdaa wábanda ekiri» iwánatetaa kanji mbu: «Uténdaa wêta.»#2:11 Somaa Kutenga 20:13-14; Bukengere 5:17-18. Rero, chiro ùngaba mbu ùtabanjire ekiri, si wechíre, uményaa kwa wàishire mwa Mwaso*.

12Mwa bacha, mango mwáteta nesi mwáira mwasi murebe, mundaa mwákengera kwa Ongo akábachinjibusa kukulikana ne'Mwaso* ola wénde wátweresa ebuhuru. 13Bushi ebandu ba bàtatusa bonjo mango báchinjibusa ebanji, Ongo nai atákabafire'bo. Si ola wénde wáfira ebanji ebonjo, àtobaa ebuchinjibusi.

Ebwemeresi ne'myanya

14Banyaketu, mutoloke muchiye ola mundu àngabona mango áteta mbu éte bwemeresi, no'ku aténjire álosa'bo kurengera bya áira? Obu bwemeresi bùngamununula? 15Mǔmvaa, akaba munyakenyu nesi mwaliwenyu mwa bwemeresi aínyire che'mbala nesi cha àngalya, 16chasinda, muuma mu mwabo ánamubura mbu: «Uéndaa ne'bôlo, úye kukalukala kwa muliro, unêute!», oyu mwasi éte mufa muchiye emango ùtamuasise ne'cha àlaire'ko? 17Rero ebwemeresi nabo kuno'ku. Ebwemeresi bwa buténjire bwálorekana'ko kurengera emyanya, eri bufíre.

18Emundu àngateta mbu: «woyo, wéte bwemeresi, nanyi nyéte myanya ibuya.» «Ùnyilosaa ebwemeresi bwao bwa butéte myanya ibuya, nanyi nyìkulose ebwemeresi bwanyi kurengera emyanya yanyi ibuya.» 19Woyo wemérere kwa kutúla Ongo muuma oshâo. Kubinali! Anabe ne'bihwasi nabi, binêmerere oyu mwasi, kanji byénde byánakukumana ne'buba! 20Woyo ùli mbuta! Wáhonda bàkulose kwa ebwemeresi bwa butéte myanya ibuya, butéte mufa? 21Hokulu wetu Aburahamu álorekanaa'ko kwa àli mundu ola ùtungenene era muhondo sa Ongo, kurengera emyanya yai ibuya, bushi ânaa emwana wai Isaka nga mitulo* ya kusiresesa kwa kahaha. 22Rero, ùtasene kwa ebwemeresi bwa Aburahamu, bwálorekanaa'ko kurengera emyanya yai ibuya, na mwe'i njira bwera kuba bwa bunálumirire kanangana.

23Bacha ku emyasi yǎnjikirwe mwa Maanjiko Mabuya-buya yábereraa: «Aburahamu êmereraa Ongo, na Ongo era kumuanja kwa àli mundu ola ùtungenene era muhondo sai.»#2:23 Somaa Ndangiriso 15:6. Kanji era kumwěrika mbu àli mwira wai.

24Si musene kwa kasi emundu énde álorekana'ko kwa àtungenene era muhondo sa Ongo kurengera bya áira, si atá kurengera ebwemeresi oshâo.

25Na Rahaba nai, cha chihungukasi kubyanabaa bacha. Ongo ámutolaa nga mundu ola ùtungenene era muhondo sai mango áhuukasaa endumwa se'Baisiraeli, chasinda, era kwôngolosa'bo kurengera inji njira. 26Kubinali! Emubiri ola utáli mu muka, eri afíre. Kuno'ku, ebwemeresi bwa butálorekana'ko kurengera emyanya nabo, eri bufíre.

Currently Selected:

YAKOBO 2: tbt

Highlight

Copy

Compare