YAKOBO 3

Ekulanga elulimi

1Banyaketu, mwa kachi-kachi kenyu, mùtabaa bandu banene ba báhonda kuba bakangirisi, bushi mwìshi kwa tu bakangirisi tukáchinjibusibwa busese kurenza ebanji. 2Tuboshi twénde twáira mabi mu njira sinene. Emundu ola ùtauwa mwa mitetere yai, oyola àli mundu ola ùlumirire kanangana, éte ne'buashi bwe'kulanga emubiri wai woshi. 3Twénde twábika chuma chieke mwa bunu bwe'farasi chasiya sitútunde. Mwa kuira bacha, twánaala kweka'si era tunásimire.

4Mulólaa: ne'mashuwa namo, chiro angaba mbu màli manene busese, kanji mêkibwa ne'chusi chikaliire, si ménde máenzibwa na ka chimbi kaeke ka lupao na kwêrekera era ola wénde waenza'mo asímire.

5Kuno'ku, elulimi nalo, chìri chitera chieke che'mubiri, si lùngachitonga ku myasi inenene. Mulólaa, engunye-kunye ye'muliro yénde yócha erungu linene. 6Rero, elulimi lùli nga muliro. Chìri chitera che'mubiri cha chèhwire mu chira bubi, kanji chénde châka emubiri woshi esinga. Elulimi lwénde lwásiresa ekalamo ketu, nalo lweine lwánasirera kurengera emuliro ola wátenga era kusimu.

7Ebandu bénde báala kulanga chira buko bwa nyama so'mwe'rungu, ne'milonge, na sa sénde sáendera kwa bula, ne'fi. Ebyera, ebandu bera banálangire'bi. 8Si elulimi lweke, kutáli mundu asibya ola ùngaala kulanga'lo, bushi kàli kandu kabi ka kàtachibombeka. Kanji lutúla lwehwíre mu sumu ya kwîta.

9Kurengera elulimi, twénde twátonga Enawetu Ongo, kanji i'Tata. Kanji kurengera olu lulimi luno'lu, twénde twátakira ebandu ba Ongo ábumbaa kwe'huhe lyai. 10Mwa bunu buuma mwénde mwátenga myasi ya ngahanyi, mwánatenga na ya bitaki. Rero banyaketu bitěmire kunde byába bacha. 11Shokororo nguma itàngana meshi ma màlokire na ma malula. 12Banyaketu, emuchi we'tini àngěka bifuma bya miseituni? Nesi emuchi we'musabibu* àngěka bifuma bye'tini? Kuno'ku ku eshokororo era yénde yâna emeshi me'munyu-munyu, itàngaala kwâna meshi ma màlokire.

Ebwenge bwa bùtengire kwa nguba

13Nde mwa kachi-kachi kenyu, ola ulí mundu wa bwenge? Endaa álosa'bo kurengera emyanya ibuya na bya áira mwa burembu no'mwa bwenge. 14Si akaba mwa michima yenyu mùngaba mwehwíre mufula, mwánaba na muchima wakaimano, aola múrekaa kunde mwa chitonga mbu mùli benge. Bushi ekuíra bacha, kùli kubindula ekanangana kuba bisha. 15Ebwenge bwa bùli ngo'bu, bùtatengire kwa nguba, si bunáli bwo'muno butala, kanji bwa bandu, bwánaba na bwa musimu. 16Bushi ala mufula ne'muchima we'kaimano bìri, we'kafango na chira bubi boshi nabi byénde byánaba.

17Si ebwenge bwa bùtengire kwa nguba, butúla tanga: bùkomisibwe*, kanji butúla bwa kureta bôlo, na kuira emundu kuba murembu, kanji butúla bwa kwâna ebandu. Ba batúsa obu bwenge, bénde báfirana bonjo busese na kukorerana emabuya. Bàtatusa kalondo bàtatusa na butebanyi. 18Ba bénde bábika ebandu mwa buuma, bénde báinga ebôlo. Na bya bénde báshebula itúla myasi era ìtungenene.

Currently Selected:

YAKOBO 3: tbt

Highlight

Copy

Compare