YAKOBO 1

Yakobo álamusa ebemeresi

1Nyono Yakobo, muanda wa Ongo kanji wa Enawetu Yesu Kirisito, nàbalamusise mu bandu ba Ongo, mu mùhandabanyire mwa butala boshi.

Ekuata ebushibirisi mwa miereko

2Banyaketu, mango mwárenga mwa miereko ya chira njira, mundaa mwáchumva nga mùli mwa lumoo, 3bushi mwìshi kwa ekuerekibwa kwe'bwemeresi bwenyu, ku kwénde kwátuma mwáata ebushibirisi. 4Si obu bushibirisi, kwémire bukóle emulimo wai kuikira kwa businda, chasiya múbe bandu ba batéte chibi chisibya, kanji bábanalumirire mwa byoshi, bàtainyire na kandu kasibya.

5Rero akaba muuma mu mwabo aínyire ebwenge, émaa'bo era mwa Ongo. Na Ongo angámwêresa'bo, bushi iwénde wêresa ebandu boshi na muchima muuma kanji busira kalondo. 6Si oyu mundu ěmire kwéma na bwemeresi busira kuhungwa-hungwa. Bushi emundu ola wáhungwa-hungwa, ahúhanyisibwe ne'mulaba kwa nyanja inene ola wêkibwa ne'chusi ne'kuuma emeshi yeyi ne'yi. 7Emundu ola ulí ngo'yu, àtachichingaa mbu angábona kandu era mwa Enawetu, 8bushi àli mundu ola wéte michima ebiri, kanji wakúbinduka-binduka mwa myasi era áira.

Ebakene ne'baare

9Munyaketu mwemeresi ola ulí mukene, éndaa ámowa bushi Ongo àmwérusise. 10Ne'munyaketu mwemeresi ola ulí muare, éndaa ámowa bushi Ongo àmwândaasise. Bushi emuare kurenga ku árenga nga bwaso bwa bichi. 11Esuba lyénde lyáulukira, echuka cha'li chanômya emyaka. Ebwaso bwe'yi myaka bwánachitowangira, ne'bulimbi bwo'bu bwaso boshi, bwánakumba. Rero, ne'muare nai ku akánairima bacha mwa mirimo yai.

Ongo àtaéreka mundu

12Aáhanyirwe emundu ola wáata ebushibirisi mwa miereko, bushi era nyuma se'kuima'i akábona enzita era Ongo álaanyaa ba batúla bamúsimire. 13Akaba mundu murebe àngaerekibwa, àtatetaa mbu: «Ongo iwànyierekire.» Bushi Ongo àtangaerekibwa ne'mabi, nesi àtangaereka mundu. 14Si chira mundu énde áerekibwa mango ákululwa ne'kwêngeerwa ne'mianyisa yai ibi ye'buhuma-huma. 15Chasinda, obu buhuma-huma mango bungákula bwánabuta ebibi, ebi bibi nabi mango bingákula byánabuta elufu.

16Banyaketu basiirwa, muténdaa mwêngeerwa! 17Bushi, chira lwêmbo lubuya na chira lwêmbo lwa lùlumirire, lwénde lwátenga kwa nguba era mwa Ongo Tata iwábumbaa ebimore byoshi bya bitúla'ko. Ongo àtabinduka-binduka nga chimbusa. 18Kukulikana ne'kuhonda kwai, átweresise ekalamo kurengera echinwa chai che'kanangana, chasiya túbe fula sa byoshi bya ábumbaa.

Ekûmva echinwa cha Ongo ne'kuira ngo'kwa chìtechire

19Banyaketu basiirwa, mundaa mwámenyerera ono mwasi: chira mundu ěmire kuba mwangu wa kûmva si àtabaa mwangu mwa kuteta no'mwa kusibuka. 20Bushi emundu we'kusibuka àtaala kuira bya bìtungenene era muhondo sa Ongo. 21Bushi no'ku, mukábuliraa emyasi yoshi era yénde yábaaka esinga na chira myasi yoshi ya bubi bwa burengerese. Mwáangiriraa echinwa cha Ongo mwa burembu cha chábikirwe mwa michima yenyu, bushi chi chéte ebuashi bwe'kubanunula.

22Muténdaa mwáchengeera mubeine mwa kunde mwánômvirisa oshâo echinwa cha Ongo, si mundaa mwáira ngo'kwa chìtechire. 23Bushi emundu ola wénde wômvirisa echinwa cha Ongo oshâo busira kuira ngo'kwa chìtechire, ahúhanyisibwe no'la wásonga ebuso bwai mwa chiyo. 24Era nyuma se'kuchisonga, ánachêndera, unao-unao ánêbirira kute ku ahúhire. 25Si emundu ola wénde wáchikangirisa kubuya-buya eMwaso ola ùlumirire, kanji ola wénde wábika ebandu mwa buhuru, na kuendekera kusimika muo, si kuta kûmvirisa oshâo chasinda ánebirira'o, si énde áira ngo'kwa átechire, oyu mundu aáhanyirwe na Ongo mwa myasi yai yoshi.

26Akaba emundu àngachitola mbu àli mundu wa tini*, no'ku àtaala kulanga elulimi lwai, eri kuchengeera ku áchêngeera yeine. Ne'li tini* lyai, litéte mufa asibya. 27Etini* lya lìkomire, litéte na chibi chisibya era muhondo sa Ongo li'lyeline: Kuli kuasa efusi ne'bahumbakasi mwa malibuko mabo, ne'kuchilánga kwa myasi ye'butala era ìngabâka esinga.

Currently Selected:

YAKOBO 1: tbt

Highlight

Copy

Compare