BAEBURANIYA 9

Ehema lye'kwerera mu Ongo

1Mwa chilaano* chibere-bere, bàhambere era luulu se'miomba* ye'kwêra Ongo, ne'ra luulu se'chisiki che'kwêrera'mo, cha cháimbwaa ne'bandu. 2Bushi no'ku, bera kukoma ehema. Mwe'ri hema, mwábaa mùli echumba chibere-bere cha béndee bérika mbu Chisiki Chibuya-buya*. Na mwe'chi chumba, mu mwábaa mutúla ekakondo ke'kubika kwe'tara, ne'mesa me'kubika kwe'mikati era bàtulaa Ongo. 3Chasinda, kwábaa kùli ngwaya era yábaa ìlikanyise echi chumba chibere-bere, ne'chumba cha kabiri cha béndee bérika mbu Chisiki Chibuya-buya Busese*. 4Mwe'chi chumba mu mwábaa mutúla ekahaha ke'mitulo* ka kábaa kakúnganyisibwe mwa horo. Kwa'ku kahaha* ku béndee básiresesa emarashi. Kanji mwábaa mutúla ne'sanduku ye'chilaano*, era yábaa yàkabirwe kwe'horo kwa nyinda soshi. Na mwe'i sanduku, mwábaa mùli ngumbu era yábaa ikunganyisibwe mwa horo. No'mwa ndanda se'i ngumbu, mwábaa mùli mana.#9:4 Mana: Bìri biryo bya Ongo éndee êresa eBaisiraeli mwa buyeye. Somaa Kutenga 16:13-15, 31. Kanji mwe'i sanduku mwábaa mùli ekachi ka Haruni, ka káhowaa kwe'bwaso. Mwábaa mùli na makoi mabiri ma mábaa maánjikirwe kwe'myasi ye'chilaano*. #9:4 Somaa Kutenga 16:31-33; 25:10-16; 30:1-6; Muanjo 17:16-26; Bukengere 10:3-5. 5Ne'ra luulu se'i sanduku, yábaa ìri bihuhanyi bibiri bya makerubi,#9:5 Makerubi: Bìri bindu bya kushishasa bya byábaa byète bibaba. Somaa Muanjo 7:89, Esekiyeri 10:10-14. ba béndee bálosa kanangana kwa u'Ongo análi aola. Ebibaba byabo, byábaa bìhukire echisiki cha béndee bátulira mu Ongo emikira bushi ne'kubabálira ebibi bye'bandu. Si rero chìtasa kuba chihangi cha kubalikisa ei myasi yoshi muuma kwa muuma.#9:5 Somaa Kutenga 25:17-22.

6Mango ebi bindu byoshi byéndee byába byàtondekibwe kubuya, mu mango ebakuhanyi* béndee bêngirira chira lusuku mwe'chi chumba chibere-bere, kwa kukola emulimo wabo. 7Si eMukulu-kulu we'bakuhanyi* yeine oshâo iwéndee wéngira mwa chumba cha kabiri. Éndee êngira'mo euma kwa mwaka oshâo, éte emikira ye'nyama ye'kutula bushi ne'bibi byai yeine, na bushi ne'bibi bye'banji bandu, bya bàkolaa busira kumenya.

8Mwe'bi byoshi, eMuchima Mubuya-buya ábaa áhonda alóse kwe'njira ye'kwêngirira mwa Chisiki Chibuya-buya busese* yábaa ìtasa kuboolibwa mwe'si suku soshi sa hema libere-bere lyábaa lichíri limángire. 9Ei myasi, chìri chimbusa che'myasi era iri lwarero. Yálosa kwe'mitulo* era bandu bénde bátula Ongo, ìtangaala kukomya emuchima we'mundu ola wána'i. 10Ebi byoshi, ináli miomba* era ìtechire era luulu se'mubiri, kwa myasi era yèrekere ebiryo, ne'bye'kumwa, ala'uma ne'myanya ye'kuchikomya* mu njira sinene. Ei miomba* yáataa mufa kuikira kwa chihangi cha Ongo ábindulaa ebindu byoshi kuba biyayaya.

Emulimo we'mikira ya Kirisito

11Si Kirisito áikire kuba Mukulu-kulu we'bakuhanyi* kwa kutweresa ebindu bibuya bya bìri lwarero. Ehema lyáulukanyire'mo, lyeke lìri linene busese kanji lya lìlumirire. Eri hema, litáirwaa na bandu, kukuteta mbu litá lyo'muno butala. 12Kirisito êngirire eri ne'uma mwa Chisiki Chibuya-buya Busese*. #9:12 Chisiki Chibuya-buya Busese*: Anola, bàtechire era luulu se'chisiki cha Ongo yeine anátula'mo. Atátulaa mikira ya chikolya, nesi ya chana cha ngaafu, si emikira yai yeine. Áiraa bacha, chasiya àtununule esuku ne'mango.

13Ebandu ba béndee bábalaka, béndee bámamairisibwa kwe'mikira ye'chikolya, ne'ye'mbanzi, ala'uma ne'lufufu lwe'ngaafu sa sàsiresibwaa, kwa kukomya emibiri yabo.

14Akaba kubiri bacha, mùtasene kwe'mikira ya Kirisito iyète buashi bunene bwe'kukomya ebandu kurenza emikira ye'nyama? Bushi Kirisito áchanaa yeine era mwa Ongo kurengera ebuashi bwe'Muchima Mubuya-buya i'utúla'o esuku ne'mango. Era kuba mitulo* era itéte chibi chisibya. Ne'mikira yai yénde yákomya emichima yetu, iténge mwa myanya era ìtakomire era yénde yáreta elufu, chasiya túnde twákorera Ongo i'utúla muuma-uma.

15Bushi no'ku, Kirisito iwábikire ebandu mwa buuma na Ongo, kurengera echilaano chiyayaya. Kanji kurengera ekufa kwai, ánunwire ebandu kutenga mwa bibi bya báiraa mango bábaa bachíri mwa chilaano* chibere-bere. Áirire bacha, chasiya ebandu ba Ongo âmaere babóne emwandu we'suku ne'mango ola ábalânyaa.

16Mwa myasi era yèrekere efulao ye'kulya emwandu, byěmire kulosa kanangana kwa ola wárekaa'i áfire mira. 17Efulao ye'kulya emwandu, yénde yákola mango emundu ola wáira'i énde ába afíre mira, si ìtangakola mango àchiri'o.

18Kuno'ku, kwe'chilaano* chibere-bere cha Ongo áiraa ne'bandu, chitákolaa busira kushesha mikira. 19Musa ábaliraa tanga eBaisiraeli boshi kwa miomba* yoshi ye'Mwaso* itúla ìtechire. Chasinda, era kwire átola ematabi me'muchi we'isopo ma màminyirirwe ku boya bwa mwola bwa mbuli. Era kulobeka'mo mwa mikira ye'byana bye'ngaafu ne'ye'bikolya, era ìhônganyisibwe mwe'meshi. Era kumamairisa'i kwa chitabo che'Mwaso* no'kwa lubaa loshi lwe'Baisiraeli. 20Era kuteta mbu: «Enera i'mikira era yálosa kanangana echilaano* cha Ongo aírire nenyu.»#9:20 Somaa Kutenga 24:8. 21Kanji Musa era kumamairisa ei mikira kwa hema, no'kwa bindu byoshi bya béndee bákoresa mwa kwera Ongo. 22Rero, kukulikana no'yu Mwaso*, ebindu byoshi byénde byákomisibwa* kurengera emikira. Ne'bibi bìtangababalirwa busira kusheshekala kwa mikira.

Kirisito i'mitulo era yénde yákula ebibi

23Mwa bacha, ebi bindu byo'muno butala bináli nga chimbusa che'myasi era yáiribwa kwa nguba. Ebi bindu, byábaa byěmire kunde byákomisibwa* kurengera emikira ye'nyama. Si emyasi ye'kanangana yo'kwa nguba yěmire kukomisibwa* kurengera emitulo* era ìkomire busese kurenza era ibere-bere. 24Bushi Kirisito àtêngiriraa mwa Chisiki Chibuya-buya* cha cháirwaa ne'bandu, cha chìri nga chimbusa che'Chisiki Chibuya-buya* che'kanangana. Si yeine êngiriraa kwa nguba, mwa chisiki che'menze'mo lwarero era muhondo sa Ongo, chasiya énde átutetera. 25eMukulu-kulu we'bakuhanyi* we'Bayuta énde êngira mwa Chisiki Chibuya-buya Busese* chira mwaka, éte emikira ye'nyama. Si Kirisito àtêngiriraa mbiso sinene kwa nguba chasiya énde áchana kuba mitulo* chira mango. 26Akaba bìngabere bacha, bìngamwemire alíbusibwe mbiso sinene kutengera ekubumbwa kwe'butala. Si rero, mwe'sine suku se'businda, érire áulukira eri ne'uma, chasiya akúle ebibi bye'bandu kurengera ekuchana kwai yeine kuba mitulo*.

27Chira mundu àbikirirwe kufa euma oshâo, ne'ra nyuma se'kufa ánachinjibusibwa na Ongo. 28Rero kuno'ku, ku Kirisito nai áchanaa euma oshâo, chasiya akúle bibi bya bandu banene. Akáhuba kubaha ebwakabiri, atá kwa kukula ebibi, si kwa kununula ebandu ba bámulinjira.

Currently Selected:

BAEBURANIYA 9: tbt

Highlight

Copy

Compare