BAEBURANIYA 4

1Ongo átulanyaa kwa tukêngirira mwa chisiki chai che'kutamukira. Bushi no'ku, túndaa twáchilanga, chasiya kùtabaa chiro na muuma mu mwabo ola ukáina kwêngirira'mo. 2Bushi anabe netu, twáhubanganyisibwe eMwasi Mubuya-buya, ngo'kwa abu bahokulu betu ba bábaa bàli mwa buyeye*, nabo bánahubanganyisibwaa'o. Si beke oyu Mwasi bômvaa, atábaachiraa chiro na mufa asibya, bushi ba bômvaa'o batángiriraa'o na bwemeresi. 3Si tubano, tu twêmerere tu tukêngirira mwe'chi chisiki che'kutamukira, cha Ongo átetaa era luulu sa'chi mbu:

«Bushi no'ku, nera kulaisa mwa busibuke bwanyi mbu:

‹Batákêngirire chiro na hicha mwa chisiki che'kutamukira cha nábakunganyisise!›»#4:3 Somaa Saburi 95:11.

Ongo átetaa bacha, chiro àngaba mbu ábaa amálire mira emulimo wai kutengera mango ábumbaa ebutala. 4Bushi mwa Maanjiko Mabuya-buya mùli ala bàhambere era luulu se'lusuku lwa kalinda mbu: «Emulimo wai woshi ola Ongo ákolaa, ábaa amálirise'o mira elusuku lwa kalinda. Olu lusuku, era kutamuka.»#4:4 Somaa Ndangiriso 2:2. 5Kanji mwa'mu Maanjiko, Ongo àtechire mbu: «Batákêngirire chiro na hicha mwa chisiki chanyi che'kutamukira.»#4:5 Somaa Saburi 95:11.

6Ebandu ba bábaa bábere-bere kuhubanganyisibwa eMwasi Mubuya-buya, batêngiriraa mwe'chi chisiki che'kutamukira, bushi bánanaa kuira bya Ongo áteta. Si chiro bacha, ebanji bandu bachíri bangêngirira'mo. 7Bushi no'ku, Ongo érire áhuba kubika lunji lusuku lwa lwêrikibwe mbu: «lwarero». Átetaa era luulu so'lu lusuku, era nyuma sa myaka inene kurengera Tauti, kukulikana na mano Maanjiko ma màtechirwe'ko mira mbu:

«Lwarero, akaba mùngomva emurenge wa Ongo,

mùtairaa emichima yenyu kuba isibu.»#4:7 Somaa Saburi 95:7-8.

8Bushi akaba Yoshuwa àngaisise ebandu mwa chisiki che'kutamukira kanangana, era nyuma se'bi Ongo àtangachitechire era luulu sa lunji lusuku lwa kutamuka.#4:8 Somaa Bukengere 31:7; Yoshuwa 22:4. 9Echera chilósise kwe'bandu ba Ongo bachíri bàbikirirwe ekutamuka, kwa kuhuhanyisibwe ne'kutamuka kwe'lusuku lwa kalinda. 10Bushi emundu ola wèngirire mwa chisiki che'kutamukira cha Ongo, énde átamuka bushi amálire emirimo yai, ngo'kwa Ongo nai átamukaa mango ámalaa emirimo yai.

11Bushi no'ku, tuíraa emisi yetu yoshi twíngirire mwe'chi chisiki che'kutamukira'mo, chasiya kùtabaa chiro na muuuma mutubano ola wákumbaala, bushi ne'kunana kuira kwa Ongo àtechire, ngo'kwa bahokulu betu báiraa.

12Kubinali, eChinwa cha Ongo, chitúla chiuma-uma, chitúsa na misi. Kanji chitúla chìkaliire busese kurenza ebômbo bwa moyi mabiri. Chénde chênya busese, chánalinda chálikanya ekalamo ne'muchima, na kulikanya emvunyiro ne'mungofu. Chénde chábihula byoshi bya mundu áhonda kuira na kubihula emianyisa era ìri mwa muchima wai. 13Kutali chiro na kandu kasibya ka kàbishirwe era muhondo sa Ongo. Byoshi bya ábumbaa, byénde byánalorekana'ko changanama era muhondo sai. Kanji era muhondo sai, yi tukátetera era luulu se'myasi yoshi era twáiraa.

Yesu i'Mukulu-kulu we'bakuhanyi

14Rero twéte eMukulu-kulu we'bakuhanyi* ola wáire kwa nguba, na i'Yesu, Mwana wa Ongo. Bushi no'ku, tusímikaa busese mwa bwemeresi bwetu. 15eMukulu-kulu we'bakuhanyi* ola twéte, énde átufira bonjo mwa kuina emisi kwetu. Bushi nai ánaerekibwaa mwa njira soshi kuuma netu, si yeke atáiraa bibi. 16Bushi no'ku, túndaa twáchifunda ofu ne'ndebe ya Ongo busira buba. Aola, u'tungábonera ebubabalire ne'bubuya bwai, chasiya atúase mwa bihangi bya bikomire.

Currently Selected:

BAEBURANIYA 4: tbt

Highlight

Copy

Compare