BAEBURANIYA 5

1Chira Mukulu-kulu we'bakuhanyi* énde álondolibwa mwa bandu, na kubikibwa mwa mulimo, akórere Ongo kwa mufa wa'bu bandu. Iwénde wátula Ongo ebindu bya bandu bamúreteraa bushi ne'bibi byabo. 2Oyu Mukulu-kulu we'bakuhanyi* àngaala kunde áfira ebandu bonjo, ba bénjire báera busira kumenya, bushi nai énde ánaina emisi kuuma nabo. 3Kanji bushi nai énde ánaina emisi, ěmire kunde âna emitulo* atá bushi ne'bibi bye'banji bandu oshâo, si kanji bushi ne'bibi byai yeine. 4Kutali mundu ola wénde wácheresa yeine etunda lye'kuba Mukulu-kulu we'bakuhanyi*. Si ěmire kwâmalibwa na Ongo, ngo'kwa Haruni nai âmaalibwaa.

5Rero kuno'ku, Kirisito nai atácheresaa etunda yeine lye'kuba Mukulu-kulu we'bakuhanyi*. Si Ongo yeine iwámweresaa'li mwa kumubura mbu:

«Woyo u'Mwana wanyi,

lwarero nabére Eho.»#5:5 Somaa Saburi 2:7.

6Kanji mwa Maanjiko Mabuya-buya, mùli na anji ala àtechire mbu:

«Woyo, ukánaendekera utúla kuhanyi* esuku ne'mango,

nga Merikiseteki.»#5:6 Somaa Saburi 110:4.

7Mango Yesu ábaa achíri muno butala, émaa Ongo na kumusengera na murenge munene mwa kutosangya emalira. Áira bacha, bushi Ongo yeine iwábaa ùngaala kumununula mwa lufu.#5:7 Somaa Matayo 26:36-46; Mariko 14:32-42; Luka 22:39-46. Ongo era kumva ememo mai, bushi Yesu éndee ámutunda. 8Chiro angaba mbu Yesu ábaa àli Mwana wa Ongo, si áchikangirisaa ekuíra kwa Ongo àtechire kurengera emalibuko ma álolaa'ko. 9Ongo ámuiraa kuba ola ùlumirire. Rero, ba bénde báira kwa Kirisito àtechire, bénde bábona ebununusi bwe'suku ne'mango mwa kumurengera'ko. 10Mwa bacha, Ongo ámuirire Mukulu-kulu we'bakuhanyi*, nga Merikiseteki.

Tuténdaa twába nga bana batoto mwa myasi ya Ongo

11Tùchěte binene bya kuhambala era luulu se'i myasi, si ekubabálikisisa'bi kusibuire, bushi mùtaika mômva. 12Rero mwe'sine suku soshi, mwabo mwábaa mwera mwěmire kuba bakangirisi, si munáchiri mwěmire kukangirisibwa emyasi ibere-bere ye'chinwa cha Ongo. Mwábere nga ba běmire kwônga emabere, si bàtangaala kutafuna biryo bya bisibuire! 13Chira mundu ola wénde wámoera ekwônga emabere àtangaala kumenyerera emyasi era ìtungenene, bushi àli mwana mutoto. 14Si ebiryo bya bisibuire bìri bye'bandu ba bera basene. Bushi emyasi era bárengire'mo mwa kalamo kabo yénde yáberesa ebuashi bwe'kumenya echibi ne'chibuya.

Currently Selected:

BAEBURANIYA 5: tbt

Highlight

Copy

Compare