Roomi 2

Firteeta Waaqa

1Atti ke a nama pila' qara' faranno namo! Xaayti wa ishin marmatta a' qapto! Oto nama pila' qara' farannittooyye, isi qara'e' faranni, atti nama qara'e' faranni ka wa a namase a' qara faratte koona' kooni. #Maati 7:1; Luqa 6:37 2Orra asse koono qara'e, Waaqa akkima firteeta ishootta parpaaccisnitto daasho, in upna. 3Atti namo! Ke a orra asse koono qara' faranno ka aren waasene a ishootta' koonaane' koono, a' firteeta Waaqa' kela pahato ke' pahata? 4Moon hela paxaarumta Waaqa ka opseetaadi isho duupattaadi a koope tuffanni? Waaqa akka juppootaaytippa ke oorissa malla paxaarumaadi ke' koopshe a upto? 5Semmalla, atti qoota juppootoppa a oori a kinnin ka kamtoollayta koddite malla, kuyyaata a oppaayye aara Waaqa isho firteetaadi a dukaata desa kaytooyye, qitaateta isi qara koopinni. 6Waaqa matta nama mina'e akka kodaadi mina, daasha.#mas 62:12; phana 24:12 7Orra koda paxaaran japaattaan a kalata ka ulfeena isho caattase panni in kinnin faano, Waaqa caatta parapara'e ishootta' daasha. 8Ma xoori, a tookta mattaayshoti'iw faana ka dukaata ajajammi in kinnini ka tiyya ajajamma ka orra qara' xaana qara'e, aara Waaqa isho erkannaata qita. 9Paayyota qara Yihutaatoppa ka kamma' desa orra Yihutaata in koddinini oppa, orra a neequmta koono piisa qara'e rakkoota isho qaapa kaya. 10Ma xoori, orra a Yihutaata isho a Yihutaata in koddinini oppa a paxaarumta koono piisa'e, kalata ka ulfeena isho nakayta daasama. 11Waaqa orra olqara jajjaalinni in co#ooreta 10:17 .

12Orra seera in qapnin ka juppoota koono piisa, kadi punu seera in qapniniiyyi, ipiraman; a seera qapa ka juppoota koona pisaaw, seerosetinni ishootta qara' faratamta. 13Maana malla a fuula Waaqa turaayye, hanqeelluma akkanna, orra seerose dakayno ka koda qara nakanno diisheey, a dakayna ka koda qara nakanni in kinnini'in 14Orra a Yihutaata in koddinin a seera in qapnin, uumataaysho oppa wa seera kiinaa'e kooni seminan, kadi punu seera in qapniniiyyi, qoota seera a uumatoppa co a mattaayshoti qapan malla; wa koda ishootta parpaaccisnitta i'upan 15Sede ka wa seera ajajna akkima karittaaysho kara' taafamen akkini. Karittaaysho ka ishootta qara' maakkummi, awta demo karittaaysho ishootta qootinni ka awta demo akka fayyaappa caan ishootta' lelli. 16Sede nefo, otootase a fayya an anti torrino minan, kuyyaata a Waaqa Yesuusi Kiristoosi qudan wa orra dekandekatti kode piisa qara' farannooyye, asse koddita.

Yihutaata isho seeraaysho

17Tin atti ikiini, “Anti an Yihutitta” Ka seeran xelsanni ka qoota a nama Waaqa' koddite malla jeejjaanni, 18atti heenna Waaqa i''upta ka qoota' seera kollatte malla, paxaarumta kodeeta upta, 19ka kiini, “Orra a ildaan pate'en pora akkinni ka a tukkantoppa caati'i la'ayta kodde; 20ka a in kollannini' kollinni ka nyooqqawwa sahatinni” Ka kiiniiwwi, “Seeroppaayye immakoota a upna isho a dukaata'en qapa” 21Oto orra pila kollinnittooyye, maana'e issi a kollinni a kinnin? Ikkiini “In hatan.” Ka atti hanni; 22ka kiiniwwi, “In dahalan” ka atti' dahalli, atti killanna ijippini ka aren tikkaasso a waaqaysatta' sarri; 23Atti seera Waaqa'e jeejjaanni ka aren seeraadi qepissaan Waaqa puyanni. 24Sede nefo akkima taafamte ka kiinitto “Ishin Yihutaata minanne maxxa Waaqa orra a Yihutaata in koddinini oppa otammi” #Issa 52:5 mina.

25Dawra qara muratta, oton isseera tooytite, siti ke' tookta qapnaatta; oton seera' qepinniiyyi xoori, dawra qara murattaayti, akka a dawra qara a murannin kapa'e dikammi. 26Semmalla a Yihutitta in koddinin ka dawra qara in murannin, oto ajaja seera' tooytaannooyye, sede a dawra qara in murannin, akka murade kapa'e dikamminni? 27Atti ke a seera a taafame qapo ka dawra qara murade, oton seera' qepissaayye, a Yihutitta in koddinin ka a dawra qara in murannin ka seera tooytaanno ke qara' farata. 28Semmalla, a maxxa pattan Yihutitta kodde, Yihutitta dukaata'en; umma dawra qara muratta a lakan akkaanno dawra qara muratta a keeto'en. 29Yihutitta dukaata a karanxata Yihutitta kodde; dawra qara muratta a dukaata'ew, a hapura Waaqa karitta nama qara murro diisheey, akka seeroppa' taafamte mina'e, dawra qara muratta a dakinta'en. Nama asse pahoow, Waaqa qara kalata teyni diisheey, nama qaran. #ooreta 30:6

Currently Selected:

Roomi 2: MaQu

Highlight

Copy

Compare