Roomi 3

Akkima Yihutaata amana tiitte

1Ka kuli Yihutitta, maanaanne a Yihutitta in koddinin qara jaalli? Dawra qara muratta tooktaadi kan maana? 2Keeto Yihutitta koddeeta qinda lekaytanne jaalli. Wa kara kokkooka Waaqa qaaletaadi Yihutaata'e, a tara' daashe. 3Ka kuli Yihutaatoppaayye, oto orra demo amanama in qapniniiyyi, sede a ishootta amanama dapen, i'amanama Waaqa' hattissa? 4Pakkanna in hattisso! Akkima taafamte ka kiinitto'e,

“Qaaletaayti minanne dukaallayta koddita;

ka paarakaalaatti firteetoppa putta.” Mina'e, kadi punu nama piisa dartampayta koddaayye, Waaqa dukaallayta#mas 51:4 .

5Ma xoori, oto juppootinno hanqeelluma Waaqa akkinnittooyye, oori maanan kiina? Oto Waaqa juppootinno minan ino qattaanooyye, dukaata faranni in co kideeta? Are qaraayye akka dikatta a nama' mina'en haasawanni. 6Pakkanna assen! Katin se qara kiiteeyye Waaqa atta piita qara' farata?

7Ma xoori, oto dartampayta koddeetiyyo dukaata Waaqa laka' sooknitto ka kuttumta ulfeenaadi akkinnittooyye, kuli' maana'e a juppoolayta mina ana qara' faratammi? 8Orra demo takka an anti kollinno ka kiino, “Akkan wa paxaara akkanno'e wa neeqa' koona.” Mina'e pahananni ka ana xasasni; semmalla firteeta a sene asse pappaha' qara' daasammitto firteeta dukaata.

Akkima nama piisa juppolayta kodde

9Ka kuli ino' Yihutaateeyye, hela a Yihutaata in koddinini qara in qapna kideeta? Pakkanna an qapno. Yihutaata koddite, a Yihutaata in koddinini koddite, orra piisa akka juppoolaya kodden turan in olikela la'ayshe. 10Akka taafamte ka kiinitto,

“Hanqeellitta in co; pakkanna takka nefo in co#mas 14:1-3; 53:1-3;

11a matte paata qapnaanno takka nefo in co,

umma a Waaqa faano takka nefo in co.

12Piisa saanta Waaqa' qara maqqe;

ka takka' kamma dape,

a koda paxaara koono in co takka nefo in co.

13Lela a neeqa a nama miiddino haasawatta'e,

afaasso a hawla' mina'e panamen;

arrapaayshotin orra sassapanni.

Afaasso a haasawannaane, akkima hadda maaka' mina'e orra miiddini#mas 5:9; 140:3 .

14Afaasso jiija isho lela haddaawnonne immakaaden#mas 10:7.

15Loqqaasso nama ikassa'e jarjarri#Issa 59:7-8 ;

16Pateetta isho nyorpumaaw

saantaaysho oppa ca;

17saanta nakayta in upan,

18umma pakkanna Waaqa fuuri in caan#mas 36:1 .”

19Ajaja seera akkima a seera kela ca mina tooyno in upna. Seminanne orra ka wa a ishin marmada' dapa ka jaw kida; piita piisa ka firteeta Waaqa' kela kinnaatta. 20Semmalla fuula Waaqa' turaayye, nama takka' nefo seera tooytaattaan, hanqeellaawni in co. Laadi seera akkima nama piisa juppoolayta kodde akkinni#mas 143:2; Kelaati 2:16 .

Hanqeelluma amanteetanne teyanni

21Amma xoori Waaqa, saanta ishin hanqeellaya orra koono akkima seera mali koddite, ilaka' sookte. Seera Muuse isho mataffa xuumampaya ka sede maakkummi. 22Semmalla Waaqa a nama takka nefo oli kela reexni in kinnin mali, orra Yesuusi Kiristoosi amanno piisa'e, hanqeelluma daanni#Kelaati 2:16 . 23Orra piisa juppoota kode ka ulfeena a Waaqa ishootta' daashe dape. 24Semmalla orra, kodase a dinissa a Yesuusi Kiristoosi' kode minanne, daassata Waaqa pattan hanqeellaawa. 25Wa malla Waaqa Yesuusi Kiristoosi kalisoota' kode ka dehayshe, a isha amanna piisa akka diikaadin haseenta juppootaayshoti akkadan malla. Waaqa wa malla sede kode, akka duupattaadin juppoota a tarpite pashsho ka firteetaadi a dukaata akkisho malla. 26Sapanoose a amma' nefo oppaayye, Waaqa a Yesuusi amanna piisa hanqeellassaanne akkima mattaadi' hanqeellitta kodde akkinni.

27Semmalla waan jeejjaanna maana ca? We takkan nefo an jeejjaanno. Waan malla an jeejjaannini maana? Hela qootan seera tooytaanninno malla? Inna'a! Amanteeta malla. 28Semmalla Waaqa wa malla orra hanqeellanna, qoota nama koda seera' kode mallan ma, akkima amanteeta malla koddite in upnaanninna. 29Taaki hela Waaqa, Waaqa a Yihutaata' patta? Ka a Yihutaata in koddininiti'inni? Ha dukaatan isha Waaqa a orra a Yihutaata in koddinini' kuli. 30Ha Waaqa takkayta ka isha'ew Yihutaata isho a Yihutaata in koddinini amanteetan hanqeellanni#ooreta 6:4; Kelaati 3:20 . 31Hela kuli amanteeta minannen seera hattinninna kideetaa? Inna'a, laadii seeran kokkonnaysanna ka qapanna.

Currently Selected:

Roomi 3: MaQu

Highlight

Copy

Compare