Roomi 1

1Erkana, ana Pawloosi, orxaytase a Yesuusi Kiristoosi, isase erkamampayta Yesuusi kodda' halaame ka otootase a fayya a Waaqa kollissa' reexame kapaayye erkame.

2Otootose a fayya' nefo, qaalese a kippeeta a Waaqa xatta xuumampayaadi qudan mataafa qulqulloota' kara' daashe. 3Otootase a fayya, akkima inna a Waaqa, namumaadinni sanynyeeta Taawiti oppa dalade lelli. 4Akkimose mina'ew, Poqallaanno Yesuusi Kiristoosi Hapuraadi a Qulqullumaatinni qoota tootoppa xa'e malla, akkima inna Waaqa' kodde hupna kuttanne upnaysamte. 5Qoota maxxa Kiristoosi desa orra a Yihutaata in koddinin piisa akka amano ka ishi ajajamo koda'e, isha minannen daassata a erkamampayaadi koddeetoppan ino kayto teyyanne. 6Ishina' nefo akka a Yesuusi Kiristoosi kodditane'e, orrase a Waaqa halaade oppa' kittan.

7Semmalla, ishina Roomi kara kala, a Waaqa ishin jaalade ka akka Qulqullowwa kodditane ishin halaade pisaayye, Waaqa Aappinno isho Poqallaanno Yesuusi Kiristoosi kapaayye a daassata isho nakayta ishina' kodden.

Qinseeta kalata

8Kurra amanteetaayshina qoota piita pisa oppa' dakaade malla, we piisa turannen qattinni ka Poqalla Yesuusi Kiristoosinni ishin piisa malla, Waaqiyyo kalataysanni. 9Akkiman kuyyaata piisa qinseetiyyon ishin dikanno, Waaqase an otootase a fayya a qoota innaaditi desa torrinitto kollissaan, karittiyyo piisan isha' koda koono ishan maakkittiyyo. 10Ammaaw piraampira qaraayye, ishin kapopa deena'e, akka heenna a Waaqa' koddito, saantiyyo ka ana' qajeelto'e awta piisan Waaqa qinsanni. 11Akkan daassatase a hapura, akka amanteetan japaattane ishin kooto ishina' qootto'e, ishin akka xajeelliiy. 12Asse kideetiyyo nefo, anti akkan amanteetaayshinan kokkonnaado ishina ka xayyon kokkonnaattan, an ka olli kokkonnanno malla.

13Hellaanno a kiristaanatiiyyi! Orra a Yihutaata in koddinin a pila oppa, akkiman orra amanno lekayta akkade mina'e, ishin oppa assew orra amanno akkattan fade; ma xoori akkan a lekatin ishin kapopa deena' piisade ikka ol kela ana in teynin, akka' upnattanen heena#koda 19:21 . 14A tamaare isho a in tamaarrin ka ookka isho eeppa kollissaa'e, kitteeta ana qaraayye caay. 15Semmalla ishina a piita Roomi kara kala kuli'in, otootase a fayya kollissa xajeelli.

Otootase a fayya, akkima hupna Waaqa' koddite

16Anti otootase a fayyatin an jeero; maana malla otootase a fayya, orra amanno piisa'e hupna Waaqa a orra dininnooy. Sede nefo, paayyota Yihutaata'e deete ka kamma' desaaw orra a Yihutaata in koddinini' deete#Maari 8:38 . 17Hanqeelitta amanteetanne caatta akkanni kidamte ka taafamte; hanqeelluma a Waaqa kapa teyanna paayyote paayyatte haka piraampirati'i, akka amanteetan teyannaan otoota fayya qara ilelamte#Inpa 2:4 .

Neequmta orra

18Orra Neequmtanne akka dukaata in upnaatammini' kooni. Qoota Waaqa fuurri in kinnin ka Neequmta minanne, aara Waaqa moonte xata ishootta piisa qara akkaada. 19Wa malla ishootta qatta'a' nefo, qoota Waaqati desa wa upnaatta ishootta parpaaccisnitta qoota Waaqa mattaadi ishootta akkishe ikka upan malla. 20A piita uumamte paayyatte qalpeetase a Waaqa orra akkaanni in kinnin, sede nefo hupnase' xaadi a parapara isho Waaqumaadi, wa sene a isha' uume qudanne fayya akkaanni. Semmalla orra ishin dapayta a kode wa ishin marmada in qapo. 21Ishootta a Waaqa upan kapaayye, ulfeena isho kalata a Waaqumaadi' parpaaccisno isha in daanne. Ka dikattaayshotin paata patta dikaden. Karittase' xaaysho matte paata qapnaanni in kinnin ka lule#Efe 4:17-18 . 22Ishootta “An ookka” issi' kiini ma, eeppa kodden. 23A Waaqase a parapara ulfeessan kapaayye, wa pahanasene a to'ampayta nama ka a xampira ka a pinaana a loqqa afur qapaati isho a pinaana piitandesa titmannaatin kodameeti ulfeena daashen#ooreta 4:16-18 .

24Semmalla akka dakintaayshotin oli qara kodadda jeera' kodane'e; Waaqa akka xajeeltase xaaysho neeqa nyalaan immakaadeti piddamane'e, ishootta tupaa desa diishe. 25Sede nefo wa malla asse koddite, qoota dukaata Waaqa dartan purshen ka uumampayta kapaayye uumata Waaqaysaden ka kela koda koden malla. Waaqa xoori haka paraparati'i, a kalataysame. Ameen.

26Orra qoota sede kode malla Waaqa, manynyeeruma a xaccanno turopa ishootta tuukke. Iskattaaysho kuli ka mukitta a diira olli muknaan a uumatoppa co alle' diishe ka a uumatoppa in kinninin ollopa tiitaawe ka ollin muke. 27Akkimoose mina'ew diira ka iskatta olli mukitta a uumatoppa co alle' diishen ka ollopa tiitawen ka xajeelta a ollin mukittaatin kukkupaden. Semmalla diira ka diira olli manynyeeruma xaccanno koden. Ka kamma dapaytaaysho minan qitaateta a ishootta parpaaccisnitto isi qara' qeeden.

28Orra qoota Waaqa upnaatta in heennin malla, Waaqa akka manynyeeruma kodane'e, dikatta neeqa' tupa desa ishootta diishe. 29Semmalla ikka ishin dapayta ka neequmta ka qurqummuma ka falqa ka yoota ka nama ikassa ka peeqqa ka sassapa ka xajeelta neeqa piisan immakaaden. Ka namaaw pora haasawni. 30Ka a maxxa nama' patinna ka a Waaqa needdanna ka a nama jeerinna ka a isi peepna ka a jeejjanna ka a saanta a ishin neequmta kodan faddanna ka a toollaassoti afaa dakayni in kinnini 31ka a matte paata qapnanni in kinnini ka a olli' kaleeta poonna ka a jaalala in qapnini ka karpampaya. 32A seerase a Waaqa' kiino, “Orra a wossen koono, toota ishootta parpaaccisni.” Upan kapaayye sene kodeeta pattannema, orra asse koono kuli nyarinni.

Currently Selected:

Roomi 1: MaQu

Highlight

Copy

Compare