Maatiyoosi 7
7
Orra pila qara dapa mureeta parpaaccisni in kitto
Luqa 6:37-42
1Kamma desa Yesuusi ikide, “Akka dapa ishin qara in murammini'i, nama qara dapa in muran. 2Akkimose a nama qara dapa murrittan mina'ew, dapa ishin qara muramaay; taara a ishin kurrittanenneew ishina kuramtaay#Maari 4:24 . 3Maana'e kurpana iltaytippa co a akkini a kinnin ka miissa ilta innaassina oppa co tooyni? 4Taaki a kurpana iltaaytippa co qaran desa atta innaassina kiita, ‘Ana iltaaytippa ke miissa qeedo?’ 5Atti pahanassampayto, paayyota qaraayye kurpanose iltaaytippa co mayshe, sekkammaayye miissase ilta innaassina oppa co qeeda'e fayya akkitaay.
6“Wa qulqullaawe kutta tura in katan; ka furootaayshin tuuyyowwa tura in dakkan; tuuyyawwa furootaayshin qara loqqaassotinni diddiitan; kutta desa tiitaawan ka ishin qoman.”
Qoota qinseetati desa
Luqa 11:9-13
7Kammaddesa Yesuusi ikide, “Qinsada, i'ishina daasamtaay; fada, i'akkattaneey; xarroppa kookoosha, i'ishin tura panamaay. 8Nama qinsanno piisa teyyanni, nama faano piisa ka akkanni, a xarroppa kooko'inno piisa turaayye ikka panammiiy. 9Ishin oppaayye ayno oto innaadi isha qara dama qinsannaaneeyye, daka ishi daanni? 10Ka oto isha qara murkuja qinsannaaneeyye, maaka ishi daanni? 11Ka asseeyye, oto ishina ukkuttowwa kuli hellaassina wa paxaara daassata uptaneeyye, aappase xaayshin moonteeyye kalo desa atta qaran in jaalinnin ka orra isha qinsanno wa paxaara in daannin? 12Semmalla wa orra pila akka ishina kodo faanittane piisa, ishina kuli asseew ishootta kodaaw. Seera Muuse isho kollissa xuumampaya wa kiinaane sedewweey#Luqa 6:31 .”
Pora killa'a
Luqa 13:24
13Kammadesaaw Yesuusi ikide, “Xarra killa'a oppan kulla. Xarra pora pateetta opa orran anno ipaldi, poraadi nefo asseew paldi, orra oppan kullino ileki. 14Xarra pora caatta opa orran anno ikilla'i, poraadi nefo asseew killa'i. Orra porose teyno nefo shakkaytaaw.”
Nama kodaadinni upnaysammi
Luqa 6:43-44
15Kammadesaaw Yesuusi ikide, “Xuumampaya a darta kela isi tooyta. Ishootta oto ishin kapopa deenaaneeyye, qudandela kaharra pappahanaadan, ma karan xata qapampaya yoyta mina. 16Ma xoori kodaayshotinni ishootta upnaattan. Qe'eyya qaraayye idalta wayneeta pohanni? Ka qassatta qaraayye dalta hilteeta pohanni? 17Semmalla qoyra a paxaara dalta paxaara dalli. Qoyra a neeqa ka dalta a neeqa dalli. 18Qoyra a paxaara dalta a neeqa daleeta ettaninni in co, umma qoyra a neeqa dalta a paxaara daleeta ettaninni in co. 19Qoyra dalta a paxaara dalli in kinnin piisa alle murammi ka apittoppopa katammi#Maati 3:10; Luqa 3:9. 20Semmalla xuumampaya a darta kodaayshotinni ishootta upnaattan. 21Nama a heenna a aappinno a moonta koono, diisheey, ‘A Poqallaay, Poqallaay’ ana kiino piisa, mankisteeta a moonta opa in kalo. 22Kuyyaata firteetatiiyyi orra lekayta ana kida, ‘Poqallaay, Poqallaay, ino maxxaaytin xuuma an haasawanne? Ka maxxaaytin orriyya an sookinne? Ka maxxaaytin kodadda orra qawwanna lekaya an koone?’ 23Kuyyaatoseti anka ishootta kida, ‘Anti pakkanna an ishina an upooy, ishina ukkuttowwaayye, ana kapa sekaada#mas 6:9 !’”
Pahana a tikka lakkiti
Luqa 6:47-49
24Kamma desaaw Yesuusi ikide, “Nama qaalese xayyo dakayo ka ishin kallaanno piisa, ilattayta nama a kookohota qara tika qupade paha. #7:24 “kookohota” mataafa kirikki qaraayye “shila” kiini. 25Roopa ka roope, malxa nefo ka urqe, puppeeta nefo ka puppite ka tikase qara deete ka ekkaysatte. Qoota kookohota qara qupamte malla, ikka in pi'inin. 26Nama qaalese xayyo dakayo ka ishin kallaanni in kinnin xoori, eepa nama a tahaytoppa tika qupade paha. 27Roopa ka roope, malxa ka urqe, puppeeta nefo ka puppite ka tikase qara deete ka ekkaysatte. Tikase ka pi'ite, pi'ittaadi nefo ka akata neeqnaade.”
28Yesuusi ete se haasawade ka dikkishe kammaayye, orra harmo'e kollissaadippa qawwaawe#Maari 1:22; Luqa 4:32 . 29Maana malla isha akkima kollissampaya a seera mina kollinni in co ma, akka nama hupna ukkumeeta qapo mina'e ishootta kollinni.
