Maatiyoosi 6
6
Rakkatampaya qaarqaareeta
1Kamma desaaw Yesuusi ikide, “A orra ino akko kideetanne, akka kodaayshina a paxaara orra tura a koonini'i tooytaada a taakati aappaase xaayshin a moonta kapa we'e a akkattaneey#Maati 23:5 2Semmalla oto hiyyeessa we daannittooyye, akkimase pahanassampaya orra kurra teya malla, tikka a Yihuta a qinseeta isho porraappaayye koono mina'e orra tura in akkishan. Dukaatan ishina kiini ishootta turanneew xaayyaasso teyen 3Atti xoori otoo hiyyessa we daanittooye, wa harkaayti a'akkitta koonaa harkaayti a pittitta in upnaannin. 4Semmalla wa a hiyyeessa daanittane a dekandekatti kodden; aappaase xaayshin wa dekottan kodde akkino, kodase xaayti paxaara kapa'e ke xaayyaatti ke daashay.”
Qoota qinseetati desa
Luqa 11:1-4
5Kamma desaaw Yesuusi ikidewe, “Oto qinsannittooyye, akka pahanassampaya orra mina in koddan ishootta akka orra ishootta tooyo'e, tikkasene a orra a Yihuti a qinseeta isho qeppeelliyya porra kapa qaqqa'atta ka Waaqa opa qinsatta jaalanniiy anti dukaatannen ishina kiini, ishootta turanneew xaayyaasso akkaden#Luqa 18:10-14 6Atti xoori otoo Waaqa qinsannittooyye, alletaayti kelopa kulle ka xarraayti ittura dufe ka aappaase xaayshin dekoota in co ka akkaanni in kinnin opa qinsado aappase xaayshin wa dekootan kodde akkino xaayya a kodaayte a paxaara'e ke daashaay.
7“Ishina xoori, oto Waaqa qinsannittaneeyye, akka orra Waaqa amanni in kinnin mina'e wa kiitene patta oppa'ewwen o'ooran; ishootta qaalewwa koopissaan a Waaqa ishootta dakayno ishootta pahanaanniiy. 8Aappaayshin a ishina isha a qinsannin turanneew wa ishin parpaaccisna upaay, ishina ishootta in pahanaadan. 9Semmalla ishina qinsada ka kida;
‘Aappo xanno ke a moonteeyye kalo,
maxxaayti a qulqullaawo.
10Mankisteetaayti a deeto
wa jaalannitta akka moonta kodden mina'e, a piita koddeneew.
11Damta an awwe dammo ino daashe.
12Akkiman orra ino ishin dapno diinninno mina'e,
atti dapinno ino diisheew.
13Isase neeqa kela inon pahe diisheey,
ekkaysumaappopa in kalshan
[Mankisteeta ka hupna ka ulfeena, haka paraparati'i xaaytiiw. Ameen.’]
14“Oto dapa orra ishin qara kode ishootta diinnittaneeyye, aappase xaayshin a moonta asseew ishina diisha#Maari 11:25-26 15Ma xoori oton dapa a orra ishin qara kode ishootta a diinni a kinniniiyi, aappaase xaayshin a moonta asseew juppootaayshin ishina in diinniniiy.”
Qoota damta musatta
16Kamma desaaw Yesuusi ikide, “Oto damta musannittaneeyye, akka pahanassampaya orra mina pissaayishin in poornaannin. ishootta akka a damta musanna kodden akka orra ishootta upnaado'e fuulaaysho poornaanniiy; anti dukaatannen ishina kiini, ishootta xaayyaasso immakkoota teyyaden. 17Atti xoori oto damta musannittooyye, fuuloppa jaqado ka mattaayti daatado. 18Sitiiyyi oori akka damta musannitto, aappase xaayshin dekootan co maliiyyi nama pila in upnaadooy aappase xaayshin wa dekoottan kodde akkino, xaayyaatti ke daashaay.”
Teyanta piita ollopa tuulatta akka parpaaccisni in kinnini kollishe
Luqa 12:33-34
19Kamma desaaw Yesuusi ikide “Piisse a are oppaayye itteeta isho jeljeltoota paata nyapalinnitto, keereeta ka tikka poonnitto ka kara hannitto qara'e, teyantaayshin ollopa in tuuladan. #Yay 5:2-3 20Ma xoori, porase a oppa itteeta ka jeljeltoota paata nyapalinni in kinnin, keereeta ka tikka poonni in kinnin ka kara hanni in kinnin oppa'e illi moonta'e teyantaayshin ollopa tuulada. 21Pora oppa teyantaayshin kitto, karittaayshin kuli eyyeew caadaay.”
Ilta la'ayta dakinta
Luqa 11:33-36
22Kamma desaaw Yesuusi ikide, “Ilta la'ayta dakinta; oto iltaayti fayya qaptooyye, dakintaayti piisa la'ayni. 23Oton xoori iltaayti fayya in qapniniiyyi, dakintaayti piisa tukkanni. Semmalla oto la'aytase ke kara co tukkanno, tukkanta desa atta tukkanttaaw.”
Kallaatoppa qaapan kupatta akka parpaaccisni in kinnin
Luqa 16:13; 12:22-31
24Kamma desaaw Yesuusi ikide “Nama takka Poqalladda lakki kela orxuma ettaninni in co se kapaayye Poqalla takkane jaalanni ka takkan needdini; taaki takkane ulfeessini ka takkan puyanni diisheey akkimose mina'ew ishina kaaja isho Waaqa kela orxuma a ettanissan. 25Semmalla in ishina kiinii, qoota kallaataayshinati desa wa damtane taaki ikkinittane oppa'en rakkadan ka qoota dakintaayshinati desa wa kalsannittane oppa in rakkadan caatta damta qara in qapo? Dakintaaw mehadda kalsannaane qara in qapto? 26Xampira moonta tooya! Ishootta aylanni in caan umma feranni in caan ka kosappa kalsanni in caan ma aappase xaayshina a moonta'e ishootta daminni. Ishina a kuttati xampira qaraayye a qaptane? 27Hela amma ishin oppaayye ayno qaapan kupade ka paraadi qara kuyyaata takka padaawatta ettaninni?#6:27 “paraadi qara kuyyaata takka” mataaffa demo qaraayye ikiini, “derumtaadi qarae dunduma takka” 28Ka kuli mehadda a kalsannaane malla maana'e qaapnittan? Intoonne pisa lakoppan xata co atta akka kuttanno tooyaay yaalli in co, umma fuuttota shippanni in co. 29Anti in ishina kiini, Nuqusase Selomooni kiinaan nefo ulfeenaadi pisanne, pisoose oppaayye a takka nefo mina'e mehadda sira in kalsanne. #nuqu a 1ta 10:4-7; otoo a 2ta 9:3-6 30Oto Waaqa, jabbase lakoppa awwe co ka parri kupaanaappopa katammo, asse sireeyye, ishina amanteeta ishina qaje ma, oo desa atta ishin siraaw? 31Semmalla ‘Maanan damma ka maana ikkina ka maana kallsanna’ in kidan ka in qaapan. 32Orra a Waaqa amanni in kinnin kuli ha sene kammaaw pora hirri aappaase xaayshin a moonta akkima sene piisa ishin parpaaccisnaan i'upaay. 33Ma xoori, ishina se piisa turan qattisha ka mankisteeta a Waaqa ka hanqeellumaadi fada sene piisa qara'e ishina padaawamaneey. 34Kuyyaata parri qaapa mattaadi'i qaptaay, qoota kuyyaata parri malla qaapaanne in kupadan kuyyaata matta mina'e rakkoota a ishi kaynitto qaptaay.”
