Maatiyoosi 8
8
Yesuusi akka qoosholayta dinshe
Maari 1:40-45; Luqa 5:12-16
1Yesuusi ete irroota qara lekkadeeyye, samayta kuttayta isha kamma aane. 2Sitiiyyi qoosholayta takka ka Yesuusi kapopa de'e ka isha tura kilpiippade ka ishi sakatade ka kide, “Poqallaay, oton iheentaayye, ana dinissa ka nyalaayyo tawissa i'ettanissa.” 3Yesuusi ka harkaadi derayshe ka namase quda qapade ka kide, “In heenaay dine.” Namase ka ennoow qooshase kela dine. 4Yesuusi ka isha kide, “Sede nama takka nefo kapa in lelan ma, aane ka qeesitta isi akkishe ka akka orra tura upnaatamto'e, kalisootase a Muuse ajaje kalshe.” #Lewi 14:1-32
Yesuusi akka orxayta takka a motoloqa dinshe
Luqa 7:1-10
5Yesuusi ete katama Qifirnahoomi karopa kulleeyye, motoloqa takka a Roomi'e isha kapopa dehaade ka qinsade ka kidene, 6“Poqallaay, orxaytiyyo toonnaawe ka harmo suraawni ka tikoppa muke.” 7Yesuusi ka oorshe ka ishi kide, “In de'a ka isha dinsha.” 8Motolaqasene ka Yesuusi kide, “Poqallaay, atti akka tikiyyo kelopa kullitto'e, ana parpaaccisni in kittooy qaaletaaw kide ka orxaytiyyo idinaay. 9Anti mattiyyo'e saarra ana qaropeela ca'en qapa, foolisowwa a ana kelopa xata ca ka caaneew. Ishoottoppaayye oton takka ‘Aane’ kiinooyye, i'anni; ka oton takka ‘Xooye’ kiinooyyeew ideeni; oton orxaytiyyo takka kiinoowwe ‘Sede kode’ ikooni.”
10Yesuusi ete sede dakayeeyye, oppe qawwaawe ka orrase isha kamma anno kide, “Anti dukaatannen ishina kiini, piita Isira'eeli oppaayye nama amanteeta asse kutta qapo takka nefo an akkine. 11Anti in ishina kiini, orra lekayta qinda piirtotati dela ka dumaateta xata ollopa de'a; ka Aprihaami ka Hisaaqi isho Yayqoopi olliiyyi mankisteeta moontati damta kuti'a. #Luqa 13:29 12Isasene allu mankisteeta a moonta lehada ka lakopa alle tukkantase laka tula kitto oppopa kataman. Ka tukkantose karaayye, ikka eyyeeyye pooyta isho ilka ollin qomeeta koddita.” #Maati 22:13; 25:30; Luqa 13:28 13Kamma desa Yesuusi motoloqaseneti kide, “Aane ka ikka akka amanteetaayti mina ke koddito.” Orxaytaadi ka eennow sitiiyyiw dine.
Yesuusi akka orra lekayta paaqoppa dinshe
Maari 1:29-34; Luqa 4:38-41
14Yesuusi ka tika Peetiroosi kelopa kulle ka aayya a opa haantota Peetiroosi a awdan paaqnitto ka eyye mukte akke. 15Ka harkaadi quda qappade; awdase ka eennow isheetta diishe, ikka xaate ka Yesuusi paata deddehassa paayyite. 16Ete shishshipteeyye, ikka a orriyyaan qapame lekayaan isha kapopa de'en. Ikka qaaletaadin ishootta kara hapurrasene nenneeqa sookshe ka paaqolayasene piisa dinshe. 17Sede nefo isase xuumampaytase Issayyaasi kide, “Ha isha deesinno teyyade ka paaqinno haadade” Akka dikkato malla. #Issa 53:4
Rakkoota orra Yesuusi kamma anno qara deeto
Luqa 9:57-62
18Yesuusi ete a samayta isha kapa tiitayshe akkeeyye, akka pakateete afa disi opa tuullane'e tamaarewwaadi ajaje. 19Sekkammaayye kollissampayta takka a seera Muuse ka Yesuusi kapopa de'e ka ishi kide, “Kollissampayto, anti pora opa annitto pisa opan ke kamma de'a.” 20Yesuusi ka ishi oorshe ka kide, “ka'ala qaawwa qapan, xampira moonta ka saatta qapan, inna nama xoori pora kela ela matta qapan nefo in qapan.” 21Tamaarewwaadi oppa nama takka ka Yesuusi kide, “Poqallaay, ana paayyota aano ka aappinno hawlo.” #8:21 “ana aappinno hawlo” kideese xaadi, “ana aappinno qara tooyo” kideeta. 22Yesuusi ka ishi kide, “Orra le'e a pukkadaasso hawlado ka atti ana kamma xooye.”
Yesuusi puppeeta pakateeta qara xaate jaw kiishe
Maari 4:35-41; Luqa 8:22-25
23Se kammaayye Yesuusi koonka karopa fayyade tamaarewwaadi ka isha olli aanen. 24A isi qara in upnin mali puppeeta kokkoka ka pakateeta qara xaate. Koonkaasso ka pisha kelopa tawa foolsaden. Yesuusi xoori imuke. 25Tamaarewwaadi ka isha kapopa dehaaden ka mukittoppa isha xaashen ka kidene, “Poqallaay, in piramminna! Ata inon pahen!”
26Isha ka ishootta kide, “Ishina a amanteeta ishina qajte, maane pora fuurrittan?” Ka ela xa'e ka puppeetase isho xayxaytase fukke. Jaw kidayta kuttayta ka kodde. 27Orrase ka oppa qawwaawe ka kide, “Ata ini a puppeeta isho xayxayta kuli ishi ajajammaan, nama atta paho?”
Yesuusi akka nama lakki kara orriyya sookshe
Maari 5:1-20; Luqa 8:26-39
28Yesuusi ete pakateeta Keliilaati afa disi opa tuulle ka piita Kerkesinooni kayeeyye, nama lakki a orriyyaan qapame hawlallaappa desa sossooke ka isha mina kaye. Ishootta nefo harmo'en karpampaya, umma nama takka nefo porose oppan tarpa ettaninni in co. 29Ishootta ka ullupitta paayyen ka kidene, “Atti inna Waaqa, maana ino qara qapta? Ka a xoorasene in kaynin mali ino rakkacciissa deete?”
30Porra ishootta kapa desa shakkayteeta seka oppaayye, xelloota tuuyyata kuttayteeta ka eyye deetta deenni. 31Orriyyasene ka Yesuusi naappaden ka kidene, “Oton orrose kara ino sookinniiyyi, xelloose a tuuyyata karopa ino erke.” 32Yesuusi ka ishootta kide, “Aana!” Orriyyasene ka sossooken ka tuuyyawwasene karopa kalen. Xelloose a tuuyyata piisa ka takeela quda xata jarjartan hirte ka pakateeta karopa sehte ka piramte. 33Sikmayasene a tuuyyowwa ka xaayshotin qahen ka katamaapa aanen ka wa kodde piisa torren ka waasene orrase orriyyaan qapame qara kodde kuli torren. 34Samayta katamaseneti piisa ka Yesuusi akka sooke. Ka ete isha akkeneeyye akka piitaaysho oppaayye alle aano'e, isha qinsaden.
