Maatiyoosi 5
5
Kollissa a Yesuusi irroota qara kollishe
1Yesuusi ete samayta kuttayta a isha kamma deeno akkeeyye, irroota qaropa fayyade ka kute'e. Tamaarewwaadi ka isha kapopa de'en. 2Ikka asse kide ka ishootta kollissa paayye:
Orra saka dukaata akkado
Luqa 6:20-23
3“Qoota mankisteeta moonta xaaysho koddite malla;
orra kallaataaysho a hapuratin akka teekolaya kodden ishootta dakkannitto, i'eppisamen,
4Qoota Waaqa ishootta xasa oorsho malla,
a nyarrahana, i'eppisamen!
5Naalaya qoota piita lehadan malla,
i'eppisamen#mas 37:11 .
6A hanqeelluma doxna ka deeponna, qoota duttanan malla
i'eppisamen#Issa 55:1-2 ;
7A diissata koona, qoota diissata akkadan malla,
i'eppisamen;
8A karitta fayya qapa qoota Waaqa akkan malla
i'eppisamen#mas 24:3-4 ;
9A otanta orra oppa araara ka nakayta koona,
qoota hellaa Waaqa kidaman malla, i'eppisamen;
10A hanqeelluma malla pora daanamma qoota mankisteeta Waaqa xaaysho koddite malla,
i'eppisamen. #Peti 1ta 3:14
11“Oto orra ana minan ishin onno ka pora ishin daannoyye, ka dartan maxxaayshin patinnooyye, xasa a ishina dakaado#Peti 1ta 4:14 12wa moonteeyye se kapa akkattane qoota kutti malla, xasa a ishina dakaado ka a kuttati xasooda ishootta xuumampaya a ishin turan ca qara'e asseew pora daanama isho rakkoota kaytisheneey.” #otoo a 2ta 36:16; koda 7:52
Pahana a la'ayta ka a sookitta
Maari 9:50; Luqa 14:34-35
13Kamma desa Yesuusi ikide, “Ishina piita'e a sookitta mina. Ma xoori sookitta otoo marmaddumaadi dapooyye, atta marmaddaawa ettansha? lakopa alle katama, orra ka loqqan qara aana diisheey, itturopa we'en nakaysho#Maari 9:50; Luqa 14:34-35 .
14“Ishina piita'e alla'ayta mina katama irroota qara qupame dekattan ettanshan. #Yoha 8:12; 9:5 15Orra oto ipsa la'ayshoyye akka nama a tika kela co piisa la'ayane'e, pora a opeela kide qara'e xaayni diisheey opani qara toma qupaapni in caan. #Maari 4:21; Luqa 8:16; 11:33 16Akkamose mina'ew orra akka kodaayshin a paxaara akko ka aappase xaayshin a moonta kalataysado'e, la'aytaayshin a orra piisa tura la'ayo.” #Peti 1ta 2:12
Qoota seera Muuse desa
17Kamma desaaw Yesuusi ikide, “Anti, a seera Muuse isho kollissa a xuumampaya alle hattissa de'e ishina'en pahanaannin. Dikkissaa'en de'e diisheey, hattissa an deene. 18Anti dukaatannen ishina kiini, haka piita isho moonta tarpinaan kara'e, seera Waaqa piisa dikkada diisheey, seeroppaayye puussota takka taaki uqqinta takka nefo in patto. #Luqa 16:17 19Semmalla nama ajajaddasene oppaayye a shakka takka nefo qepsho ka akka orra pila asseew kodo kollinnoo mankisteeta moontatiiyyi a shakka kodda. Ma xoori nama ajajaddosen piisa tooytanno ka akka orra pila asseew kodo kollinno, mankisteeta moontati a kutta kodda. 20Semmalla oto hanqeellumaassin, hanqeelluma a kollissampaya a seera isho a Feresata qara in jaalliniiyyi, pakkanna akka mankisteeta a moonta opa a kalinnin ishina lelli.”
21“Wa orra xatta kallaadeti kidame idakayten isheetta nefo ikiini ‘In ishshan; a nama ishshe qara ifaratamtaay’ #sooka 20:13; ooreta 5:17 22Anti xoori in ishina kiini, nama a nama qara miironno piisa qara'e faratamta semaliiyyiiw nama a nama onno ka kiino, ‘Toofo’ piisa qara'e firtishoonkota farata nama a nama onno ka kiino, ‘Eepo’ piisa qara'e, apitta a libbini in kinninii faratama 23Semmalla, atti oto kalisootaayti porose a kalisoota qara Waaqa kalinittooyye; ka akka nama a ke qara nyarrahe co matte oorsattooyye, 24Kalisootaayti porase a kalisoota tura xaaye ka aane ka paayyota innasene xaayshin olli araarame ka kuli tiitaawe ka kalisootaayti kalshe 25Oto paarkaalaatti ke xasasaneeyye akka ollin tika firrteeta opa annittaneyye, a poroppa kittooyyeew irraqara paarkaalaatti olli kala. A taakiti paarkaalaatti taanynya'e ke tarpisha taanynya ka turaayye a ke hido ke tarpisha akka hidamtaay. 26Dukaatannen ke kiini, haka kaaja a ke qara faratame piisa isqara xaffallitto kara'e pakkanna eeyye kara a sookto.”
Kollissa qoota dahala taaki a dahalsatta dawretati desa daasame
27Kamma desaaw Yesuusi ikide, “Akkima ‘In dahalan’ kidamte iddakayten#sooka 20:14; ooreta 5:18 28Anti xoori in ishina kiini, nama a iskatteeta opa tooyyade ka isheetta xajeele piisa, siti iskaran xata i'isheetta dahale 29Oton iltaayti a'akkitta minanni juppoota kooniyyi, iskaraayye qote ka alle kate a dakintayti piisa apittase libbinin kinnin oppopa katamto kapa, a dakintaaytippa meela takka dapto ke wayyiiy#Maati 18:9; Maari 9:47 30Oton iharkaayti a akkitta minanne juppoota kooniiyyi, isi quda mura ka alle kate a dakintaayti piisan apittase libbini in kinnin oppopa katamto kapaayye, a dakintaayti oppa meela takka dapto ke wayyi.” #Maati 18:8; Maari 9:43
Akka diirta isho iskatteetaadi oli in diinnini'i kollissa daasame
Maati 19:9; Maari 10:11-12; Luqa 16:18
31Ikidamte'e “Nama a iskatteetaadi alle diinno piisa a warqata ishin isheetta diishe isheetta daasho#ooreta 24:1-4; Maati 19:7; Maari 10:4” 32Anti xoori in ishina kiini, “A in dahallsannin mali nama a iskatteetaadi alle diinno piisa, akka dahalsatto'e kooni a iskatteeta alle diisamte hemino piisaaw, dahalmayta kodda.” #Maati 19:9; Maari 10:11-12; Luqa 16:18; Qoro 1ta 7:10-11
Akka xaxa dawramene kollissa a daasame
33Orra a xatta kallaade'e “Akka kidamte, ‘Darta qara'en xaxadan ma xoori wa a xaxattene poqalla dikkisha;’ Idakayten#Lewi 19:12; dikoota 30:2; ooreta 23:21 34Anti xoori in ishina kiinii, pakkanna in xaxadan. Moonta qoota suufaana Waaqa koddite malla; moontannen xaxadan#Yay 5:12; Issa 66:1; Maati 23:22. 35Piita nefoow qoota pora oppa Poqalla loqqa qapanno koddite malla piitannen xaxadan yursaalami nefo qoota katama Nuqusase kuttati koddite malla ishinnin xaxadan#Issa 66:1; mas 48:2 36‘Qoota nyirfaattippa takka nefo attassa taaki poornassa a ettaninnin malla issi nefon an xaxadan;’ 37Semmalla haasaassin oto ‘Aayye, Aa’ oton ‘Hee'eyye,’ hee'e a kodden; lela a sede qaropa co xoori a seetana'ey.”
Haalota qeedeeta akka parpaaccisni in kinnin
Luqa 6:29-30
38“Akkima kidamte, ‘A ilta kapa ilta ka ilkitta kapa ilkitta idakayten’ #sooka 21:24; Lewi 24:20; ooreta 19:21 39Anti xoori in ishina kiini, nama a neequmta ishin qara koono qara haalota in qeedan ma nama a dapnaayti a akkitta kandinno'e, a pittitta ishi tiitaysheew. 40Nama takka kadi xootetaayti teyyatta heena ka ke xasasaayye, kaappaatti kuli qara ishi daashew. 41Nama takka kadi pora shakkayta ana olli aane kida ka ke kitteessaayye, pora seka kuli opa isha olli aane. 42A ke qara qinsanno daashe, umma nama a ke qara leqessatta faano an dawran.”
Qoota paarkaala jaalattaati desa
Luqa 6:27-36
43Kamma desaaw Yesuusi ikide, “Akkima kidamte, ‘Innaassina a piita jaalado ka paarkaalaatti needde’ iddakayten#Lewi 19:18 44Anti xoori in ishina kiinii, paarkaalaassin jaalada ka orra ishin jiijno saka; ka a ishin needdannaati'i wa paxaara koda; ka aishin qara wa neeqa koona ka pora ishin daannaati Waaqa qinsada.” 45Oton sede kootaneeyye, hellaa a appaase xaayshin moonte kalooti'i koddita. Isha ukkuttowwa isho orra paxaara'e lettaadi piirinni; ka asseew hanqeellaya isho karpampaya'e roopaadi roopinni. 46Kadii orra ishin jaalanno pattaw jaalannittaneeyye, maana kamma teytan? Juppoolaya kuli asseew kooni in caane? 47Oto hellaassina a piita patta qara harka qeennittaneyye, wa jaalla maana koonittan? a Yihutaata in koddinin asseew kooni in caane?
48“Semalla akka a aappase xaayshina a moonta qaja in qapnin mina'e, ishina asseew a qaja in qapnini kodda.” #Lewi 19:2; ooreta 18:13
