Maatiyoosi 4
4
Yesuusi akka ekkaysatame
Maari 1:12-13; Luqa 4:1-13
1Sekkammaayye Yesuusi akka taapiloosin ekkaysatamo'e, Hapura Waaqa koommaytopa ishan aane#Ip 2:18; 4:15 . 2Ete kuyyaata kunda afuri ka halkeetta kunda afuri damta musade kammaayye ido'e. 3Ekkaysattampaytase ka Yesuusi kapopa de'e ka ishi kide'e, “Atti oton a inna Waaqatiiyyi, intoonney, dakaddosen akka dama koddane ajajeey.” 4Yesuusi xoori i'ishi kide, “Itaafamte ka kiini, ‘Nama, qaaleta afaa Waaqa oppa sookte piisanne kallaanni diisheey, dama pattan kallaanni in co#ooreta 8:3.’”
5Sekkammayye taapiloosi ka katamasene qulqullaawe a Yursaalami opa Yesuusin aane ka tika qulqullootati kuuta qara isha qaatishe, 6ka ishi kide, “Itaafamte ka kiini,
‘Akka loqqaati daka qara in kehaysannini'i, akka harkaassotin ke keleela qapane'e, erkampattowwaadi ke ajajaay,’
oton a inna Waaqatiiyyi, are xata kumpaappe isi shuule#mas 91:11-12.” 7Yesuusi ka ishi oorshe ka kide, “Itaafamte ka kiini, ‘Waaqa Poqallaattin, ekkaysadan#ooreta 6:16 .’”
8Taapiloosi ka oppa oorew ka irroota akata dera qaropa Yesuusin aane; ka mankistewwa piita piisa isho ulfeenaaysho ishi akkishe. 9Ka ishi kide “Kadi ana tura piita ka ana sakatattaayye, sene piisan ke daasha.” 10Sitiiyyi Yesuusi ka ishi kide, “Atti seetano, aane! itaafamte ka kiini, ‘Waaqa Poqallaatti sakatado ka isha pattaaw waaqaysado#ooreta 6:13 .’” 11Sekkammaayye Taaploosi ka Yesuusi diishe. Erkampattowwa Waaqa ka de'en ka isha qara tooyen.
Yesuusi akka kodaadi a kollissa piita Kelilaati paayye
12Yesuusi ete akka Yohaannisi hidame dakayeyye, piita kelila opa aane#Maati 14:3; Maari 6:17; Luqa 3:19-20. 13Ka katama Naasirati alle diishe ka katamasene a Qifirnahoomi piita a Saapilooni isho a Niftaalemitiiyyi pakateeta Kelila kapa caati kallaade#Yoha 2:12 . 14Sede nefo wa malla asse koddite, qaalese a xuuma a xuumampaytase Issayyaasi haasawade ka kide,
15“Piitaddasene porase pakateeta kapopa anno kapaayye caa ka kirra Yurtaanoositiiyyi afa disitiiyyi ca,
A Saapilooni ka a Niftaalemi, isho a Keliila orra Yihutaata in koddinini;
16Samaytase tukkanta oppa kaloo la'ayta kutta akke;
a piitase a kaatta toota qara pi'e, oppa kalaati'i la'ayta ka piire.”
akka dikkatto malla. #Issa 9:1-2
17Sitiiyyi paayyatte Yesuusi ka torra paayye ka kide, “Mankisteeta a Waaqa idehaatteey, juppootayshin oppaayye oora#Maati 3:2 .”
Yesuusi akka Nama afuri a murkuja qapanno hale
Maari 1:16-20; Luqa 5:1-11
18Yesuusi ete pakateeta a Kelila kapan tarpinooyye, hellaa a toola lakki a murkuuja qapanna'e akke, ishootta Simoonise Peetiroosi kidammo isho innaasso intiriyaasi. Ishootta sitiiyyi nyupuraasso pakateeta karopa kanni. 19Yesuusi ka ishootta kide, “Ana kamma xooya! akka murkuja qapanittan mina'en akka ana orra ollopa haleetane'en kodaay.” 20Ishootta ka eennow nyupuraasso alle diishen ka isha kamma aanen. 21Ikka eeppaayye desa tarpe ka hellaa a Septiyoosi lakki; Yayqoopi isho Yohaannisi akkew. ishootta nefo aappaaysho Septiyoosi ollinni koonka kara caan ka nyupuraasso harmisanni; ikka ishootta haleew; 22ishootta ka eennow aappaaysho ka koonkasene alle diishen ka isha kamma aanen.
Yesuusi akka orra lekayta kollishe ka paaqolaya lekaya dinshe
Luqa 6:17-44
23Yesuusi ka tikkasene a qinseeta a orra Yihuta kela kollissanne, ka otootase a fayya amankisteeta Waaqa torreetanne ka a paaqa isho deesa ika lekaytan qapame dinissaanne, piita Kelila piisa oppa tittiitaawni#Maati 9:35; Maari 1:39. 24Qoota kurraadi piita Sooriya pisoppa dakaade malla; orra ka a paaqa isho deesa ika lekaytan miidamma ka a orriyyaan qapame ka a mawna isho totoonnaya piisan isha kapopan de'e; isha ka ishootta dinshe. 25Orra a piita Kelila ka katamaddasene kudan ka Yursaalami isho Yihuta karaayye ka Yurtaanoosi afa disitiiyyi de'e kuttayta ka isha kamma aane.
