Maatiyoosi 3
3
Qaaleta a Yohannisise pishaan orra jaqino torre
Maari 1:1-8; Luqa 3:1-18; Yoha 1:19-28
1Sitiiyyi Yohannisise pishaan orra jaqno koommayta Yihuta oppa qaaleta torreetan deeni ka kollinni ka kiini, 2“Tin mankisteeta Waaqa idehaatteey, juppootayshin oppaayye oora#Maati 4:17; Maari 1:15 !” 3Isaase a xuumampaytase Issayyaasi haasawade ka kide,
“Nessa nama a salinno ka kiino ‘Pora Poqalla harmisha ka saantaadi nefo ishi qajeelsha’ Qoota Yohaannisi desaa lelli;”#Issa 40:3 Sede isha.
4Mehadda a Yohaannisi kalsanna nyirfa kaala oppa kodamen, surraadippa salpata kollatta'e hidanni, damtaadi nefo torrayta ka takma taammata#nuqu a 2ta 1:8 .
5Sitiiyyi Yursaalami desa ka piita Yihuta pisa oppa isho piitadda kirra Yurtaanoosi kapan desa ca pisoppaayye orra ka Yohaannisi kapopa deeni. 6Ka juppootaysho lelanni, ka kirra Yurtaanoosi oppa harka Yohaannisi oppa jaqammi.
7Ma xoori Yohaannisi ete Feresaata isho Saatuqaatoppa lekaya isha kapopa jaqqatta deenaan ikka akkeeyye, i'ishootta kide, “Ishina hella maakaatiiyyi, miirase a Waaqa deeno kelaayye akka qahatane'e ayno tura desa ishina lele?#Maati 12:34; 23:33 8Asseeyye, koda akka a juppootayshin oppa oorten akkinno koda. 9‘Ino an hella Aprihaami’ kideetanne a kela pahatan ishina'en pahanaannin in ishina kiinii Waaqa dakaddosen oppaayye, Aprihaami'i, hella xa'issa iettanshaay#Yoha 8:33 10Amma xoori erkaha qora kela xaayame; Semmalla qoyra dalta fayya dallin kinnin piisa imurama ka apittoppopa katama#Maati 7:19 11Tin anti juppootoppa oorissa'en pishaan ishin jaqini, a ana kamma de'o xoori, Hapura Qulqulloota isho apittanne ishin jaqa isha ana qaropa a kuttate jaalli anti isha kela xopa loqqaadi mikka haadeta mina an qanne 12Isha simaata harkoppa qapade ka ishin fayya awtataappa kappa xayyisha ka miillata kootaroppa kalsha; ka ukkashsha apitta libbini in kinninin kupa.”
Akkima Yohaannisi Yesuusi pishaan jaqe
Maari 1:9-11; Luqa 3:21-22; Yoha 1:32-34
13Sitiiyyi Yesuusi akka harka Yohaannisippa jaqamo'e piita kelilaati desa kirra Yurtaanoosi opa de'e. 14Yohaannisi ka isha dawrini ka kiini, “Asse in koddito anti harkaaytippa jaqama ana parpaaccisniiyi, ata xawwa atti atta ana kapopa deeni?” 15Yesuusi xoori i'ishi oorshe ka kide, “Saantosetinni koda hanqeelluma piisa dikkissa ino faaniy, amma diishe ikka asse koddito” Yohaannisi ka oppa owsade ka isha jaqe 16Ete Yesuusi jaqameeyye sooka pisha oppa sookenne, moonta paname. Ikka Hapura Waaqa a eleela pahanaade ka Yesuusi qara lekkanno akke. 17Sitiiyyiw nessa a kiino “Tin inii innasene xayyo an jaalanna ka mikta ishin xasoonna#uuma 22:2; mas 2:7; Issa 42:1; Maati 12:18; 17:5; Maari 1:11; Luqa 9:35 ” Ka moonte xata dakaade.
