Maatiyoosi 2
2
Tooyampaya a hikka moonta a qinda piirtotati desa de'e
1Sapana a nuqusa Herodiisiiyyi, ete Yesuusi katamasene a Peteleheemi piita Yihutaata kara ca oppa daladeyye; tooyampaya a hikka moonta'e qinda pirtootate desa Yursaalamipa de'en. #2:1 “hikka” kideeta “iska moonta” kideeta. 2Ka kaassaden ka kidene, “Nuqusase a Yihuta delade ayshaayye ca? Hikkittaadin qinda piirtotati akkine ka isha sakatatta deeney;”
3Nuqusase Herodiisi, ete sede dakayeyye itammaqe. Orra Yursaalami kara co piisa ka isha olliiw tammaqe. 4Herodiisi ka saarra qeesewwa piisa isho kollissampaya a seera a samayta, ollopa hale; ka Kiristoosi, aysha akkima delado ishootta kaassade. 5ishootta ka ishi oorshen ka kidene, “Kiristoosi piita Yihutaatiiyyi katama peetelehemi kara'e dalada. Maana malla, xuuma a xuumamapayta taafe ikiini,
6‘Ke a piita Yihuta kara kitto atti Peetelehemi!
qoota mukissampayta samaytiyyo a Isira'eeli siksho ke kara sooko malla,
katamaddasene kutkutta a piita Yihuta kela pakkanna a qajito.’ #Mikki 5:1
7Sekkammaayye Herodiisi ka tooyampayasene a hikka moonta dekoottan halaciise ka, etasene a oppa hikkittase akkaade a dukaata qanqannissa qorade ka upnaade. 8Ka Peetelehemipa ishootta erke ka kide, “Aana ka qoota innaseneti desa qanqannissa qorada ka, oto teytaneeyye, akkan anti kuli aano ka isha sakatado'e, xooya ka ana lela.”
9ishootta ete wa nuqusa kide dakayen kammaayye, isooken ka aanen. Tin hikkittase a qinda pirtootati akken ka ishootta tura oorew. Ka haka porase a innasene caan qara qa'annoti ishootta turadesa aane. 10Ete hikkittase akkeneeyye, ikka a kuttati xasooden. 11Ka tikase kelopa kullen ka innasene isho aayyaasso Maariyaami akken ka kilpiippen ka innaseneti sakataden. Ka saatinewwaasso nefo panen ka warqeeta ka tankarta isho karpeeta ishi daassata daashen. 12Akka Herodiisi kapopan in tiitaawnini'i, qoota Waaqa turadesaaw olsaan ishootta lele malla, ikka pora pilaatinni piitaaysho opa kalen.
Akka innasenetin piita Kipsi opa qahene
13Tooyampayasene a hikka moonta ete tawen kammaayye, erkampattoota Poqalla ka olsan Yoosefi akkaatte ka ishi kiite, “Qoota Herodiisi innasene ikassa faano malla, xa'e ka innasene isho aayyaasso ollin qeede ka, piita Kipsi opa qahe; ka hakan anti ke lelloo kara'e eyye'ew tawe.”
14Semmalla Yoosefi ka halkeettan xa'e ka innasene isho aayyaasso ollin qeede ka, piita Kipsi opan aane. 15Ka haka Herodiisi toono kara'e eyye jare. sede nefo wa malla asse koddite qaalese a Waaqa xuumampayta qudan kide, “Innaayyon piita Kipsiti hale” #Hoose 11:1 Akka dikkatto malla.
Herodiisi akka hellaa shashakka leyshaccise
16Sekkammaayye Herodiisi ete akkima tooyampaya a hikka moonta isha sassapadene upnaadeeyye, a kuttati miirode. Ka Peteleheemi isho palewwa a kapan desa caa piisa opa Foolisootaadi erke, ka sapanase a tooyampaya hikka moonta qara upnaade qara'e, Peteleheemi isho piitada a kapandesa ca karaayye hella diira a para lakki pire ka a kelopaxata ca piisa leyshaccise. 17Sitiiyyi xuumase a xuumampaytase Ermiyaase haasawade ka kide,
18“Raaheeli ete hellaadi malla pooynittoyye;
nessa a oo ino kido kiino isho a pooyta kokkoka raamma kara dakaade; qoota hellaadi le'en malla xasa oorsatta malaalte.” Ka dikkade; #Er 31:15
Piita Kipsiti desa Naasiratipa tiitaawa
19Ete Herodiisi to'e kammaayye, erkampattoota Poqalla piita Kipsitiiyyi olsan Yoosefi akkaatte ka ishi kiite, 20“Orra innasene ikassa faano ile'ey, xa'e ka innasene isho aayyaasso ollin qeede ka piita Isira'eeli opa kale.” 21Yoosefi ka xa'e ka innasene isho aayyaasso ollin qeede ka piita Isira'eeli opa tiitaawe.
22Yoosefi ete akkima Arkelawoosi pakka aappaaysho a Herodiisi oppa piita Yihuta qara nuqusume dakayeeyye, piita Yihuta opa kalta fuure. Ka qoota olsan tura desaaw dehaama isha daasame malla, piita Kelila opa aana. 23Isaase a xuumampaya kidene, “Naasiritta kidama” akka dikkatto'e. Katama Naasirati kidamma opa aane ka eyye kallaade#Maari 1:24; Luqa 2:39; Yoha 1:45 .
