Mataafa orra Lewi 27
27
Daassata a Waaqa dehayshen furatta
1Yaahiwwe ka Muuse kide, 2“Samayta Isira'eeliti lele ka ishootta kide, ‘Nama takka oton Yaahiwwe'e nama xawwi reexxa'e xasa daasadaayye, ka pakka namooseti oppa kaaja a mina ca kalissa faaniiyyi, 3nama a paraadi kunda lakkiiyyi paayyatte haka para kunda lehiti co'e, oton diirtaayye hiila tukkana Waaqatinni dakara pirreeta kiraameta dippa lehi a koddito. 4Oton iskattaayye dakara pirreeta kiraameta kunda sessa a koddito. 5Oton paraadi para keni paayyatte haka para kunda lakkiti caayye, ikkan diirtaayye a dakara pirreeta kiraameta kunda lakki koddito; oton iskattaayye a dakara pirreeta kudan koddito. 6Oton paraadi leya takka paayyatte haka para keniti ca, ikkan diirtaayye hiilaadi a dakara pirreeta kiraameta keni koddito; oton iskattaayye a dakara pirreeta kiraameta sessa koddito. 7Oton paraadi kunda lehi ka qaropeela ca, ikkan diirtaayye dakara pirreeta kiraameta kudanka keni koddito; oton iskattaayye dakara pirreeta a kiraameta kudan koddito.
8“Namoose xasa daasade oton teekolaytaayye ka wa daasha in qapniniiyyi, a namoose a xasa daasaden qeesitta kapopa aano; qeesitta ka wa isha daassata ettansha mina ca isha muro.
9Oton wa namoose Yaahiwwe kalissa xasa daasade'en horeetaayye kalisoota teyyatammittooyye, horeese a Yaahiwwe xawwi reexxamte koddita. 10Namoose kalisoota horeeta dehanno oto a toobuma qaptooyye, a in qapninin in purinin; a toobuma in qapnin a toobuma qaptonne in purinin; oton horeeta a paayyota dehayshe a pilaatin purshaayye, ishootta lakki piisa a xawwi reexxame koddan. 11Oton horeese a dehayshen a nyalteeyye ka Yaahiwwe kalisoota dehassa parpaaccisni in kinnin koddeeyye; namoose a horeese qeesitta turopa dehaysho. 12Qeesitta ka akka horeese toobuma qapto ka in qapnin tooyo; ka heraadi ishi muro umma wa qeesitta mure in pursaman. 13namoose horeese dehanno xoori oton horeese furatta heenaayye, a heraadi qara'e harka ken oppa takka padaawo ka furado.
14Nama takka oton tikaadi xawwi reexxa ka kalisoota Yaahiwwe kalshaayye, kadi punu paxaari taaki neeqiiyyi qeesitta a de'o ka heraadi muro; hera a qeesitta kammate ka mure umma pursama in qapooy. 15Nama a tikoose xaadi xawwi reexxe, oton furatta heenaayye, a heraadi qara'e harka keni oppa takka padaawo ka furado ikka xaadi koddito.
16Nama takka oton dulaadi a qapo qudaayye Yaahiwwe xawwi reexxaayye, heraadi xotta a oppa ayla parpaaccisnaatinni murama; oton xotta a poorta homeeri takka#27:16 homeeri takka kiilota 150-400 mine kitta. oppa aylammiiyyi, heraadi dakara pirreeta sheqileeta kunda keni. 17Namoose oton parase a diissataatiiyyi dulaadi quda xawwi reexxeeyye, heraadi pursama in qapo. 18Ma xoori oton paroose a diissata kammaayye dulaadi quda xawwi reexxiniiyyi, qeesitta haka parase a diissata a itturopa deeno kaynitto kara'e, parra hasna kapa'e, heraadi mura; heraadi xoori herase a dulase parase a diisata turan murame qaraayye qajada. #dikoota 18:14 19Namase dulaadi qudaayye Waaqa xawwi reexxe oton furatta heenaayye, a heraase qara'e harka ken oppa takka padaawo ka furado ikka xaadi koddo. 20Aappa dulooseti oton a Yaahiwwe duloose xawwi reexxe kammaayye a in furannin mali nama pilaati dulase kataayye lammatta furatta in ettansho. 21Oton dulase'e parase a diissatati furamaayye, akkima dula a Yaahiwwe daasame mina'e xawwi reexxama ka qoottota qeesewwa kodda.
22Nama takka oton dula a toolaayshoti in koddinini ikka in lehannin a kaajaadin piddade Yaahiwwe xawwi reexaayye, 23qeesitta haka parase a diisata a kunda kenatta kaynitto kara'e eta a deenaatin a hera a dulooseti muro. Aappa dulooseti ka kaajasine murame awseew a Yaahiwwe xawwi reexxameeti kodo ka xaffalo. 24Parase a diissata oto kaytooyye, duloose aappase a dula a xatta qara piddine'e oorsama.
25Hera a murammo piisa, hiila tukkana Waaqatinni kodda; sheqileeta takka nefo keera kunda lakki (kiraameta) 0.6.
26Horeetoppaayye wa a paayyota dalanna qoota turanneew a Yaahiwwe kodden malla, nama takka nefo horeeta paayyota dalatte Waaqa xawwi reexxa isha parpaaccisni in kitto. Oton punu xormaayye taaki kaharrtaayye a Yaahiwweey. 27Ma xoori horeese oton horeeta a nyalte oppaayye paayyota dalatteeyye, aappa horeeseti heraase murame qara'e harka keni oppa takka padaawa ka horeese furatta i'ettansha; oton furatta ettaninni in kinniniiyyi, xoori horeese a heraase murame katamto.
28Ma xoori wa nama xawwi reexe ka akka in oorrini kode ka Yaahiwwe kalisoota kalshe piisa, oton punu namaayye taaki horeetaayye taaki dulaayye qoota a kuttati qulqullaawen malla pakkanna in kataman taaki in furaman. 29Nama akka to'o isha qara muramte, furatta koddini in kittooy a alle to'o.
30Unta duloppa palinitto taaki luukkata pohammitto piisa qaraayye harka kudan oppaayye takka a Yaahiwweey, a Yaahiwwe xawwi reexamto. 31Nama takka oton harka kudanippa takkase a Yaahiwwe kalshe oppaayye furatta heenaayye, heraadi qara'e a harka ken oppa takka paadaawo ka furado. 32Horeetoppaayye harka kudan oppa takka a Yaahiwwe; oto lo'alla ka kaharra isho telalla dikammaaneeyye, harka kudan oppa takka a Yaahiwwe xawwi reexxamen. 33Namase kalisoota horeeta dehanno, oton a toobuma qapto, a in qapninin in purinnin; ka a toobuma in qapnini, a qaptonne in purinnin; oton horeeta paayyota dehayshe a pilaatin purshaayye, ishootta lakki piisa a xawwi reexxame'e koddan.’” #dikoota 18:21; ooreta 14:22-29
34Ajajaddasene a Yaahiwwe Muuse qudan irroota Siina qaraayye samayta Isira'eeliti daashe sene.
Currently Selected:
Mataafa orra Lewi 27: MaQu
Highlight
Copy
Compare
Share
Want to have your highlights saved across all your devices? Sign up or sign in
