Mataafa orra Lewi 26
26
Saka ajajama minan teyanno
ooreta 7:12-24; 28:1-14
1Yaahiwwe Waaqa ka kide, “Akka ishootta'e a sakatannini'i, killowwa taaki pahana xefame in kodadan; umma daka an dishadan umma piitaayti oppa'e pahana dakaddaappa xefame in dishadan; anti an Yaahiwwe Waaqaayshinaay (Yaahiwwe elohim) #sooka 20:4; Lewi 19:4; ooreta 5:8; 16:21-22; 27:1 2Anti an Yaahiwwe (Yaahiwwe) kuyyaatiyyo a nessuma tooytaada ka tikiyyo a qulqullaawte ulfeessa.
3“Oto taantetiyyo qara'e kallaannittaneeyye ka ajajiyyo tooytinittan ka koda qara nakannittaneeyye, 4etaadi oppa'en ishina roopa daasha, piita ka unta palassa; qora ka daltaaysho dalan. 5Qoota unta akata ishina palito malla, a ishina fera a dikkinin oppa'ew, wayneeta poha kayta ka awayneeta poha a dikkinin oppa'ew ayla kaytaaw; wa damta ka eyye puran akka piitaayshin oppa nakaytan kallaattan. #ooreta 11:13-15; 28:1-14 6Anka piitaayshin oppa nakayta daasha, akka muktan umma wa ishin tammaqishsha in caadan; anka pinaana neeqa piitaayshin oppa alle pashsha, umma oranna piitaayshin kara in koddan. 7Akka nyaapaayshin kamma daantan ikka ishin tura'e, orannaappa pirama. 8Ishin oppaayye nama keni nama dippa puta, nama dippa ka kuma kudan kamma daana; ikka ishin tura'e, orannaappa piraman. 9Anka fuuliyyo ishin opa oorsha ka ishin poorsha ka ishin leksha ka ishin olliiyyi kodeetiyyo kokkonnaysha. 10A unta para tarpe damta qara kittaneeyye, a amma palite kalissa'e, tura a xatta sookissan. 11Anka poriyyo a kallaata otantaayshin oppa kodada umma an ishin an ifado. 12Ka ishin oppa kallaada; ka Waaqaayshin kodda ishina ka samaytiyyo kodditan. #Qoro 2ta 6:16
13Akka ishootta kela karpishshadda kodda quda'e a tawnini'i a piita Kipsi kara ishin sookshe, ana Yaahiwwe Waaqaayshin ka qamparaaysho ishin qara qepshe ka akka jib kiitan ka antane kode.”
Qitaateta a ajajama diissata minan deenitto
ooreta 28:15-68
14Ma xoori oton ana'e a dakayni a kinniniiyyi ka ajajaddosen piisa a kooni a kinniniiyi, 15ka taantewwaayyo piisa jippinittaneeyye ka seeriyyo puyattaneeyye ka ajajaddaayyo piisa tooytaatta diissaneeyye ka seden kodayteetiyyo poottaneeyye, 16anti nefoow seden ishin qara koda, ka tammaqta ka apduma ka awda a ilda lulinno ka dakinta hayno ishin qara qeeda; qoota nyaapa ishin tura damo malla akka untaayshin patta aylaattan. 17Anka ilda miiratin ishin tooyya; nyaapaayshin ka ishin puta; a ishin needda ka ishin piddan; akka a nama ishin daanni in kinnin mali pora qahatan.
18Oto sede piisa ishin qara kayto kammaayye, akka ikki'i ana'e a dakayni a kinniniiyyiiw, juppootaayshin minan harka tappan ishin qatta'a. 19Kamuma isi peepeetaayshina'en alle pashsha; ka moonta lulsha ka ishin qara roopa dawra; ka piita daka koda ka loota ishin qara qeeda. 20Qoota dullaassin unta in palannin qoraassin ka dalta in dallin malla yaalaayshin ka patta pata.
21Oton ana'e paarkaalummittan ka ana afa dakaya tiinnittaneeyye, a juppootaayshina parapaaccisnitto qaropa erkannaata harka tappan ishin qara qeeda. 22Ka pinaana neeqa ishin qaropa diisha; ikka ishin kela hella piran; ka horeetaayshin kuli luuqqishan; akka shakkattan, porraassin ka onan.
23Oton sepisa kammaayye ishina anopa a oorri a kinniniiyi ka ana paarkaalummittaneeyye, 24anti nefo paarkaalaan ishin qara kodda ka juppootaayshin minan harka tappa ishin miidda. 25Qoota kodayteetiyyo pooten malla, oranan ishin qara qeeda ka haalota ishin qara pooyya; ka oto katamaddaassin karopa olopa oortaneeyyeew paaqa ishin piro ishin qara qeeda akka harka nyaapaayshina oppopa tuukkamtan. 26Anka damta ishin qara mura, iskatta kudani ka payqa takka qara laaqqotaayshin laaqqa ka hiilan ishina qoota; akka damtan umma a duttantan.
27Oton sede piisa kamma ana afa a dakayni a kinnin ka ana paarkaalummittaneeyye; 28anti kuli asseewwen miiriyyon ishin qara paarkaaluma ka juppootaayshin minan harka tappa ishin qatta'a. 29Akka so'a hellaassin a diira ka a tuparra damtan. 30Porraassin a sakatatta a irrowwa qara ca alle'en pashsha; ka porraassin a kalisoota a tankarta alle qitqishsha ka pukkadaassin killannasene xaayshin pukkada kodde qaropa dakka ka ishin ifada. 31Katamaddaassin alle'en pootacciisa ka porraassin a quluqlloota lulle hattisha umma alumasene paxaara a kalisootaayshina an teyyado. 32Haka nyaapaayshin a ishin oppa kalo oppa qawwaawnooti'in piisse lulle hattisha. 33Ka mankistewwaappa ishin pasisha; ka oraniyyo qapada ka ishin kamma daana; piitaayshin ka lulle hassa, katamaddaassin ka a qitqite koddan. 34Oto piitaayshin lulle hasto, ishina ka piita nyaapaayshina oppa kallaannittaneeyye, piitaayshin oori para nessuma a Yaahiwwe ulfeessita ka nessumasene a Yaahiwwetin xasootta. 35Piitase a ishina oppa kittaneyye, sampataddaassin oppa para nessuma a Yaahiwwe dapte; ete lulle hasteeyye, nessuma a Yaahiwwe piisa akkatta.
36Ishin oppa, a toota kela pahe ka piita nyaapaayshoti oppa kala qara tammaqtan tuqa; ikka haashsha xoshor kiina tupaayye a orra oranna tura qahano mina qahan; ka a nama ishootta daanni in kinnin mali seehan. 37Ka a nama ishootta daanni in kinnin mali takkan oranna tura qahana mina olqara seehan; umma nyaapaayshin tura qa'atta a ettanissan. 38Akka orra ana amanni in kinnin kara piramtan ka piita nyaapaayshina oppa pattan. 39A ishin oppaayye paha nefo juppootaaysho isho a juppoota aappadaassoti minanne piita nyaapaayshoti oppa'e poyran ka piraman.
40Ma xoori ishootta oto juppootaaysho isase ana falqen ka paarkaalummaatan ana qara xa'en, isho juppoota a aappadaassoti lelannaaneeyye, 41ka juppootase xaaysho akkan anti kuli paarkaalummaatan ishootta qara xa'o ka piita nyaapaayshoti oppopa ishootta daano koote lelannaaneeyye, karittase xaaysho a kamta tuukatta ka qepooyye, ikka juppootaaysho minan qitaateta ishootta parpaaccisnitto akkadaneeyye, 42anti oori kodayteese xayyo an Yayqoopi ka Hisaaqi isho Aprihaami olli kodaden dikada; ka piisse kuli dikada. #uuma 17:7-8; 26:3-4; 28:13-14 43Piittase a ishootta kara sooken ikka onte, haka lulle kitto kara'e, para nessuma a Yaahiwwenne xaysatta; qoota seeriyyo puyaden ka taantewwaayyo jippen malla, ishootta ka qitaateta a juppootaayshoti akkaadan. 44Ma xoori kadi punu sepiisa minan piita nyaapaayshotiti caaneeyye, anti ishootta piisa pira'e alle ishootta an kato umma ishootta an jippo ma kodayteetiyyon dikada; anti an Yaahiwwe Waaqaayshinaay (Yaahiwwe elohim). 45Ma xoori ishootta mallan kodayteetase an aappadaasso olli kodade dikada; anti akkan Waaqaaysho koddo'en fuula mankistewwa tura'e aappadaasso piita Kipsi kara sookshe ; anti an Yaahiwwe.”
46Seera ka taantewwa isho tampewwasene a Yaahiwwe Muuse qudan irrootase a Siina qaraayye isi isho samayta Isira'eeli otantoppa qaatishe sene.
Currently Selected:
Mataafa orra Lewi 26: MaQu
Highlight
Copy
Compare
Share
Want to have your highlights saved across all your devices? Sign up or sign in
