Mataafa Dikoota Kullaysuma
Kullaysuma
Mataafa dikoota haka Isira'eeleta irroota Siinaati xaate paayyatte haka piitase a Waaqa kippeeta ishootta' daashe kaynaan ka piitasetiiyyi xeela a qinda piirtotatin co opa dehaannaan kara'e wa para kunda afuri kara kodde'e torrini. Maxxa mataafoseti wossen kokodde oppaayye wa kutta'e akkinni; wossen nefo, Isira'eeleta a irroota Siinaati in xaanin turanne, Muuse ishootta dike ka xelta takka kammaayyeew, a piitase Mo'api kirra Yurtaanoositi qinda piirtotatin kitto caaneeyye, akkima Muuse samayta piisa dike akkinni; eta a samayta lakkin dikame arta karaayye, samayta Isira'eeli i'aane ka piitase a Qaadesi parne piita Kene'aaniti tupatte kitto kaye. A koddito ma eeyyenne piitose a Kene'aani karopa kulleeta in ettaninne. Ka seminan ete parra a leka eeyye kallaaden kammaayye, piitase kirra Yurtaanoositi qinda piirtotatin kittopa aanen; samaytoppaayye paka takka ka eyye' kallaatta' piisade; a ata hase xoori kirra Yurtaanoosi tuulleeta ka piitase a Kene'aani opa kalta'e dikkisade.
Mataafa dikoota, torroosen samayta oto rakkoota ishootta qara kaytooyye a fuurro ka xasa murro ka Waaqa isho saarase a Waaqa ishootta' reexe Muuse qara' xaanooti desa torrini. Kadi punu samayse nukkulluma qapa ka kamtollayta kodde nefooyye, akkima Waaqa alle ishootta diinni in kinnin ka ishootta qara amanuman tooyno torroose kara ilelamte; Muuse'ew kadi punu awta deemooyye duupatta dapnaayye, akkima amanteeta a kokkoka qapo ka amanuman Waaqa isho samayta kela koda kode i'akkaatte.
Wa mataafose kara ca
Akkima Isira'eeleta Siinaayye xaana ka anta' harmisatte; 1:1—9:23
1. Samayta akkima paayyota' dikame; 1:1—4:49
2. Seerra isho tampewwa ika lekayta; 5:1—8:26
3. Akkima xaysonessuma a qaran tarpeeta lammatta ulfeessamen; 9:1-23
Akkima irroota Siinaati xa'en ka Mo'apipa kalen; 10:1—21:35
Wa piita Mo'api oppa' kodde; 22:1—32:42
Piita Kipsiti paayyatte haka Mo'apiti anta aaname pora kumma'an dehassa; 33:1-49
Dehaama kirra Yurtaanoosi tuulleeta turan daasame; 33:50—36:13
Currently Selected:
Mataafa Dikoota Kullaysuma: MaQu
Highlight
Copy
Compare
Share
Want to have your highlights saved across all your devices? Sign up or sign in