Mataafa Uumata 46
46
Yayqoopi akka toolaadi ollin piita Kipsi opa kotaane
1Yayqoopi ka wa qapa piisa pootade ka anta' xa'e. Ka ete Persape kayeeyye, Waaqase a aappaaysho a Hisaaqi'i, kalisoota kalshe.
2Waaqa ka halkeettiiyyi kelashaatoppan isha hale ka kide, “Yayqoopi! Yayqoopi!”
Ishi ka ehade ka kide, “Ee! Poqallaayyo in dakayni.”
3Ikka ishi' kide, “Waaqa opa aappaayshina ana. Piisse a Kipsi oppa'en sanynyeetaayti lekshaay eepa anta in fuuran. 4Kipsi opa ke olliiyyin aana. Ka piisse a are oppa' kallaatte oppopa kuli sanynyeetaayti oorshaaw. Oto' toonittooyyeew Yoosefi ke kapa caada ka pukkaayti ollopa oorsha.”
5Yayqoopi ka Persapehiiyyi piita Kipsi opa anta' xa'e. Hellaa Yayqoopi ka aappaaysho ka hellaasso ka iskattaaysho' qeeden ka sarakelladdasene a nuqusa Kipsi erke qara fayyishen. 6Yayqoopi isho sanynyeetaadi piisa horeeta ka wa piita Kene'aaniti qapane piisa qapaden ka piita Kipsi opa kotaanen. #koda 7:15 7Yayqoopi hellaadi ka tuparraadi isho oopaddaadi ollinni piita Kipsi opa kalen.
8Hellaa Isira'eeli a piita Kipsi opa kale, sene arekammopa xata ca; kuuta Yayqoopi Roopeeli. 9Hellaa Roopeeli, Heenookki ka Faalu ka Hesrooni isho Kaarimi. 10Hellaa Simooniiw, Yimu'eeli ka Yaamini ka Ohaati ka Yaakini ka Sohaari isho Shaa'ulise a enenta Kene'aani xaayte. 11Hellaa Lewiiw, Kershoni ka Qa'aati isho Meraari. 12Hellaa Yihuta'ew, Eeri ka Onaani ka Seella ka Faares isho Saaraahi. Eeri isho Onaani xoori piita Kene'aani oppa'ew le'en. Hellaa Faaresiiw, Hesrooni isho Hamuli. 13Hellaa Yisakooriiw, Tola'i ka Fuuwa ka Yaashupi isho Shiimrooni. 14Hellaa Saaplooniiw, Sereti ka Elooni isho Yaahila'eeli.
15Hellosen isho alawtaaysho Tinna a piita Mosoppotaamiyaati kalane Liyya' xaayte. Hellaa Yayqoopi a Liyya' xaayte oopadda ollopa kunda sessa sessa kayni. 16Hellaa Kaati, Safoni ka Haaki ka Shuuni ka Esponi ka Eeri ka Arooti isho Ari'eeli. 17Hellaa Aseeriiw, Yimna ka Yishiwa ka Yishiwi isho Pari'a. Alawtaaysho'ew, Seraahi kidammi. Hellaa Pari'ew Heperi isho Maalki'eeli. 18Hellaa Yayqoopi a orxayteetase a Liyya Siilfa' xaayte opadda olopa kudanka lehi kayni. 19Hellaa Yayqoopi a Raaheeli' xaayte Yoosefi isho Piniyaami. 20Hellaa Yoosefiiw, Minaase isho Efreemi. Yoosefi piita Kipsiti Asnaati enenta Potifaara ise qeesitta katama Ooni koddeeti heme ikka hellosen xaayte. #uuma 41:50-52 21Hellaa Piiniyaamiiw, Pelaa'i ka Pekeri ka Ashpeli ka Keera ka Na'imaani ka Ehi ka Rooshi ka Mufiimi ka Hufiimi isho Areti. 22Hellaa Yayqoopi, a Raaheeli' xaayte oopadda olloppa'e, kudanka afuri kayni. 23Inna Taani, Hushiimi. 24Hellaa Niftaalemiiw, Yahisi'eeli ka Kunni ka Yeseeri isho Shiilemi. 25Hellaa Yayqoopi, a orxayteetase a Laapa enentaadi Raaheeli' daashe, a Paala' xaayte oopadda oloppa'e tappa kayni. 26Sanynyeeta Yayqoopi a isha olli piita Kipsi opa kotaante, iskatta hellaadi mali nama kunda lehi' lehi. 27Hellaa Yoosefi lakki a Kipsi' dalade olloppa'e, hellaa Yayqoopi isho hellaasso ollin nama kunda tappa piita Kipsi opa kotaane. #koda 7:14
Toola Yayqoopi akka piita Kipsi' kayen
28Yayqoopi akka Yoosefi piita Kesemi opa turopa de'o'e Yihuta itturadesa erke. Ete Kesemi kayeneeyye, 29Yoosefi sarakella qara'e kuti'e ka aappaaysho minopa aane. Ete kapa kayeeyye aappaaysho quda'e dinkitta' koke ka akata pooye.
30Yayqoopi ka Yoosefi' kide, “Akka a' toonin amma oori in akkeey, kadin punu to'a i'ana kayta.” 31Yoosefi ka oori hellaasso isho toolayshoti' kide, “Ana Feri'ooni kapopa aano ka kido'e, ‘Tollinno piita Kene'aaniti ana kapopa de'e. 32Ishootta horeeta siksanni ka kaharra ka telalla ka lo'alla a qapane piisan de'aden.’ 33Ishina'ew, Feri'ooni oto ishin halacciiso ka kaassanno ka kiino'e, ‘Kodaayshin maana?’ 34Ishi' kida'e, ‘Ino akka aappadaanno mina'ewwen kaharra siksattaan kallaanninna.’ Oton asse' kiitaneeyye orra Kipsi' qoota orra kaharra siksanno kojeessino malla, piisse a Kesemi ishina' daasha akka oppa' kallaattaneey.
Currently Selected:
Mataafa Uumata 46: MaQu
Highlight
Copy
Compare
Share
Want to have your highlights saved across all your devices? Sign up or sign in
