Mataafa Uumata 47
47
1Yoosefi ka Feri'ooni kapopa aane ka ishi' kide, “Aappinno isho hellaanno kaharra ka telalla ka lo'alla ka wa piita Kene'aaniti qapane piisa qapaden ka arepa de'en ka piita Kesemi oppa' kuti'en.” 2Ka hellaasso oppa nama keni reexe ka Feri'ooni kapopan aane.
3Feri'ooni ka ishootta kaassade ka kide, “Maana' koonittan ka ishin kallaannittan?”
Ishootta ka ishi' kidene, “Ino orxayaatti akka aappadaanno mina'en kaharra siksanninna. 4Qoota loota piita Kene'aani oppa akata koopte, deetta a horeeta damto ka aataayye in kinnin mallan arepa kotaanne. Semmalla orxayaatti akkan piita Kesemiti' kallaanno'en ke naappanninna.”
5Feri'ooni ka Yoosefi' kide,
“Ete hellaassin ka aappaayshin ke kapopa de'eneeyye, 6piita Kipsi piisa ke tura kittaay, piisse a Kesemi akata paxaara aappaayshin isho hellaassina' daashe, ishoottoppa nama ookuma qapo ka kokkoka reexe ka horeetiyyo qara' shuume.”
7Sekkammaayye Yoosefi ka aappaaysho Yayqoopin Feri'ooni kapopa aane. Yayqoopi ka Feri'ooni' sake. 8Feri'ooni ka Yayqoopi kaassade ka kide, “Paraayti meeqa?”
9Ikka kide, “Parra an piita qara pora rarraataawaan pire dippa ka kunda sessa kayni. Parrasene a aappadaanno rarraataawaan kallaadene mina kayni in caan ma rakkowwa akata oppa' koope.” 10Ka oori Feri'ooni' sake ka kapa sooke.
11Yoosefi ka akka Feri'ooni ajaje mina'e, piitase paxaara katama Raamise kapa kitto, aappaaysho isho hellaassoti' qapata' daashe ikka oppa' kallaanni. 12Ikka matta mattanne, akka lekuma hellaasso a qapane mina'e, unta ishootta' daanni.
Yoosefi akka lootoppa orra tuullishe
13Qoota loota koopaanneew ante malla, piitoppa unta idapatte. Kipseeta isho Kene'aaneta ka lootosetin akata miiddamen. 14Yoosefi oto unta ishootta' katooyye, kaajosene qeenni ka tika Feri'ooni opa kalinni. 15Samayta Kipsi isho a Kene'aani ka unta heratta kela kaaja pirade. Kipseeta ka oli xa'isse ka Yoosefi kapopa ante ka kiite, “Kaaja in piranne ka lootan piramminnaay, unta an dammo ino' daashe!”
16Yoosefi ka kide, “Ete' kaaja piratteneeyye, horeetan xooya ka untan pursada.” 17Ishootta ka horeetan Yoosefi kapopa de'en. Ikka parooseti fartadaasso ka harrewwaasso ka kaharraasso ka telallaasso isho lo'allaasso kapa'e, unta ishootta' daashe, ikka parase oppa seden tuullen.
18Ikka para kamma deenooyye isha kapopa de'en ka kiiniiwwi, “Poqallaanno, waan ke tura juunna in caan. Kaaja an qapna piisan piranne, horeeta an qapno nefo kepaawwen kalinneey, issi ka dulla mali waan ke' daanna takkan nefo an qapno. 19Hela xawwi assen ke kapa piramma? Dullaanno ka lulle hasane? Ino ka dullaanno teyyado ka kapa unta ino' daashe. Ino ka karpishshadda nuqusa' koddino, dullaanno nefo ka a xaadiiw kodden. Akkan ino an pirammini'i unta ino' daashe ka xotta an aylanna kuli ino' daasheew.”
20Qoota loota koopte malla, Kipseeta piisa dullaasso kate. Yoosefi ka dulla Kipsi kara ca piisa nuqusa' pidde. Dulla piisa ka oori a nuqusa'ew kodden. 21Orra a Kipsi kara kalo piisa ka karpishsha nuqusa'ew kodde. 22Qeesewwa qoota Feri'ooni kapa qaarqaarsa teynaan malla, dullaasso in kanne. Yoosefi oori dulla qeesewwa patta in piddinin.
23Yoosefi ka samayta' kide, “Amma qootan ishin ka dullaassin Feri'ooni pidde malla, xotta qedada ka dullassin oppa aylada. 24Ma xoori oto' fertane, wa' palaysattane harka keni oppa harka takka tika Feri'ooni opa' kalissan. Ka harka afuri issi' hattisattan ka a aylannittan aylattan ka a' dammittan hellaassin ka toolaayshin ollin damtan.”
25Samayta ka kide, “Poqallaanno, qoota wa paxaara ino' koote ka pirameeta kela inon pahate malla, karpishshadda a Feri'ooni in koddina.” 26Yoosefi ka dullasene a qeesewwa mali dulla pisa oppa harka keni oppa unta harka takka akka tika Feri'oonipa kalto'e, seera kode. Seerose ka haka awweti koda qara nakayni.
Yayqoopi kodeeta kode
27Hellaa Isira'eeli piita Kipsiti pora Kesemi kiinaan oppa'e kallaanni. Ka eeyye akata teyantooden ka hellaa lekaya kuli xaayaden.
28Yayqoopi para kudanka tappa piita Kipsiti' kallaade. Paraadi ka para dippa ka kunda afuri tappa kaye. 29Yayqoopi ete tootaadi kela kayteeyye, inaadi Yoosefi halacciise ka ishi' kide, “Innaayyo, oton i'ana ulfeessiniiyyi, oton to'ooyye akka piisse a Kipsi oppa ana a' hawlinini'i, kupeettiyyo qara harka qapado ka xaxa ana' kale. 30Ka oton to'ooyye pukkiyyo piita Kipsiti qeede ka turka a aappadaanno oppa hawlamene oppa ana hawle.”
Yoosefi ka kide, “Aappo, akka ana' kiite mina'en koda.” #uuma 49:29-32; 50:6
31Yayqoopi ka kide, “Akka keeto kooto, xaxa ana' kale.” Ikka ishi' xaxade. Yayqoopi ka loshshasene a qara ca qara xataaw Waaqa' sakatade ka isha kalataysade.
Currently Selected:
Mataafa Uumata 47: MaQu
Highlight
Copy
Compare
Share
Want to have your highlights saved across all your devices? Sign up or sign in
