Mataafa Uumata 45
45
Yoosefi akka hellaassoti isi upnayshe
1Ete Yihuta haasa dikkisheeyye, Yoosefi duupatta malaale ka orra isha kapa co piisa akka alle' sooko ajaje. Semmalla a Yoosefi hellaassoti isi upnannooyye, nama pila takka nefo ishootta kapa in co. #koda 7:13 2Ikka oori nessaadi kuttishe ka pooye, Kipseeta kuli ka isha dakayte. Sede ka tika Feri'ooni kuli kara' dakaatte.
3Yoosefi ka hellaassoti' kide, “Anti an Yoosefi. Hela aappinno keeto amma ikki ca?” Hellaasso' qoota tatammaqen malla, oppa oorissa nefo malaalen.
4Ikka ishootta' kide, “Ana kapopa heeqqa.” Ikka ete heeqqeneyye ishootta' kide, “Anti an Yoosefi, innasene xaayshin a' piita Kipsi opa kattene. 5Akkan orran paho malla Waaqa ishin tura desa ana erkeey, qoota arepa ana katatten malla in nyarrahan ka in qaapan. 6A piita qara Loota paayyatte desa amma para lammatta'ew. Parra ofini oppa in aylannini ka in ferannini keni amma ikki haseew. 7Akkan rakkoose asse pahato oppa ishinan paho ka sanynyeetayshin ka piita qara hasto'e Waaqa ishin tura desa arepa ana erke.
8“Semmalla, ishinannema Waaqa arepa ana erke. Ka akkan Feri'ooni dehaamo kode, anka tikaadi qara poqalla kodde ka piisse a Kipsi piisa mukinni. 9Amma jarjartan aappinno kapopa tiitaawa ka isha' kidae, “Innatti Yoosefi ikiini, ‘Yaahiwwe piisse a Kipsi piisa qara'e poqalla ana kodeey, jarjartan ana kapopa xooye. 10Piita ana kapa deha'e kessemi'i kallaattaay, hellaatti ka oopaddaatti ka kaharraatti ka telallaatti ka lo'allaatti isho wa' qapta piisa ittura' qapado ka xooye. 11Parra loota keni amma ikki' caay, akka a' rakkannini'i xooya ka anka piita Keshemiti'i ishin qara tooyo. #koda 7:14
12“Akkan anti an Yoosefi ka afaanno haasawanno ishina i'akkiten, innaanno Piniyaami nefo ka ana akkeew. 13Ulfeena an piisse a Kipsi oppa qapo ka wa ildaassinan akkitene kala ka aappinno' lela ka jarjartan arepan xooya.”
14Sekkammaayye Yoosefi ka Piniyaami haddune ka dinke ka xasootta ilmaama urqishe, Piniyaami kuli ka asseew ilmaama urqisheew. 15Yoosefi ka xasoottaan hellaasso piisa diddinkini ka kello ilmaama urqinni. Hellaasso ka sekkammaayye isha olli hasawatta paayyen.
16Akkima hella opa yoosefi piita Kipsi opa de'en ete tika nuqusa kara' dakaatteeyye, Feri'ooni ka mukissampaya Kipsi piisa' xasoode. 17Feri'ooni ka Yoosefi' kide, “Hellaassina' kide'e, ‘Harewwaassin fee'ada ka piita Kene'aani opa kala. 18Ka aappaayshin isho toollaassin qeeda ka arepa oora. Piita Kipsi oppa pora akata paxaaran ishina' daasha, akka damta fayya akkattaneey.’ 19Ka sarkeelladda a qara iskattaaysho isho hellaasso kutiishane a areew teyyaden ka ishin kaladen. 20Ishootta' qoota Kipsiiyyi piita paxaara akkadan malla waasso a alle diinnaane ishootta in dakaannin.”
21Hellaa Yayqoopi ka oori akka ishootta' kidamte mina' koden. Yoosefi ka akka nuqusa isha ajaje mina'e, sarkeelladda ka kalaata ishootta' daashe. 22Ka mehadda olqara' kalsadane takka takka ishootta piisa' daashe. A Piniyaami xoori mehadda olqara' kalsada keni ka pirreeta dippa sessa ishi' daashe. 23Ka aappaayshoti'i, wa piita Kipsi kara papaxxaara harreeta kudan ka oto piita Kipsi opa deenooyye, kalaata a pore xata damo harreeta kudani qara fee'e ka erke. 24Ka ete hellaasso keessinooyye ishootta dehaame ka kide, “Nama poroppa oli in peeqnin.”
25Hella opa Yoosefi ka piita Kipsiti xa'en ka piita Kene'aani opa aappaaysho kapopa tiitaawen. 26Ka aappaayshoti' kidene, “Ha Yoosefi intoone ma, piita Kipsi piisa qara'e mukissampayta kodde.” Yayqoopi ka oori akata tammaqe ka wa kiinaane dukaysatta kuli malaale.
27Ma xoori ete wa Yoosefi ishootta' kide piisa ishi' torreneeyye, ikka sarakella a qara Kipsipa aana akka ishi erke akkeeyye, akata xasoode. 28Ka kide, “Ete innaayyo Yoosefi cooyye, i'ana kaytaay, ana an intoonin turan aano ka innaayyo akko.”
Currently Selected:
Mataafa Uumata 45: MaQu
Highlight
Copy
Compare
Share
Want to have your highlights saved across all your devices? Sign up or sign in
