Mataafa Sooketa 37
37
Akkima taapota kodeeta Waaqa koonan
sooka 25:10-22
1Paasli'ei ka jeela kolalta oppaayye taapota kode; derumtaadi dikla lakki ka paka, paldumaadi dikla takka ka paka ka moontandela derumaadi dikla takka ka paka. 2Ka karanne isho laka tulan warqeeta paxaaratin uwwishe; ka kamaarraadi minandesa warqeeta ishi kode. 3Ka loqqaadi afuri quda'e, warqeetoppaayye jifeewwa afuri kode ka lakki paka takkan ka lakki paka pilaatin loqqa quda qaqqapsiise. 4Ka jeela kolalta oppaayye molookadda kode ka warqeetan quda uwwishe. 5Ka akka taapotasetin haadane'e, molookaddasene xoorrawwasene qindadda quda ca karandesa kukullishe. 6Ka warqeeta paxaara oppaayye dufana diisata a derumtaaysho dikla lakki ka paka paldumtaadi ka dikla takka ka paka kayno kode. 7Ka dufanasene a diissatatiiyyi paka pakan warqeeta a tumamteppaayye pahana erkampattoota a kirupeeli lakki kode. 8Ka pahana kirupeeleta takka qinda takkan kode ka a kirupeeleta pilaati qinda pilaatin kodeew ka pahana kirupeeleta lakki isho dufanasene a diisata olloppa takka kode. 9Pahana kirupeelese lakki, fuulaaysho olminopa oorshen ikka dufanasene a diisata oppa tooyanni ka xoollaasso lakki opeela xaashen ka oliminan kayen ka dufanasene a diisata qara deken.
Akka tarabbeesa a qara laaqqota qulqullaawte xaaynaan koonaan
sooka 25:23-30
10Ka tarabbeesa a derumtaadi dikla lakki ka paldumaadi dikla takka ka moontandela derumaadi dikla ka paka kayo jeela kolalta oppa kodeew. 11Ka warqeeta paxaaratin quda uwwishe ka siibaadi minandesa kamaara warqeeta ishi kodeew. 12Ka kamaarase qara'e warqeeta a paldumtaadi laabbota takka kaynitto mare ka warqeetase maramte minaadesa kamaara warqeeta ishi kode. 13Ka tarabbeesaseti'i warqeetoppa jifeewwa afuri kode ka loqqasene a tarabbeesa afuri minanxata qeppeelliyya afur quda qaqqapsiiseew. 14Ka akka molooka karandesa kullo, opa ka tarabbeesosetin haadane'e jifeewwasene kaamara kelopeela heeqqishe. 15Ikka akka tarabbeesosetin haadane'e jeela kolalta oppaayye molookadda kode ka warqeetan quda uwwisheew. 16Ka meehase tarabbeesa qara xaayammo, saahinna pappallda a kara tankarta xaaynaane ka tistewwa ka jilfada ka moqorqoradda a kalisoota ikkayta ka kolobbawwa saahinna warqeeta paxaara oppa kodeew.
Akkima meeha qara ipsa xaynaane koonaane
sooka 25:31-40
17Paasili'eli ka warqeeta paxaara oppaayye meeha a qara ipsa xaaynaane kodeew. ka kirittaadi isho qudupattaadi warqeeta a tumamteppa kodeew; ka pisa a paqqe ka haashshaadi isho kultaadi quda co pahanaayshe ka pora takka'ew kode.
18Ka quduppattase quda'e paka takkanne taama sessa ka paka pilaatini taama sessa olloppa taamma lehi kodeew. 19Taammosen lehi a qudupatta ipsa quda ca matta mina'e, pahana pisa lawseeta a in paqqinin a quda dankatta ka kulta qapa sessa sessan quda siramen. 20Qudupattaadi nefoow pahana pisa a lawseeta an paqqinin a quda dankatta ka kulta qapo afurinni quda siren. 21Ka qudupattoose qudaayye himina a oppaayye taammosen fujuqen kelaayye pahana pisa an paqqinini sessa ca. 22Qudupattaadi ka taammaadi isho pisaddoosen in paqqinini piisa ka warqeeta paxaara ka a tumamteppaayye pora takka kodamen. 23Ka asseew ipsaddosen tappa ka mehaddaadi a kara apitta libbinnaan isho saahinna a kela xaaynaane kuli ikka warqeeta paxaara oppaayyeew kode. 24Ikka meehose qara ipsa xaaynaan ka mehaddaadi piisa warqeeta mekiliteeta takka#37:24 warqeeta mekiliteeta takka, kiilota kunda afuri sessa minae kitta. oppaayyeew kode.
Akkima meeha a kalisoota a qara tankarta qayyannaan koonaan
sooka 30:1-5
25Ikka meeha kalisoota a qara tankarta qayyannaan a derumaadi isho paldumaadi dikla takka kodde takka kodeew, qindaddaadi afuri piisa ka olmina'ew ca; derumaadi a moontandela ka a dikla lakki. Meehase a kalisoota isho kaassaadi pora takka'ew jeeloppa kodamen. 26Ka qarandesa ka qindaddaadi piisa qudandesa ka kaassaadi piisa warqeeta paxaaratin quda uwwishe, ka minandesa kamaarra a warqeeta ishi kode. 27Akka molookadda karandesa kullan opa ka ishin haadane'e, kamaarose kelaxata qeppeelliyya pakka lakki qara ishi jifeewwa warqeeta kodeew. 28Ka jeela kolalta oppaayye molokadda kode ka warqeetan quda uwwishe.
Akkima sayteeta daatannaan isho tankarta alaawnitto koonaan
sooka 30:22-38
29Paasili'eli ka sayteetase daatammitto qulqullaawte isho tankartase alaawnitto paxaara akkima orra shittoota koono mina kodeew.
Currently Selected:
Mataafa Sooketa 37: MaQu
Highlight
Copy
Compare
Share
Want to have your highlights saved across all your devices? Sign up or sign in
