Mataafa Sooketa 38
38
Akkima porase a kalisoota a qara kalisoota kupannitto dehannaan kodame
sooka 27:1-8
1Ikka jeela kolalta oppaayyeew pora kalisoota a qara kalisoota kalinnaan kodeew; derumaadi dikla keni ka paldumaadi dikla keni ka moontandela derumaadi dikla sessa, qindaddaadi afuri piisa ka olmina caan. 2Ka poroose a kalisoota qara'e qeppeelliyya afuri qara'e kaassa kode. Porase a kalisoota isho kaassasene pora takka'ew kodamen. Ikka piisa sipla pooran quda uwwishe. 3Ka mehaddaadi piisa, tistewwa a karopa tara kattinaane ka paallawwa apitta. ka kolobbawwa saahinna ka qaptowwa isho wa a kara dila qaptinnaane sipla pooroppaayyeew kode. 4Ka porose a kalisoota kara'e sipla a poora oppa kinkilsha a karan tara seehino kode; ka akka kinkilshose pora kalisootati de'o'e kamaara kela xata qinda karatin xaaye. 5Ikka akka molookadda karandesa kullane'e opa ka ishin haadane'e, porase a kalisootaati'i sipla poora oppaayye jifeewwa kode ka kamaarraadi quda jajaqqalshe. 6Ka molookaddasene jeela kolalta oppa kode ka sipla poora quda uwwishe. 7Ka akka ishin haadane'e, jifeewwasene qeppeelliyya quda ca karandesa molookaddasene kalshe ka porase a kalisoota shammoppa kodame, afaan qaawwe diishe.
Akkima saahina a oppa pisha jaqannaan kodame
sooka 30:18
8Paasili'eli ka sipla poroppaayye saahina a kara pisha jaqannaan isho meeha saahinose kara xaayammo kode; siplose poora nefo, kaawwatase a sipla poora a iskattase xarra tukkana Waaqa turaayye koda koono ishin de'e quda qeede.
Akkima kullaysuma tukkana kodamen
sooka 27:9-19
9Kammadesa kullaysuma paapaha tukkana'e kode; ka kaarantaddasene qinda tupattatin ca, xaynaata paxaara a qora talpa oppa shippamte oppaayye dawamen; dedderumaasso nefo dikla dippa. 10Tuudda a kaarantaddoseneti kunda lakki ka kelaayye kiriyya sipla poora oppa kodame kunda lakki qapan. Tuuddosen rakumamampaya jifewwa a dakara pirreeta oppa kodame isho tula qaraayye tarkowwa qapa. 11Qinda qutattatin deruma a kaarantoseti dikla dippa takka; tuudda a kaarantoseti kunda lakki ka kelaayye kiriyya a sipla poora oppa kodame kunda lakki qapanni ka rakumamampaya jifeewwa a dakara pirreeta oppa kodame isho tuudda qaraayye tarkowwa qapan. 12Qinda dumaatatinniiw, kaarrantadda a derumaasso dikla kunda keni kaynaane'e ca; ka tuudda kudan ka kiriyyaasso kudan, ka rakumamampaya jifeewwa a dakara pirreeta oppa kodame isho tuudda qaraayye tarkowwa qapan. 13Qindase a piirtota a kullaysuma caanetinni, palduma a paapahoseti dikla kunda keni. 14Kullaysumaappaayye paka takkane kaarrantadda a derumaasso dikla kudanka keni kaynaane'e ca; ka tuudda sessa ka kiriyya sessa qapan. 15Qinda pilaatinniiw tuudda sessa a isikela kiriyya sessa qapa'e caaw. Qara xata kaarantadda a derumaasso dikla kudanka keni kaynaane'e caaw. 16Kaarantadda a paapahose kapandesa ca piisa xaynaata paxaara a qora talpa oppa shippamteppaayye dawamen. 17Kiriyya tuuddoseneti sipla poora oppa kodamen; rakumamampaya jifeewwa isho tuudda qaraayye tarkowwa ca assew dakara pirreeta oppa kodamen; kuutadda tuuddoseneti nefo asseew dakara pirreetatin qara uwwisamen; tuuddosen paapaha kapandesa ca piisa ka tarkowwa a dakara pirreetatin olmina qaqqapamen. 18Kaaranta a kullaysuma paapahoseti nefo, rufta moonta pahato ka a awla ka a tiima oppa dawamte ka xaynaata paxaara a qora talpa oppa shippamten pujamte; akka kaarantaddasene a paapaha mina'e derumaadi nefo dikla kunda lakki ka paldumaadi dikla keni. 19Tuuddosen afuri nefo ka kirriyya a sipla poora afur qara dishamen; rakumamampaya jifeewwa a dakara pirreeta oppa kodame ka kuuta tuudda isho tarkowwa qapan. Kuutadda tuuddoseneti nefo asseew dakara pirreetatin qara uwwisamen. 20Shikaalla a tukkana isho a paapaha kapandesa ca piisa sipla poora oppa kodamen.
Siplalla a koda tukkanati daasame
21Akka Muuse ajaje qara'e Lawaata ka marra'a Itamaari a inna qeesittase a Arooni ka ishootta qara saarummo mina'e, mehadda a tukkanase a Waaqa amaakkumati daasame ka dikame sene arepa xata ca.
22Kafase a Yihuta oppaayye Paasili'eli innasene a Uuri oopaase a Huuri ka akka Yaahiwwe Muuse ajaje qara'e we piisa kode. 23Isha qudaayyeew kafa Taanippaayye Aholi'aapi innasene a Hiisamaki harmitta ka akeeka sookinni ka rufta moonta pahato ka a awla ka a tiima isho xaynaata paxaara a qora talpa oppa shippamte oppaayye ohawwa dawni ka pujni.
24Tukkanase a Waaqa qulqullaawe qupa'e warqeeta daassata kalte oppaayye a koda qara nakayte hiila tukkanase a Waaqa qulqullaawenne, mekliteeta kunda lakki sakal ka sheqileeta dippa tappa kunda sessa#38:24 hiila warqeetoseti kiilota kuma minae kitta. kayte. 25Dakara piireeta a smaytase dikame qara pohame, akka hiilase a tukkanase a Waaqa qulqullaawenne mekliteeta dippa ka sheqileeta kuma takka ka dippa tappa ka kunda tappa keni#38:25 hiila dakara pirreetoseti, kiilota kuma sessaka dippa afur ka kunda sessa minae kitta. kayni. 26Diira dikame a paraaysho kunda lakki ka qaropeela co, kuma dippa lehi sessa ka dippa keni kunda keni kayni ishootta ka matta mina'e akka hiilase a tukkanase a Waaqa qulqullaawe qara'e, peekka takka takka; se kideese nefo sheqileeta qudaayye paka paka#38:26 sheqileeta quda paka, kiraameta 5. 5 minae kitta. kalshen. 27Dakarase a pirreeta a pohen oppaayye mekliteeta dippan#38:27 mekliteeta dippa, kiilota kuma sessa ka dippa afur minae kitta. , kiriyya dippa qapaya tukkana isho a kaarantaddaati'i koden; se kideese nefo kiritta takka mekliteeta takka pirri kideeta. 28Dakara pirreeta sheqileeta kuma takka ka dippa tappa ka kunda tappa keni, #38:28 kiilota kunda lakki minae kitta. rakumampaya jifeewwa a tuuddaatin koden ka kuuta tuudda qaran uwwishen ka oppaayye tarkowwaan koden. 29Sipla a poora a koda Waaqati daasame, mekliteeta kunda tappa ka sheqileeta kuma lakki ka dippa afuri. #38:29 hiila sipla apoora, kiilota kuma lakki ka dippa afur minae kitta. 30Paasili'eli ka siplose poora oppaayye kullaysuma tukkana Waaqa kela kiriyya kode; ka porase a kalisoota a sipla poora isho a kinkilshaadi oppaayyeew kode ka mehaddasene a pora kalisoota piisa oppaayyeew kode. 31Ka oxinta a paapaha qudandesa kitto isho a kullaysuma kela'e kiriyyan kode ka shikaalla a tukkana Waaqa isho a oxinta paapaha kapandesa kittootin kode.
Currently Selected:
Mataafa Sooketa 38: MaQu
Highlight
Copy
Compare
Share
Want to have your highlights saved across all your devices? Sign up or sign in
