Mataafa Sooketa 36
36
1“Paasili'eli ka Oholi'aapi isho harmootase a Yaahiwwe ishootta upna ka ookuma daashe piisa, akka Yaahiwwe ajaje qara'e tukkanase xaadi qulqullaawe koda'e harmisatta paayyen.”
Samayta akka daassawwa lekayaan de'e
2Muuse ka Paasili'eli ka Oholi'api isho harmootase a Yaahiwwe ishootta upna daashe isho nama karittaadi kara kodoose kodaa'e xasa qapo piisa ollopa hale. 3Ikka tukkanose qulqullaawe a Waaqa qupaa'e daassawwasene a samayta Isira'eeli daashe piisa Muuse qaraayye teyyaden; samayta ka ikki'i teykanta piisa xasan daassawwasenetin deeni. 4Harmootase tukkanase a Waaqa qulqullaawe qupnitto piisa ka kodase olloppa diisse ka Muuse kapopa ante 5ka ishi kiite, “Ha samayta kodase a Yaahiwwe ajaje koda'e a parpaaccisnitto qaropa ishin deena tupaayye ca.”
6Muuse ka ajaja daashe; opan ka erkanosen safaroppa salishen ka kidene, “A diirta kodde taaki iskatta koddite nama takka nefo daassattannen deenin!” Samayta ka akka daassawwaan in deenini dawrame. 7Maana malla dassata daasamte koda aparpaaccisno qaropa kinnaatteey.
Qupeeta a tukkanase a Waaqa
sooka 26:1-37
8Orrase koda koono oppaayye, a harmuma jaalla ka kaarantadda kudan oppaayye tukkanase a Waaqa qupen; kaarantaddosen nefo rufta moonta pahato ka a awla ka a tiima isho xaynaata a paxaara qora talpa oppa shippamteppa dawamen; opanka qara pahana kirupeeli pujen. 9Kaarantaddosen piisa olimina'ew caan, derumta kaarantaddoseneti matta matta mina'e dikla kunda lakki sette ka paldumaasso nefo dikla afuri. 10Ishootta ka kaarantadda keni olquda heheeddishen ka kaarantadda a ata hase keni olquda heddisheneew. 11Ka kamaara a kaarantaddasene keniti a paayyota qarandesa ohaata moonta pahato oppaayye jifewwa rakkumaya koden ka kamaara a lammatta a olquda heedishen qarandesa asseew kodeneew. 12Ka kamaarra kaarantaddasene a paayyota qarandesa jifeewwa rakkumaya kunda keni koden ka a lammatta qarandesa asseew jifewwa rakkumaya kunda keni kodeneew; kamaara kaarantaddasene qarandesa jifeewwa rakkumayasene ka olmina desa qunamen. 13Ka rakkumampaya a xoorrawwa kunda keni warqeetoppa koden ka kaarantaddasene paka lakkin ca qaqqapsiisampaysenetin ollopa qaqqapsiisen; tukkanase a Waaqa ka oori takka kodde.
14Ka tukkanase a Waaqa qaran deka'ew nyirfa tela oppa kaarantadda kudanka takka dawweneew. 15Kaarantaddosen nefo olmina'ew caan; derumta kaarantaddaseneti matta matta mina'e dikla kunda sessa, paldumaasso nefo dikla afuri. 16Ikka kaarantadda keni xawwi olquda heeddishen ka kaarantadda lehi olquda xawwi heeddisheneew. 17Ka kaarantaddosen olmina heeddishene mina'e, kamaara kaaranta a piraampira qara'e, jifewwa rakkumaya kunda keni koden ka a paka pilaatin kitto mina'e, asseew jifeewwa rakkumaya kunda keni kodeneew; 18Ka akka tukkanose takka koddo'e, rakkumampaya jifeewwa kunda keni sipla poora oppaayye kodeneew. 19Ka tula qaran tukkanase qaran deka'e, kollaya kahirra a qalameeta tiimatin daatene koden ka a pila qaran deka'e, kollaya pahashene a tela oppa koden.
20Ka tukkanase kela'e tuudda jeela kolalta koden. 21Tuuda takka derumaadi dikla kudani ka kappuma tiitawwataadi dikla ka paka. 22Tuuddosen piisa akka ollopa qapamane'e matta matta'e mina qaawwa lakki lakki qapan; ishootta ka tuuddasene a tukkanaseti piisa pahana asse pahaatin koden. 23Ka tukkanoseti qinda tupattatinni tuudda kunda lakki koden. 24Ka tuuddasene kunda lakki kela'e, dakara pirreeta oppaayye kiriyya kunda afuri koden ka akka olkaropa kalane'e, tuudda piisa kela'e loqqa lakki lakki koden. 25Ka qinda qutattatinni tuudda kunda lakki kodeneew. 26Ka tuudda piisa kela'e, loqqa lakki lakki koden ka ishootta kela'e, olloppa'e kiriyya kunda afuri dakara pirreeta oppa koden. 27Ka tukkanaseti tultan qinda dumaatatin tuudda lehi qa'eneew. 28Ka qeppeelliyya tukkaneeyye tuultan ca qara'e, tuuda lakki qa'eneew. 29Tuuddosen a qeppeelliyya lakki xati paayyatte haka iliti olquda qaqqapsiisamen ka tuudda a qeppeellitta pilaatin ca olimina de'en ka qinda lakki piisan asseew koden. 30Semmalla tuudda sette mina'e, kiriyya kudanka lehi dakara pirreeta oppa kodame; tuuda takka mina'e, kiriyya lakki lakki koden.
31Ka tuuddasene tukkaneeyye paka takkan caati'i, jeela kolalta oppa tarkowwa keni kodeneew; 32Ka tuudda a paka pilaatin caati'i tarkowwa keni kodeneew ka tuudda tukkanaseti xati kamman paka a qinda dumaatati qateeti tarkowwa keni kodeneew. 33Tarkoota otanta, a paka takkaayye desa a pila opa arta tuudda qarandesa derayshen. 34Ka tuuddosen quda warqeetan uwweshen ka akka tarkowwosen qapane'e, tuuddosen quda xoorrawwa a warqeeta kodeneew. Ka tuuddosen quda xoorrawwa a warqeeta kodeneew.
35Ka rufta moonta pahato ka a awla ka a tiima isho xaynaata paxaara a qora talpa oppa shippamte oppaayye kaaranta dawen ka pahana a kirupeeli qara pujen. 36Ka kolalttoppa tuudda afuri koden ka warqeetan quda uwwishen ka qaqqapsiisampayaasso warqeetoppa koden ka kiriyya afuri dakara pirreeta oppa tuuddasene kela kodeneew. 37Ka xarrase a tukkana tura'e, rufta a moonta pahato ka a awla ka a tiima isho xaynaata paxaara a qora talpa oppa shippamteppaayye kaaranta dawen ka oppa sira pujen. 38Ka kaarantaseti tuudda keni a qudaayye qapsiisampaya qapa qa'en; ka kuutadda tuuddoseneti isho tarkowwaasso warqeetan uwwishen; ma xoori kiriyyaasso keni sipla poora oppa koden.
Currently Selected:
Mataafa Sooketa 36: MaQu
Highlight
Copy
Compare
Share
Want to have your highlights saved across all your devices? Sign up or sign in
