Mataafa Sooketa 21
21
Qoota karpishshadda mukissaati desa
ooreta 15:12-18
1Seera a samayta Isira'eeli tura kooto toy sede. 2Oton Ipritta karpishsha kodde piddattaayye, a para lehi ke kela karpishshumo; ma para tappattatiiyyi a we ke'en kaffalen mali a nataan sooko. 3Oton xawwaati de'eyye, a xawwaati sooko; oton xoori a deenooyye iskatteeta qapaayye, a isha olli sookto. 4Oton poqallaadi ishi iskatteeta hemsheeyye, ikka inna diirta taaki enenta isha xaayteeyye, iskatteetose isho hellaadi a poqallaadi'i koddan; isha ka xawwaati nataan sooka. 5Ma xoori oton karpishshase'e kiini, ‘Anti poqallaayyo ka iskatteetiyyo isho hellaayyo in jaalanniiy, nataan sooka an heenooyye,’ 6Poqallaadi a taanynyada turopa ishan aano ka xarra taaki qoyra xarra quda isha qaatisho ka napahataadi diddiptan urro; ikka haka toono'e, isha kela karpishshumo. #Lewi 25:39-46
7“Nama takka oto enentaadi karpishshuma katooyye akka karpishshadda a diira mina'e asse patta nataan sookeeta isheetta faani in kitto. 8Oton poqallaadi isheetta hema fadeeyye ka kuli isheetta tiiteeyye, aappaaysho a isheetta furado diisheey, poqallaadi qoota isheetta qara dapa kode malla orra haptati isheetta katatta'e mapteeta in qapo. 9Xoori oton akka innaadi isheetta hemane faaniiyyi, a enentaadi mina isheetta muksho. 10Nama takka oton iskatta lammatta hemaayye, iskatteetaadi a paayyota qaraayye damta taaki ohawwa taaki maptetaadi a turan qapto isheetta qaraayye qajissa isha parpaaccisni in kitto. 11Oton wossen sessa isheetta kooni in kinniniiyyi, a we takkan nefo kamma in teyyannin maliiyyi a nataan isheetta diisho.
Seera orra nama qara rakkoota qeenno qara' sooke
12“Nama nama qide ka ishshe, a kapa ishshamo. #Lewi 24:17 13Ma xoori oton namoose'e namase to'e isha tura'en asanniniiyyi, anti Waaqa ka harkaadippa isha kateeyye, poran anti isha akkinno opa a qaho ka paho. #dikoota 35:10-34; ooreta 19:1-13; Iyya 20:1-9 14Oton nama takka nama pila qara miirode ka a upooyye ishsheey, kadi punu poriyyo a kalisoota kapopa qahaayye, qeeda ka alle ishsha.
15Nama aappaaysho ka ayyasso qido a alle ishshamo.
16Nama nama hate ka katade taaki ikka harkaadippa teyade a alle ishshamo. #ooreta 24:7
17Nama aappaaysho taaki aayyaasso ote a alle ishshamo. #Lewi 20:9; Maati 15:4; Maari 7:10
18“Oton nama lakki oli peeqaayye, takka ka takka dakaan xapta taaki xottooman toomaayye ikka mataawa taaki paqa ka in toonin ka looshsha qara paaqaayye, 19Ka xa'a ka pora xalissanniiyyi, haka sede toomame fayya dinno kara'e a isha ado ka eta a paaqe piisa kapa'e, kaaja ishi daasho diisheey sede qaropeela in kaassatammin.
20“Nama takka oton Karpishshaadi taaki shetteetaadi uleetan daysheeyye ikka harkaadippa toa'ayye taaki tootaayye a xorado! 21Ma xoori karpishshase taaki shetteetase xaadi oton kuyyaata takka isho lakki kara xa'aayye, qoota kaajaadi kodde taaki koddite malla xoratta isha faani in co.
22Oton nama lakki oli qiiniiyyi ka arta kara iskatteeta inna qapto dayshaayye, inna ka kara sookaneeyye, miiddota a pila ka in kinniniiyyi, namase isheetta dayshe wa diirta iskatteeseti isha kaassanna taanynyada ka isha qara murane a xorado. 23Ma xoori oton iskatteese akata miiddameeyye, seerase kiino, ‘Napseeta kapa napseeta, 24ilta kapa ilta ka ilkitta kapa ilkitta, harka kapa harka ka loqta kapa loqta, #Lewi 24:19-20; ooreta 19:21; Maati 5:38 25kupanitta kapa kupanitta ka mata kapa mata, tittirmaamissa kapa tittirmaamissa’ seeroosetin qara farata.
26“Nama takka oton karpishshaadi taaki shetteetaadi daysha ka ilta kara joolshaayye, a iltase malla nataan isha taaki isheetta diisho. 27Oton karpishshaadi taaki shetteetaadi kara ilkitta kataayye, a ilkittose malla nataan isha taaki isheetta diisho.
Seera horeeta a miiddota kaytinnitto malla sooke
28“Oton xorma diirta taaki iskatteeta tooma ka ishshaayye, xormoose a dakaan dakkamo ka ishshamo; umma so'adi in damammin; ma xoori aappa xormooseti xoratta isha faani in kitto. 29Ma xoori oton xormoose'e turanneew orra tottoommi, opa ka aappa xormoosetiti lelen ikka tikoppa in hiddanniniiyyi, ikka diirta taaki iskatteeta ishshaayye, xormoose a dakaan dakkamo; aappa xormooseti kuli a dakaannew dakkamo ka to'o. 30Ma xoori oton kaaja a issin furada'e qara katamaayye, a kaajosen piisan xorado ka napseetaadi furado. 31Xorma takka oton inna taaki enenta a nama takka'e tottoomaayye, seerosetinniiw qara farata. 32Xorma takka oton karpishsha taaki shetteeta nama takka'e tottoomaayye, aappa xormooseti a dakara pirreeta sheqileeta kunda sessaan#21:32 kiilota 0. 3 kayni. , aappa karpishsha taaki a shetteetasetiti xorado; xormoose nefo a alle dakaan dakkamo ka ishshamo.
33“Nama takka oton qaawa tura pana ka asse diishaayye taaki qaawa qota ka tura dufa diishaayye, xorma taaki harreeta ka karopa pi'itaayye, 34aappa qaawoseti a kaajaan xorado ka kaajosen aappa horeetooseti daasho ka horeetoose toote teyyado! 35Xorma nama takka oto xorma nama pila tottoomooyye ka ishshooyye, xorma a co a katamo; so'a xorma to'eti isho kaajosen a xormose katameeti ka a ishootta lakki olqitteeta qootamen. 36Ma xoori oton xormoose'e turan paata tottoommiiyyi, aappoose ka moona kara dufatta diisheeyye, a xormoose to'e teyyado ka a co kapan ishi daasho.”
Currently Selected:
Mataafa Sooketa 21: MaQu
Highlight
Copy
Compare
Share
Want to have your highlights saved across all your devices? Sign up or sign in
