Mataafa Sooketa 22
22
Seera qapna tooytaatta
1“Nama takka oton xorma taaki laaha hata ka qalaayye taaki katadaayye, xorma takka kapa'e a xorma keni daasho ka laaha takka kapa'ew, laaha afuri daasho; maana malla kera wa hate oorissa isha faaniiy, oton wossen a hate kapa'e wa daasha in qapniniiyyi, a isha kapa katamo#22:1 “maana malla kera . . . katamo” a kiinitto afaa Iprutinni dikoota sessa qara'e akkaanni. . 2Kera takka oto xarra qepinnooyye daysama ka to'ayye, aappa isha dayshe diikaadippa in kaassatamo. 3Ma xoori oton a letta piirto kammaayye kerose tika qepinni ka daysamaayye, aappa isha dayshe diikaadippa ikaassatama.
4Kerose oton horeese a hate, xorma taaki harreeta taaki laaha a co kodda ka harkaadippa teyadaayye, a harka lakki oorsho.
5“Nama takka oton horeetaadi dula taaki dishma wayneeta a nama pila oppopa dawwa ka oppa diisha ikka dula la'ayyo damtaayye, a kapa dulaadi taaki dishmaadi a wayneeta a paxaara daasho.
6“Oto apitta xa'o ka hujjittoppa qapado ka tuula unta taaki unta a in ferammin taaki dula piisa kupooyye, namase a apitta kela xa'e a se piisa kapa oorsho.
7“Nama takka oton kaaja taaki mehadda nama pila kapa ataran xaayadaayye, kera ka namase kela hataayye ka qapamaayye, a kapa harka lakki oorsho. 8Oton kerose'e in teyannin xoori, aappa a kaajosen taaki mehaddoosen kapa ataraan xaayamen a taanynyada turopa dehaado ka akka harkaadi hatanse oppa in kinnin upnaysho.
9“Nama takka oton xorma taaki harreeta taaki laaha taaki ohaata taaki wa pata a pila'e taanteta mali qapade ka xayyo kiiniiyyi, a pila ka de'e ka xayyo kiiniiyyiiw ka oli shiishniiyyi, a lamatti taanynyada turopa aanen; nama a taanynyada qara dapa muren ka harka lakki daasho.
10“Nama takka oton nama pila kapa'e harreetaadi taaki xormaadi taaki laahaadi taaki horeetaadippaayye a pila takka atara xaayadaayye ikka tootaayye taaki qeptaayye taaki a nama in akkinin maliiyyi halkeette qulamtaayye, 11Aappa a kapa horeeta xaayamte, akka harkaadi oppa in kinnin a maxxa Yaahiwwen xaxado; Aappa horeeseti a xaxoosen teyyado ka aappa atarosen kapa xaayade qara we in kaassannin. 12Ma xoori oton aappa atarosen kapa xaayade kelaayye horeese patteeyye, a kapa oorsho. 13Oton pinanta dameeyye xoori, a wa kela hase maakkitta ishin de'o; umma wa pinanta damte kapa'e xaffala isha parpaaccisni in kitto.
14“Nama takka oton nama pila kapaayye horeeta maalsadaayye ikka aappa horeeseti kamman tootaayye taaki qeptaayye, aappa maalsade a ishi maalshe'e, a kapa horeeta oorsho. 15Ma xoori oton aappase maalshe eeyye caayye, aappa a maalsade kapa kaaja in daannin; oton horeese xaayya daasheeyye xoori, miiddose kapa'e a kaajasene a xaayya kasaara teyyado.
Seerra a qoota taantetan kallaatta isho a amanteetati desa daasame
16“Nama takka oton enenta issin kitto sassapada ka ollii mukaayye, a kamma a deeta daasho ka isheetta hemo. 17Oton aappa opa enenta'e akka in heminini isha dawriniiyyi ikki'i deeta a enenta issin kitto kama daannaan mina kitto, aappaayshoti daasha isha parpaaccisni. #ooreta 22:28-29
18“Tipampayteeta iskatteeta a orroppa alle ishshamto; #ooreta 18:10-11
19“Nama horeeta olli mukno a alle ishshamo. #ooreta 18:22; 20:15-16; ooreta 27:21
20“Nama Yaahiwwe maliiyyi waaqadda pilaati kalisoota kalinno a alle ishshamo. #ooreta 17:2o
21“Qoota ishina kuli turan piita Kipsi kara kalayta kodditen malla, kalayta qaran kalan ka in miiddan. #sooka 23:9; Lewi 19:33-34; ooreta 24:17-18; 27:19 22Hiyyetteta aappa qara to'e isho he'aya hellaa a aappa ka aayya in qapnini in rakkacciisan. 23Oton irakkacciistan ikka anopa ullupaneeyye, anti dukaatannen ullupittaaysho dakaya. 24Miiriyyo ka ishin qara opaya anka orannaan ishin pira; iskattaayshin ka hiyyeettewwa kodda; hellaassin qara aappada ishootta xaaye ka le'an.
25“Samaytiyyo oppaayye oto teekolayta takka kaaja leqeessitaneeyye, a daltan leqeessino in koddan ka qara dalta in kaassadan. #Lewi 25:35-38; ooreta 15:7-11; 23:19-20 26Oton ohaata nama takka'e we kapa qapsiisatteeyye, a letta in dummin turan ishi oorshe. 27Ohaata a qapo sede pattaay ikka isiquda qapanniiy, xawwi maana kela muka? Oton anopa ullupa in dakaya, anti an suraysattampaytaay. #ooreta 24:10-13
28“Waaqa qara'e afaa otitta in haasawadan umma saara samaytaayshina in jiijan. #koda 23:5
29“Untaayti ka taadetaayti a wayneeta isho sayteetaayti a ekerita qara qarpatta ana kalissa an diishan.
“Ka innaatti a kuuta a diirta ana daashe. 30Okkayaatti isho kahirraattippaayye asseew ana kalshe; nyalqaasso a kuyyaata tappa aayyadaasso kela jaren ka kuyyaata settattati ana kalsha.
31“Ishina qoota samayta ana xawwi reexxame kodditan malla, so'a a leetteta a pinanta koommaytoppa qapte in daman alle kutta turopa kata. #Lewi 17:15
Currently Selected:
Mataafa Sooketa 22: MaQu
Highlight
Copy
Compare
Share
Want to have your highlights saved across all your devices? Sign up or sign in
