Mataafa Sooketa 20
20
Seerase kudani
ooreta 5:1-21
1Waaqa ka qaalewwosen piisa haasawade ka kide, 2“A piitase a Kipsi a kara karpishshadda kodditen kara a ishin sookshe ana Yaahiwwe Waaqaayshin.
3“Ana maliiyyi waaqadda a pila in qapnaadan.
4“Wa moonta quda ca taaki piita qara ca taaki pisha kela ca oppaayye pahana takkan nefo issi in xefadan ka killoota'en kodadan. 5Ka ishootta'en sakatadan umma in waaqaysadan; anti Yaahiwwe Waaqaayti an yo'ampayta Waaqa; a ana needda qara'e, juppoota a aappadaasso minanne haka xelta sessa ka a afuri'in hellaasso qattaani. #sooka 34:17; Lewi 19:4; 26:1; ooreta 4:15-18; 27:15 6Ma xoori a ana jaalanna ka ajajiyyo tooytannaati'i haka xelta kumati'in xoonasene xayyo pirama in qapnin akkinni. #sooka 34:6-7; dikoota 14:18; ooreta 7:9-10
7“Maxxiyyo a Yaahiwwe a Waaqaayti patta'en xaashan; anti Yaahiwwe nama maxxiyyo patta xa'ino an qatta'o mali an diinni an cooy. #Lewi 19:12
8“Kuyyaata a nessuma Waaqa qulqullayshe ka ulfeesse. #sooka 16:23-30 9Koda kodatta'e kuyyaata lehi qapta; 10Kuyyaata tappatta xoori Yaahiwwe Waaqaayti'i, kuyyaata nessuma. Semmalla kuyyaasetiiyyi ke taaki enenaatti taaki innaatti taaki orxaytaayti taaki orxayteetaayti taaki horeetaayti taaki haptitta a tikaaytippa co, a koda takka nefo a kootan. #sooka 23:12; 31:15; 34:21; 35:2; Lewi 23:3 11Maana malla Yaahiwwe kuyyaata lehi kara'e piita isho moonta ka pakateeta ka wa ishootta kara ca piisa uume ka kuyyaata tappattati nessadeey; semmalla anti Yaahiwwe kuyyaase a tappatta in sake ka qulqullayshe. #uuma 2:1-3; sooka 31:17
12“Piita an anti Yaahiwwe Waaqaayti ke daanno qara'e, akka paraayti deraado'e, aappaayshin ka aayassin ulfeesse. #ooreta 27:16; Maati 15:4; 19:19; Maari 7:10; 10:19; Luqa 18:20; Efe 6:2-3
13“Naman ishshan.
14“In dahalan umma in dahalsadan. #Lewi 20:10; Maati 5:27; 19:18; Maari 10:19; Luqa 18:20; Roomi 13:9; Yay 2:11
15“in hatan. #Lewi 19:11; Maati 19:18; Maari 10:19; Luqa 18:20; Roomi 13:8
16“nama takka nefo qara dartan in maakkuman. #sooka 23:1; Maati 19:18; Maari 10:19; Luqa 18:20
17“tika nama pilaati takka nefo in xajeelan, umma iskatteeta taaki orxayta taaki orxayteeta taaki okkaya taaki harrewwa taaki wa a namooseti kodde takkan nefo in xajeelan.” #Roomi 7:7; 13:9
Samayta akkima fuure
ooreta 5:22-33
18Samayse piisa ete qaqawwase isho kaasase dawammo dakayeeyye ka hankaadase isho irrootase kuutaawnitto akkeeyye, fuuraanne xare ka lakadesa qa'ade; 19Ka Muuse kide, “Atti'iw ino haasawado in ke kela dakaynaay, akka Waaqa ino haasawado'en kodan, in leenaay.” #Ip 12:18-19
20Muuse ka samaytaseti kide, “In fuuran, akka Waaqa fuureeta ishin kara caatto akka juppoota a koonini'i, Waaqa ishin ekkaysatta'e de'ey.” 21Ete Muuse tukkantase nan kiite a Waaqa kara co kapopa dehaannooyye, samayta laka desa qa'ade.
Qoota killanna ka a porra kalisowwa
22Yaahiwwe ka Muuse kide, “Samayta Isira'eeliti kide, ‘Akkan moonte xata ishina haasawade ishina mattaayshina i'akkiten. 23Ana maliiyyi waaqadda a pila in qapnaadan ka dakara pirreeta taaki warqeetoppaayye killanna an kodadan. 24Dooqqetoppaayye pora kalisoota ana koda ka qara'e laahadda ka qolpaya isho xormada qala ka kalisoota a kupannitto isho a takkumtati koda ka kalsha. Akka maxxiyyo matte oorsatamo'e, pora an reexade piisa oppopan de'a ka ishina sakaay. 25Oton dakaappaayye poqa kalisoota ana koonittaneeyye, siplan quda laajeta ishin parpaaccisni in kitto; maana malla oton siplanne quda laajnittaneeyye inynyalinnittaneey. #ooreta 27:5-7; Iyya 8:31 26Akka saalaayshin pora kalisootiyyo qaren akkaannini'i, pora fayyumatiiyyi dela pora kalisootiyyo qaropa in fayyadan.’”
Currently Selected:
Mataafa Sooketa 20: MaQu
Highlight
Copy
Compare
Share
Want to have your highlights saved across all your devices? Sign up or sign in
