1 Bhakolinto 2
2
Kwaatangacha Akilisito jwaakabhambwa panchalaba
1Akaanung'una bhangu, nenga panakahika kwaajinunji, nangantangachianga ngani ya kweli ya Annoongo, na nangatumia malobhe ga kupenya penya au kwa malango ga bhandu. 2Panakibha na mwangota mbalita ngotokuchimanyanga chilebhe choachela, nambo mbalita naamanye Ayesu Kilisito jikajabhe, jwaakabhambwa panchalaba. 3Nenga nakahika kwaachinunji nakachibhona ngakombola kutenda genigala goa yakubhee Akilisito akapala mbangane, kongo mii na bhoga na kulendemela ligongo linunji. 4Gandendita kulongela na kujigana nangabhoa malobhe ga kwaabhajila bhandu na ga malango, na ndendakulongela gangani kulangia ndendakulongolelwa na machili ga Mboomo ja Annoongo. 5Nakapangana henela ligongo lya kuhobhalela kwitu kukombole kulupalila machili ga Annoongo na ngabha malango ga bhandu.
Malango ga Annoongo
6Hata henela, twenga tukatumia malobhe ga malango kwa bhandu bhenibhala bhabhakomilinge chimboomo, nambo malango genago ngabha ga pamba pachilambo, wala ngabha malango gagabhoka bhatawala bha chilambo chenjeni bhabhabhilinge mu nkutuli gwa kuhobha. 7Malango gatugatumia nga malango ga kweli ga Annoongo, Annoongo akapala kutenda genago kubhokela kandai ligongo lya ukolo gwitu twenga. 8Jwakwa hata atabhala jumo bha machobha gitu jwaakachimanya chikubho chenjeni. Handa bhakaimanyitinge, bhakaabhambitehopo Hangwana bha ukolo. 9Nambo, handa chigalobhola Majaandiko ga Annoongo,
“Hilebhe yakubhee mundu jwangagabhona, wala mundu jwangagajoanikia,
hata mundu jwangakombola kugaganikila muntima gwabhe,
gangani nga Annoongo gaatekwapanganikianga bhabhampala.”
10Nambo hikubho yenjeni Annoongo atekutuhunukulila kwa ndela ja Mboomo jwabhe. Mboomo kulolekea kila chilebhe, hata hikubho ya nkati muno ya Annoongo. 11Nga ganiki jwaakombola kumanya hikubho ya nkati ja mundu ila nga mboomo jabhe mundu jonojwe? Hela hela mboomo ja Annoongo nga jwamanya hikubho ya nkati ya Annoongo. 12Nangocheni twenga twangapokela mboomo ja pachilambo, ila tupokilinge Mboomo jwaabhoka kwa Annoongo ili atujangatile kugamanya genigala gatupatite kubhoka kwa Annoongo.
13Bahi, twenga tujigana ngabha kwa malobhe gatukajiganwa na malango ga bhandu, ila nga malobhe gatukajiganwa na Mboomo, tubhikujigana hikubho ya chimboomo kwa bhabhabhilinge na jono Mboomo. 14Mundu jwangaahobhalela Annoongo ngapokela hikubho ya Mboomo jwa Annoongo. Kwabhe mundu jonojwe nga changalimmbone, na jonojwe ngakoombola kugaelewa, ligongo genago gaeleweka tu kwa kujangatilwa na Mboomo. 15Nambo mundu jwaatandaikwa na Mboomo jwa Annoongo akoombola kuhukumula kila chilebhe, nambo bhenibhala bhangatandaikwa na mboomo jwa Annoongo ngakombolanga kumanya hikubho hiipanganikwa na bhenibhala bhabhatandaikwa na Mboomo jwa Annoongo. 16Majaandiko galobhola,
“Nga ganiki jwaakombola kumanya luunda lwa Hangwana?
Nga ganiki jwaakombola kwaalobholela Annoongo chilebhe chakupangana?”
Nambo twenga tubhii na luunda lwa Akilisito.
Currently Selected:
1 Bhakolinto 2: NTNHBL
Highlight
Copy
Compare
Share
Want to have your highlights saved across all your devices? Sign up or sign in
The New Testament in Ndondehamba Language ©The Word for the World International and Ndondehamba Language Translation, All rights reserved.
