1 Bhakolinto 3

Akaatumichi bha Annoongo

1Akaanung'una bhangu bhamwahobhalela Kilisito, nenga nangakoombola kunnyigananga mwangota handa bhandu bhankwetinge na jono Mboomo, nambo ikapalikwa kunnyigananga mwangota handa bhandu bhangaamanya Annoongo, handa bhana ilemba mu kwahobhalela Kilisito. 2Nakannyigananga hikubho ya kupepeka handa kambombe pabhaanyongea mwana jwabhe, nangampekeanga chaakulya chakulimba, kwakubhee mwakibhanga tangu kuchipokela. Na hata nangocheni ngakombolanga kuchipokelanga. 3Ligongo tangu mwangota ntamanga handa bhandu bha chilambo heche chibhatamanga. Kwakubhee tangu gubhii bwihu na kupwatanilana pakati jinunji! Hikubho heyo hilaangia pangali kuhiya kubhee mwangota tangu nga bhandu bhantamanga handa bhandu bha chilambo cheche chibhatamanga. 4Kwakubhee jumo pakati jinunji pabhalobhola, “Nenga ndendakwaakonda Apaulo,” na jongi, “Nenga ndendakwaakonda Apolo,” bholi, heyo ngalaangia kubhee ntamanga handa bhandu bha pachilambo chibhatamanga?

5Bholi, Apolo nga ganiki? Na bholi, Apaulo nga ganiki? Twenga nga akaatumichi bha Annoongo bhatutendakunyangatila mwangota ili nkombolange kwahobhalela Akilisito. Kila jumo pakati jitu atenda lihengo libhalipatite kubhoka kwa Annoongo. 6Nenga ngapanda mbeju, Apolo akajitila machi, nambo Annoongo nga jwaakatenda jene mbeju jikoombole kumela. 7Henela jonijola jwaapandite na jonijola jwaakajitila machi ngabha chilebhe, jwaatendite lihengo likolongwa nga Annoongo tu jwaajikombolea mbeju kumela. 8Mundu jwapanda mbeju alandana na jonijola jwaajitila machi, kila jumo apakulepwa kubhokana na lihengo libhaliteendite. 9Ndendakulongela henela kwa kubhee lihengo litutendakupangana nga ja Annoongo na mwangota na ng'onda gwabhe. Twenga nga akaalongo, tututendakupangana mahengo pamo na Annoongo, kabhele nga nyuumba jabhe.

10Kwa kujangatilwa na umbole gwa Annoongo, ndekubhee jwakujemeka kuntangachiaga mwangota Ngani Jammbone ja Akilisito handa henela achengi jwaamanya kuchenga pabhajemeka kuchenga nyuumba. Nangocheni bhabhajigana bhangi bhaika kunnyigananga handa henela akaachengi bhangi chibhachenganga panani jakwe. 11Jwaakwa mundu jwaagaletite majigano gangi kwa kubhee majigano gayene gabhile tiyali nga Ayesu Kilisito. 12Bhena bhabhajigana majigano ga Ayesu nga handa akaachengi bhabhachenganga nyuumba kwa kutumia bhunyu, mbiya au maganga ga bei ngolongwa, nambo bhabhajigana bhabhangajigana majigano gabhe maha nga handa akaachengi bhabhachenganga nyuumba kwa kutumia mikongo, mahamba au manyai. 13Kwa kubhee lichobha helyo kila lihengo lya mundu lipakubhonekana na kupemwa. Lipakupemwa kwa mooto, na gono mooto gupakulenga kupema lihengo lya kila mundu. 14Handa lihengo lya mundu ngatinika mu goono mooto, apakupokela ngwahupa. 15Nambo handa lihengo lya mundu lipakutinika mu mooto, ngapata ngwahupa, nambo jono mweene apakuokolewa handa henela mundu jwaacholopwike pa mooto.

16Bholi, ngaimanyanga kubhee mwangota nga Nyuumba ja Annoongo, na kubhee Mboomo ja Annoongo jitama nkati jinunji? 17Mundu jwapakujialibiana Nyuumba ja Annoongo, Annoongo apakunkoma jono mundu, kwakubhee Nyuumba ja Annoongo nga Nyuumba jabhe mwene, na Nyuumba ja Annoongo jenejo nga mwangota akaachinabhene.

18Nkotokuchitembanga. Mundu joajola pakati jinunji handa achibhonite atekola malango pachilambo pani, hipaalikwa abhe jwangali malango ili akombole kubhee na malango ga kweli. 19Kwakubhee malango ga bhandu bha chilambo heche nga gangali gammbone nnongi ja Annoongi. Kwakubhee Majaandiko ga Annoongo galobhola, “Annoongo atendakwaakamulanga akaakola malango mu kupenya kwabhenji.” 20Na kabhele, “Hangwana haimanyi kubhee kuganikia kwabhenji akaakola malango ngabha chilebhe.” 21Henela, mundu joajola akotokuchipunila chenichela chibhapangananga bhandu, kwakubhee hilebhe yoha nga yinunji. 22Nkotokuchipunila hilebhe hiipanganikwe na Apaulo na Apolo na Apetulo, chilambo, umomi na kujomoka, hikubho ya nangocheni na hikubho hiika, goha nga gigunji. 23Nambo mwangota nga bhandu bhabhe Kilisito, na jono Akilisito nga jwa Annoongo.

Currently Selected:

1 Bhakolinto 3: NTNHBL

Highlight

Copy

Compare