Roma 5

Magi kan Jisus pigpalikuꞌ kitadun adti Tyumanem

1Yanagaw, asuntu na pigdawat da kitadun na Tyumanem kasiling na walaꞌ da ya salaꞌ magi sa pagpangintu-u tadun, nyakalikuꞌ da kitadun adti kanan asuntu sa pig-imoꞌ ni Jisu-Kristu na kanaten Matas na Pangulu. 2Aw magi sa pig-imoꞌ ni Kristu aw sa pagpangintu-u tadun kanan, nyadawat tadun ya grasya na Tyumanem. Yanagaw, migleya kitadun dun ni kanaten pag-iman na makasambuk kitadun kagaya adti kadyawan na Tyumanem. 3Aw bekeꞌ oloꞌ yeiy, migleya kitadun uman pangkay madég ya pagti-is aw manga kalugan. Kay kya-ede-an tadun na magi sa pagti-is tadun pigpakabagseg kitadun na Tyumanem pada mabatug tadun ya pagtandaꞌ kanaten. 4Aw kun mabatug tadun ya pagpadeleg pangkay awun pagtandaꞌ, magleya kanaten ya Tyumanem. Aw kun magleya kanaten ya Tyumanem, awun imanen tadun. 5Aw dun ni kanaten pag-iman, diliꞌ saba kitadun kabullugan. Kay pigpa-edeꞌ da nan kanaten na to-o kitadun nan pigginawa͡an. Pig-atag nan kanaten ya kanan Ispiritu pada matmuꞌ kitadun na kanan pagginawa.

6To-o dakulaꞌ ya pagginawa kanaten na Tyumanem. Sa kenneꞌ na walaꞌ pa ya mabatug tadun sa pagpaluwaꞌ sa pagka-utawun tadun, dun ni allaw na dadan da na Tyumanem pigpamalliꞌ, nyatay si Kristu aw nya-imoꞌ sakanan kalyu kanaten na manga makasasalaꞌ.

7Walaꞌ ya un malim patayen pada sa eped na utaw pangkay adti utaw na walaꞌ ya pagsalaꞌ, manang pagaw awun magtumbay sa pagka-utawun nan na patayen pada sa madyaw na utaw na awun pagkallat sa eped nan. 8Manang ya Tyumanem, pangkay makasasalaꞌ kitadun, pigpakitaꞌ nan ya kadakulaꞌ na pagginawa nan magi dun ni pagkamatay ni Kristu adti krus kalyu kanaten.

9Magi sa duguꞌ ni Kristu, pigdawat da kitadun na Tyumanem kasiling na walaꞌ da ya salaꞌ. Yanagaw, to-o naten kya-ede-an na paluwa-en kitadun nan lekat adti kanan pagpa-emel-emel. 10Idtu muna, po-on kitadun na Tyumanem, manang adun, nyakalikuꞌ da kitadun adti kanan magi sa pagkamatay na kanan Iseꞌ. Aw nyabangal da na paluwa-en kitadun asuntu sa pagkataw ni Jisus lekat adti pagkamatay. 11Aw bekeꞌ oloꞌ na maynan, manang magleya uman kitadun asuntu sa pig-imoꞌ na Tyumanem kanaten magi kan Jisu-Kristu na kanaten Matas na Pangulu, kay nyakalikuꞌ da kitadun adti kanan.

Ya pagpa-unawa kan Adan aw kan Jisus

12Yanagaw, asuntu sa salaꞌ na dyumateng asini tas na lupaꞌ magi sa sambuk na utaw na si Adan, dyumateng uman ya kamatayen. Yanagaw dyatengan na kamatayen ya kadég na manga utaw kay nyakasalaꞌ ya kadég. 13Asini muna, sa walaꞌ pa atagan na Tyumanem ya kanan Uldin adti manga utaw, dadan da silan nyakasalaꞌ. Manang asuntu na walaꞌ pa ya manga suguꞌ na un kalakadan, walaꞌ nan uman iyapa ya manga salaꞌ nilan. 14Manang lekat adti manga allaw ni Adan taman adti manga allaw ni Moysis, migdumala la ya kamatayen sa manga utaw pangkay walaꞌ pag-unawa ya salaꞌ na manga utaw sa salaꞌ ni Adan. Aw si Adan nya-imoꞌ palangad alung sa sambuk na un dumateng na yan si Kristu. 15Manang ya salaꞌ na manga utaw diliꞌ maka-unawa sa kallat na Tyumanem. Asuntu na lyumakad ya sambuk na utaw sa suguꞌ na Tyumanem, dyumateng adti kadég na utaw ya kamatayen. Manang to-o pa dakulaꞌ ya kallat na Tyumanem na pig-atag nan adti kadég na utaw magi kan Jisu-Kristu. 16Aw walaꞌ pag-unawa ya kallat na Tyumanem aw ya syampetan na salaꞌ ni Adan. Ya salaꞌ nan, yan ya du-an na awun pagpa-emel-emel na Tyumanem. Manang ya kallat na Tyumanem adti kanaten na nyaka-imoꞌ sa madég na salaꞌ, yan ya du-an na pigdawat nan kitadun kasiling na walaꞌ da ya salaꞌ. 17Asuntu sa salaꞌ ni Adan, migdumala la ya kamatayen sa kadég na manga utaw. Manang to-o pa dun dakulaꞌ ya nya-imoꞌ ni Jisus. Aw pangkay singalan ya dumawat sa kallat nan, magi kan Kristu dawaten sakanan na Tyumanem kasiling na walaꞌ da ya salaꞌ aw matagtun nan ya ginawa na walaꞌ ya katigkasan aw magdumala eped ni Kristu.

18Yanagaw, asuntu sa salaꞌ ni Adan, pig-ukuman da ya kadég na utaw na awun da kamatayen. Manang asuntu sa pig-imoꞌ ni Jisus na walaꞌ ya salaꞌ, mabatug da lanasen ya manga salaꞌ na kadég na utaw, aw dun da silan dawata na Tyumanem kasiling na walaꞌ da ya salaꞌ. Aw matagtun nilan ya ginawa na walaꞌ ya katigkasan. 19Kay asuntu sa sambuk na utaw na si Adan na walaꞌ dalug sa suguꞌ na Tyumanem, nya-imoꞌ makasasalaꞌ ya kadég na utaw. Manang magi uman sa sambuk na utaw na si Jisus na dyumalug sa suguꞌ na Tyumanem, yanagaw dawaten na Tyumanem ya kadég na nyangintu-u kan Jisus kasiling na walaꞌ da ya salaꞌ.

20Na, pig-atag na Tyumanem ya Uldin pada ka-ede-an na manga utaw na piglakadan nilan ya manga suguꞌ nan. Aw pangkay migkadég ya pigpan-imoꞌ nilan na manga salaꞌ, manang to-o pa dun baling migkadakulaꞌ ya kallat na Tyumanem kanilan. 21Yanagaw, kasiling na pagdumala na salaꞌ sa kadég na manga utaw aw dyatengan silan na kamatayen, maynan uman, magi sa pig-imoꞌ ni Jisus migdumala la ya kanan kallat adti manga utaw, aw dawaten da silan na Tyumanem kasiling na walaꞌ da ya salaꞌ aw matagtun nilan ya ginawa na walaꞌ ya katigkasan magi kan Jisu-Kristu na kanaten Matas na Pangulu.

Currently Selected:

Roma 5: klgv

Highlight

Compare

Copy