Roma 4

Si Abraham nya-imoꞌ madyaw na pundinganan dun ni pagpangintu-u nan

1Na, unu ya mapaglong tadun kan Abraham na tyugbulan tadun na manga Judiyu? Unu ya du-an na dyawat sakanan na Tyumanem kasiling na walaꞌ ya salaꞌ? 2Kun ya madyaw na manga imo-unun ni Abraham yan ya du-an na pigdawat sakanan na Tyumanem, umbaꞌ sakanan galu magpalibantug. Manang ya tengteng matinaw, walaꞌ ya un nan mapalibantug adti Tyumanem. 3Kya-ede-an tadun ya pigpasulat na Tyumanem asini muna, law nan, “Nyangintu-u si Abraham sa manga piglong na Tyumanem. Aw magi sa pagpangintu-u nan, pigdawat sakanan na Tyumanem kasiling na walaꞌ ya salaꞌ.”#4:3 Mabasa adti Génésis 15:6.

4Na, kun magtalabahu ya utaw, pagtandanan sakanan aw ya tandan yeiy diliꞌ anenganengen na kallat kanan. Pigtandanan sakanan asuntu na pigtalabahuwan nan. 5Manang bekeꞌ na maynan ya du-an na dawaten na Tyumanem ya utaw na mig-imoꞌ sa malatay aw imo-un nan kasiling na walaꞌ da ya salaꞌ. Magi saba sa pagpangintu-u na utaw sa Tyumanem, dawaten nan sakanan, aw bekeꞌ na asuntu sa manga imo-unun nan na madyaw. 6Yeiy uman ya pigsulat ni Dabid asini muna. Miglong sakanan na madyaw ya kana utaw na pigdawat na Tyumanem kasiling na walaꞌ da ya salaꞌ, aw bekeꞌ na asuntu na pig-imoꞌ nan ya manga madyaw. Migsulat si Dabid:

7 “Madyaw ya kana manga utaw na piglanas da na Tyumanem ya manga salaꞌ nilan aw pigkalingawan da nan ya paglakad nilan sa kanan manga suguꞌ.

8 Madyaw ya kana utaw na walaꞌ da anenganenga na Tyumanem ya manga salaꞌ nan.”#4:7-8 Mabasa adti Salmo 32:1-2.

9Na, ya pigkasampetan ni Dabid asini na pigpakadyaw, bekeꞌ oloꞌ na Judiyu na awun pigdalug na katanem sa pagpatuliꞌ manang dala uman ya manga Héntil na walaꞌ ya pigdalug na katanem sa pagpatuliꞌ. Kay kasiling na piglong da nami: “Magi sa pagpangintu-u ni Abraham, pigdawat sakanan na Tyumanem kasiling na walaꞌ ya salaꞌ.” 10Kanu si Abraham dawata na Tyumanem na walaꞌ ya salaꞌ? Sa abus da sakanan tuli-a aw sa walaꞌ pa? Pigdawat saba si Abraham na Tyumanem sa walaꞌ pa sakanan tuli-a. 11Aw pigtuliꞌ si Abraham na yan ya pangilala na pigdawat da sakanan na Tyumanem magi sa pagpangintu-u nan. Yanagaw nya-imoꞌ sakanan tyugbulan na palangad ama na kadég na manga utaw na nyangintu-u sa Tyumanem pangkay walaꞌ silan tuli-a. Kay silan uman pigdawat na Tyumanem kasiling na walaꞌ ya salaꞌ, magi sa pagpangintu-u nilan. 12Aw si Abraham uman ya palangad ama na kadég na manga Judiyu, bekeꞌ na asuntu na migpatuliꞌ silan, manang asuntu baling sa kanilan pagpangintu-u na kasiling na kan Abraham sa walaꞌ pa sakanan tuli-a.

Ya pagtuman na Tyumanem sa pakang nan adti utaw na awun pagpangintu-u

13Na, migpakang ya Tyumanem kan Abraham na tagtunun na manga buwadbuwad nan ya kadakulaꞌ na banwa, bekeꞌ na asuntu na pigtuman ni Abraham ya Uldin. Yan baling ya du-an, kay pigtuman na Tyumanem ya kanan pakang asuntu na nyangintu-u si Abraham, aw pigdawat sakanan na Tyumanem kasiling na walaꞌ da ya salaꞌ. 14Manang kun yan oloꞌ ya atagan sa manga pigpakang na Tyumanem ya manga dyumalug sa Uldin, walaꞌ ya ma-untung na manga eped na nyangintu-u, aw walaꞌ ya guna na manga pakang nan. 15Kay ya Uldin, yan ya du-an na awun pagpa-emel-emel na lekat adti Tyumanem. Manang kun walaꞌ ya Uldin, diliꞌ ka-ede-an na nyakasalaꞌ ya utaw.

16Yanagaw, magi sa pagpangintu-u, madawat tadun ya manga pigpakang na Tyumanem, pada ma-imoꞌ yeiy kallat na lekat adti kanan. Ya manga pigpakang yeiy, tengteng saba dumateng adti manga utaw na awun pagpangintu-u kasiling na pagpangintu-u ni Abraham aw bekeꞌ oloꞌ na manga dyumalug sa Uldin. Kay si Abraham nya-imoꞌ palangad ama na kadég na utaw na nyangintu-u. 17Kay pigpasulat na Tyumanem asini muna ya pakang nan kan Abraham, law nan, “Pig-imoꞌ ta kaw ama sa madég na manga nasud.”#4:17 Mabasa adti Génésis 17:5. Aw kya-ede-an nan na diliꞌ sakanan bullugan na Tyumanem sa manga pigpakang kanan. Kay to-o nan kya-ede-an na mabatug na Tyumanem matawun ya utaw lekat adti pagkamatay aw mabatug nan imo-un ya walaꞌ pa ka-imoꞌ. 18Yanagaw, pangkay walaꞌ da ya pag-iman ni Abraham na ma-imoꞌ ama na madég na utaw asuntu na bakleg da sakanan, manang pyangintu-uwan nan ya pigpakang kanan na Tyumanem: “Kasiling na manga bitun na diliꞌ ma-iyap, maynan uman ya kadég na manga buwadbuwad na un ku atag kanmu.”#4:18 Mabasa adti Génésis 15:5. 19Yanagaw walaꞌ pagkalumay ya ginawa ni Abraham na maka-iseꞌ pa pangkay sanggatus (100) da ya umay nan aw pangkay ya ka͡ubayan nan na si Sara diliꞌ magpaka-iseꞌ. Manang kenneꞌ na kasalig na pagpangintu-u ni Abraham. 20Walaꞌ sakanan pagduwaduwa sa pigpakang na Tyumanem kanan. Migkasalig baling ya kanan pagpangintu-u aw pigdeyen nan ya Tyumanem. 21Kay tengteng kya-ede-an ni Abraham na pangkay unu ya pigpakang na Tyumanem, mabatug nan saba imo-un. 22Yanagaw magi sa pagpangintu-u ni Abraham, pigdawat na Tyumanem sakanan kasiling na walaꞌ ya salaꞌ.

23Na, bekeꞌ oloꞌ na sayda ni Abraham ya pigka-untungan sa piglong na Tyumanem, 24manang dun ni piglong nan, kya-ede-an da tadun uman na dawaten kitadun nan kasiling na walaꞌ da ya salaꞌ kun mangintu-u kitadun sa Tyumanem na migmataw sa kanaten Matas na Pangulu na si Jisus lekat adti pagkamatay. 25Pigtumbay si Jisus na patayen adti krus asuntu sa manga salaꞌ tadun. Manang pigmataw sakanan lekat adti pagkamatay. Aw magi sa pig-imoꞌ nan yeiy, mabatug da kitadun dawaten na Tyumanem kasiling na walaꞌ da ya salaꞌ.

Currently Selected:

Roma 4: klgv

Highlight

Compare

Copy