Roma 6

Ya bagu na pagka-utawun dun ni kan Kristu

1Na, pagaw awun utaw na baluk ya anenganeng na maglong, “Unu, magpadeleg kitadun magpakasalaꞌ pada magkadakulaꞌ pa ya kallat na Tyumanem kanaten?” 2Ya tubag ku kanan, “Diliꞌ saba! Kay kasiling kitadun na nyatay da dun ni pag-imoꞌ sa salaꞌ, aw walaꞌ da ya katulus na salaꞌ adti kanaten. Yanagaw, unun pa tadun ya pag-imoꞌ sa salaꞌ?” 3Walaꞌ mayu kaꞌ ka-ede-i na ya pagba͡utismu kanaten, ya kakawasan yeiy, nyakasambuk da kitadun kan Kristu Jisus dun ni pagkamatay nan? 4Yanagaw dun ni pagba͡utismu kanaten, nyaka-agad da kitadun dun ni paglebeng kan Kristu pada maka-agad uman kitadun adti pagkataw nan magi sa katulus na Ama, aw mabagu uman ya kanaten anenganeng.

5Aw kun nyakasambuk da kitadun kan Kristu dun ni pagkamatay nan, makasambuk saba uman kitadun dun ni pagkataw nan. 6Kya-ede-an tadun na ya dadan na pagka-utawun tadun nyaka-agad da dun ni pagkamatay ni Jisus adti krus pada matay ya dadan na pagka-utawun tadun aw ya salaꞌ diliꞌ da mag-allang kanaten. 7Kay kun singalan ya nyatay da dun ni dadan na pagka-utawun nan, pigpaluwaꞌ da sakanan lekat adti salaꞌ. 8Na, kun nyaka-agad da kitadun dun ni pagkamatay ni Kristu, pyangintu-uwan tadun uman na matawun kitadun aw maka-iyeped kitadun kanan. 9Asuntu na nyataw si Kristu lekat adti pagkamatay, kya-ede-an da tadun na diliꞌ da sakanan matay salut kay walaꞌ da ya katulus na kamatayen magdumala kanan. 10Kay minsan da ya pagkamatay nan pada sa salaꞌ na kadég na manga utaw. Aw nyataw sakanan pada basa͡an ya Tyumanem. 11Aw maynan uman, silinga la mayu na nyatay da ya pagkalim mayu mag-imoꞌ sa salaꞌ. Aw dun ni kamayu pag-eyaꞌ, daluga mayu ya pagkaliman na Tyumanem, kay nyakasambuk da kamu kan Kristu Jisus.

12Yanagaw, diliꞌ da mayu pagtumbay na magdumala pa ya salaꞌ dun ni lawas mayu, pada diliꞌ da mayu ka͡agadan ya pagkaliman na pagka-utawun mayu adti imo-unun na malatay. 13Aw diliꞌ mayu uman pagtumbay ya manga punganan na lawas mayu na mag-imoꞌ sa malatay, manang atagan mayu baling ya pagka-utawun mayu adti Tyumanem na un mag-imoꞌ sa madyaw. Kay nyatay da ya dadan na pagka-utawun mayu aw adun pigbagu la kamu. Yanagaw atagan ya manga punganan na lawas mayu adti pag-imoꞌ sa pagkaliman na Tyumanem. 14Kay walaꞌ da kamu dumalayi na salaꞌ, asuntu na bekeꞌ da na Uldin ya miggagad kamayu, manang ya migdumala kamayu adun yan da ya kallat na Tyumanem.

Ya pagpaluwaꞌ kanaten lekat adti pag-allang na salaꞌ

15Na, pagaw awun utaw na maglong, “Unu, magpadeleg kitadun magpakasalaꞌ asuntu na walaꞌ da ya pagdumala na Uldin kanaten aw pigsayuwan da na kallat na Tyumanem?” Ya tubag ku kanan, “Diliꞌ saba!” 16Unu, walaꞌ mayu ka-ede-i na pig-allang kitadun na pangkay unu na pigka͡agadan tadun, aw yeiy ya nya-imoꞌ tadun amu? Kun mag-imoꞌ kitadun sa salaꞌ, yan ya mig-allang kanaten, aw ya sampetan yan pa-emel-emelen kitadun na Tyumanem na walaꞌ ya tyamanan. Manang kun dalugun tadun sakanan, ya sampetan yan, katutukan ya Tyumanem kanaten. 17Idtu muna pig-allang kamu na pagkaliman mayu mag-imoꞌ sa salaꞌ, manang adun, migpasalamat aku sa Tyumanem, kay pigbetang da mayu adti kamayu anenganeng ya matinaw na palna-u na Tyumanem na pigpa-edeꞌ da kamayu. 18Aw adun, pigpaluwaꞌ da kamu lekat adti manga salaꞌ, aw nya-imoꞌ da kamu allang dun ni pagdalug sa pagkaliman na Tyumanem.

19Na, pigpundinganan ku ya pagpakabetang na allang pada maksay mayu kalabetan. Idtu muna, migpa-allang kamu sa kamayu lawas dun ni pag-imoꞌ sa makamulamula͡ay aw sa pangkay unu na malatay. Aw walaꞌ ya katantanan na manga salaꞌ mayu. Manang adun, atagan da adti Tyumanem ya manga punganan na lawas mayu pada dumalug sa pagkaliman nan, yanagaw kalinisan ya kamayu anenganeng. 20Idtu muna sa allang pa kamu na salaꞌ, walaꞌ mayu pagbetangan sa ginawa ya pagdalug sa pagkaliman na Tyumanem. 21Na, unu kaꞌ ya nya-untung mayu sa pag-imoꞌ mayu sa malatay idtu muna na pigkamulamula͡an da mayu adun? Ya un datengan na mig-imoꞌ sa maynan, pa-emel-emelen na walaꞌ ya tyamanan. 22Manang adun, pigpaluwaꞌ da kamu lekat adti kamayu manga salaꞌ, aw nya-imoꞌ da kamu adun allang dun ni pagdalug sa Tyumanem. Aw dakulaꞌ saba ya ma-untung mayu kay kalinisan ya kamayu anenganeng. Aw ya sampetan yeiy, matagtun mayu ya ginawa na walaꞌ ya katigkasan. 23Kay ya tandan sa salaꞌ, yan ya pagpa-emel-emel na Tyumanem na walaꞌ ya tyamanan. Manang ya pig-atag na Tyumanem na walaꞌ ya bayad, yan ya ginawa na walaꞌ ya katigkasan asuntu na nyakasambuk da kitadun kan Kristu Jisus na kanaten Matas na Pangulu.

Currently Selected:

Roma 6: klgv

Highlight

Compare

Copy